ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಧಾರಾವಾಹಿ 'ಜೊತೆ ಜೊತೆಯಲಿ' ಎರಡನೇ ವಾರವೂ ಮೊದಲ ಸ್ಥಾನ ಕಾಯ್ದುಕೊಂಡಿದೆ. ಆರಂಭವಾದ ಒಂದೇ ವಾರದಲ್ಲಿ ಸೂಪರ್ ಹಿಟ್‌, ಟಾಪ್ ರೇಟೆಡ್ ಹಾಗೂ ಮಹಿಳೆಯರು, ಯುವತಿಯರ ಅಚ್ಚುಮೆಚ್ಚಿನ ಧಾರಾವಾಹಿಯಾಗಿ ಖ್ಯಾತಿ ಗಳಿಸಿದೆ.
ಕೋಟ್ಯಂತರ ರೂಪಾಯಿ ವ್ಯವಹಾರ ಮಾಡುವ ಆರ್ಯವರ್ಧನ್ಗೆ ಸಿಂಪಲ್‌ ಲೈಫ್ ಕಲಿಸಿಕೊಟ್ಟ ಅನು ಇಬ್ಬರೂ ಪ್ರೇಕ್ಷಕರ ಮನ ಗೆಲ್ಲುವಲ್ಲಿ ಯಶಸ್ವಿಯಾಗಿದ್ದಾರೆ. ಸರಳ ಜೀವನವನ್ನು ಎಂದಿಗೂ ಕಂಡಿರದ ಹಾಗೂ ಎರಡು ರೂಪಾಯಿಗೆ ಇರುವ ಪ್ರಾಮುಖ್ಯತೆ ತೋರಿಸಿಕೊಟ್ಟ ಅನು, ವರ್ಧನ್ ಗ್ರೂಪ್ಗೆ ಕೋಟ್ಯಂತರ ರೂಪಾಯಿ ಲಾಭ ತಂದುಕೊಟ್ಟಿದ್ದಾಳೆ. ಈ ವಾರ ಅನು, ವರ್ಧನ್ ಗ್ರೂಪ್ ಆಫ್ ಕಂಪನಿಯಲ್ಲಿ ಕೆಲಸ ಗಿಟ್ಟಿಸಿಕೊಂಡು, ನಿಧಾನವಾಗಿ ಆರ್ಯವರ್ಧನ್ ಮನಸ್ಸಿಗೆ ಹತ್ತಿರವಾಗುತ್ತಿದ್ದಾಳೆ. ಈ ಮಧ್ಯೆ ಅನಿರುದ್ಧ್ ಹಾಗೂ ಮೇಘಶ್ರೀಗೆ ಅಭಿಮಾನಿಗಳ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಿದೆ. ಅನಿರುದ್ಧ್ ತಮ್ಮ ಪಾತ್ರವನ್ನು ಅಚ್ಚುಕಟ್ಟಾಗಿ ಹಾಗೂ ಮುಗ್ಧವಾಗಿ ಅಭಿನಯಿಸುತ್ತಿರುವುದು ಧಾರಾವಾಹಿ ಮೆಚ್ಚುಗೆಗೆ ಪಾತ್ರವಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಈ ಧಾರಾವಾಹಿಯ ತುಣುಕುಗಳನ್ನು ವೀಕ್ಷಿಸಲು ಜನ ಕಾತರರಾಗಿದ್ದಾರೆ. ಸಾಹಸಸಿಂಹ ವಿಷ್ಣುವರ್ಧನ್‌ ಅವರ ಮುದ್ದಿನ ಅಳಿಯ ಅನಿರುದ್ಧ್ ಅಭಿನಯದ ಮೊದಲನೇ ಧಾರಾವಾಹಿ ‘ಜೊತೆ ಜೊತೆಯಲಿ’ ಮೊದಲ ಹಾಗೂ ಎರಡನೇ ವಾರ ಸತತವಾಗಿ ಟಿಆರ್ಪಿಯಲ್ಲಿ ಟಾಪ್ ರೇಟೆಡ್ ಲಿಸ್ಟ್ನಲ್ಲಿ ಇರುವುದು ಧಾರಾವಾಹಿಗಳ ಲೋಕದಲ್ಲೇ ಇದು ಮೊದಲ ಬಾರಿ ಎನ್ನಬಹುದು. ಸೆಪ್ಟೆಂಬರ್ 9 ರಿಂದ ರಾತ್ರಿ 8.30 ಕ್ಕೆ ಈ ಧಾರಾವಾಹಿ ಪ್ರಸಾರವಾಗುತ್ತಿದೆ.
