ಬಿಗ್ ಬಾಸ್ ಸೀಸನ್ 7 ಸ್ಪರ್ಧಿಗಳು ಮತ್ತೆ ಒಂದಾಗಿದ್ದಾರೆ. ಅರೆ, ಅವರೇನಾದ್ರೂ ಟ್ರಿಪ್ ಹೋಗುತ್ತಿದ್ದಾರಾ ಎಂದು ಕನ್ಫ್ಯೂಸ್ ಆಗಬೇಡಿ. ಅವರೆಲ್ಲಾ ಜೊತೆಯಾಗಿರುವುದು ಸೃಜನ್ ಲೋಕೇಶ್ ನಡೆಸಿಕೊಡುತ್ತಿರುವ ಮಜಾ ಟಾಕೀಸ್ ವೇದಿಕೆ ಮೇಲೆ.
ಬಿಗ್ ಬಾಸ್ ಸೀಸನ್ 7 ರ ಸ್ಪರ್ಧಿಗಳಾದ ಶೈನ್ ಶೆಟ್ಟಿ , ವಾಸುಕಿ ವೈಭವ್ , ಭೂಮಿ ಶೆಟ್ಟಿ , ದೀಪಿಕಾ ದಾಸ್ ,ಪ್ರಿಯಾಂಕಾ ಶಿವಣ್ಣ ಹಾಗೂ ಹರೀಶ್ ಈ ವಾರದ ಮಜಾ ಟಾಕೀಸ್ ಸಂಚಿಕೆಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಬಿಗ್ ಬಾಸ್ ಸೀಸನ್ 7 ಗ್ರ್ಯಾಂಡ್ ಫಿನಾಲೆ ನಂತರ ಮೊದಲ ಬಾರಿಗೆ ಸ್ಪರ್ಧಿಗಳು ಪರದೆ ಮೇಲೆ ಒಟ್ಟಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಲಾಕ್ ಡೌನ್ ನಂತರ ಎಲ್ಲೂ ಹೊರಗೆ ಸೇರದ ಇವರು ಇದೀಗ ಮಜಾ ಟಾಕೀಸ್ನಿಂದಾಗಿ ಒಟ್ಟಿಗೆ ಸೇರಿದ್ದು ಬಿಗ್ ಬಾಸ್ ನಂತರ ಇವರೆಲ್ಲರನ್ನೂ ಜೊತೆಯಾಗಿ ನೋಡುವ ಅವಕಾಶ ವೀಕ್ಷಕರಿಗೆ ದೊರಕಿದೆ. ಮಜಾ ಟಾಕೀಸ್ನಲ್ಲಿ ಬಿಗ್ ಬಾಸ್ ನೆನಪುಗಳನ್ನು ಹಂಚಿಕೊಳ್ಳಲಿದ್ದಾರೆ.
ಮಜಾ ಟಾಕೀಸ್ ಮೂಲಕ ಕನ್ನಡ ಕಿರುತೆರೆಯಲ್ಲಿ ಫೇಮಸ್ ಆದ ಕುರಿ ಪ್ರತಾಪ್ ಬಿಗ್ ಬಾಸ್ ಸೀಸನ್ 7 ರನ್ನರ್ ಅಪ್ ಆಗಿ ಹೊರಬಂದಿದ್ದರು. ಅವರು ಇದೀಗ ಮಜಾ ಟಾಕೀಸ್ ಭಾಗವಾಗಿರುವುದರಿಂದ ಕುರಿ ಪ್ರತಾಪ್ ಕೂಡಾ ದೊಡ್ಮನೆಯ ನೆನಪುಗಳನ್ನು ನಿಮ್ಮ ಮುಂದೆ ಬಿಚ್ಚಿಡಲಿದ್ದಾರೆ. ಕಳೆದ ವಾರದ ಸಂಚಿಕೆಯಲ್ಲಿ ಸ್ಯಾಂಡಲ್ವುಡ್ ನಟಿಯರಾದ ಸುಧಾರಾಣಿ ಹಾಗು ಶ್ರುತಿ ಬಂದು ಕಾರ್ಯಕ್ರಮದಲ್ಲಿ ಸಖತ್ ಎಂಜಾಯ್ ಮಾಡಿದ್ದರು.
