ಸ್ನೇಹದ ಕಡಲಲ್ಲಿ 'ಡಿಕೆ ಬೋಸ್'ನ ಪ್ರೀತಿಯ ತ್ಯಾಗ

'ಡಿ ಕೆ ಬೋಸ್' ಎಂಬುದು ಬಹಳ ಜನ ಬಳಸುವ ಬೈಗುಳ. ಈಗ ಇದೇ ಹೆಸರಿನ ಕನ್ನಡ ಚಿತ್ರವೊಂದು ಇಂದು ತೆರೆ ಕಂಡಿದೆ. ಈ ಸಿನಿಮಾ ವಿಮರ್ಶೆ ಇಲ್ಲಿದೆ ನೋಡಿ...

ಭರತ್ ಮತ್ತು ಅಮರ್ (ನಾಯಕರು) ಅನಾಥರು. ಒಟ್ಟಿಗೆ ಬೆಳೆಯುತ್ತಾರೆ. ಸಣ್ಣಪುಟ್ಟ ಕೆಲಸ ಬಿಟ್ಟು ಒಂದು ದೊಡ್ಡ ಡೀಲ್​​​​​ಗೆ ಕೈ ಹಾಕುತ್ತಾರೆ. ಅವರ ಬಳಿ ಮೋಸ ಮಾಡಿ ಪಡೆದ ಒಂದು ವಜ್ರದ ಉಂಗುರ ಇರುತ್ತೆ. ಅದು ಐದು ಲಕ್ಷ ಬೆಲೆ. ಅದರ ಜೊತೆಗೆ 19 ನಕಲಿ ವಜ್ರದ ತುಂಡುಗಳನ್ನು ಸೇರಿಸಿ ಮಂಗಳೂರಿನಲ್ಲಿ ಕಾಡು ಹುಲಿ ಎಂಬ ಡಾನ್ ಜೊತೆ ವ್ಯವಹಾರ ಕುದುರಿಸುತ್ತಾರೆ. 20 ವಜ್ರದ ಬೆಲೆ 40 ಲಕ್ಷ ಎಂದು ಕಟ್ಟಲಾಗುತ್ತದೆ. ಆದರೆ, ಅದರಲ್ಲಿ ನಕಲಿ ವಜ್ರಗಳು ಬೆಳಕಿಗೆ ಬಂದಾಗ ಭರತ್ ಹಾಗೂ ರಾಮ್ ಪರಿಸ್ಥಿತಿಯು ಬದಲಾಗಿರುತ್ತದೆ. ತಮ್ಮ ಊರಿಗೆ ಇನ್ನೇನು ಸೇರಬೇಕು ಅನ್ನುವಷ್ಟರಲ್ಲಿ ಮೂರು ವಿಚಾರಗಳು ಪ್ರಸ್ತಾಪಕ್ಕೆ ಬರುತ್ತವೆ. ಒಂದು ಭರತ್ ಹಾಗೂ ನಿಶ ಪ್ರೇಮ, ಎರಡನೆಯದು ಲೋಕಲ್ ರಾಜಕೀಯ ವ್ಯಕ್ತಿ ಈ ಯುವಕರಿಂದ ಅನುಭವಿಸಿದ ಅವಮಾನಕ್ಕೆ ತಿರುಗೇಟಿಗೆ ಕಾಯುತ್ತಾನೆ. ಕೊನೆಯದು ಪೊಲೀಸರ ಹುಡುಕಾಟ. ಯಾರು ಯಾವ ರೀತಿಯಲ್ಲಿ ತಮ್ಮ ಬೇಳೆ ಬೇಯಿಸಿಕೊಂಡು ಡಿಕೆ ಬೋಸ್ ಆಗುತ್ತಾರೆ ಎಂಬುದು ಮುಂದಿನ ಚಿತ್ರಕಥೆ.

ಒಂದು ಒಳ್ಳೆಯ ಕಥೆಯಲ್ಲಿ ಹಾಸ್ಯದ ಜೊತೆ, ಪ್ರೇಮದ ತ್ಯಾಗ ಹಾಗೂ ಸ್ನೇಹದ ಪರಾಕಾಷ್ಟೆ ಚಿತ್ರದಲ್ಲಿ ತುಂಬಿಕೊಂಡಿದೆ. ಮೊದಲ ನಿರ್ದೇಶನದಲ್ಲಿ ಸಂದೀಪ್ ಮಹಾಂತೇಶ್ ಗೆಲುವು ಪಡೆದಿದ್ದಾರೆ. ಆದರೆ, ಚಿತ್ರದ ಮೊದಲರ್ಧ ಇನ್ನೂ ಸ್ಟ್ರಾಂಗ್ ಮಾಡಬೇಕಿತ್ತು ಅನಿಸುತ್ತದೆ. ಪೋಸ್ಟ್ ಇಂಟರ್ವಲ್ ಸಿನಿಮಾ ಹಾಸ್ಯದೊಂದಿಗೆ ಸಾಗುತ್ತಾ ತ್ಯಾಗದಲ್ಲಿಅಂತ್ಯಕಾಣುತ್ತದೆ.

ಚಿತ್ರದಲ್ಲಿ ಪೃಥ್ವಿ ಹಾಗೂ ಶೋಭರಾಜ್ ಸ್ನೇಹದ ವಿಚಾರ ಇಷ್ಟವಾಗುತ್ತದೆ. ರಿಷಿ ನಿಜಗುಣ ಅವರ ತಣ್ಣನೆಯ ನೋಟ ಮೆಚ್ಚುಗೆ ಗಳಿಸುತ್ತದೆ, ವಾಮಂಜೂರ್ ತಂಡದ ಕಾಮಿಡಿ ಇಲ್ಲಿ ಸೊಗಸಾಗಿದೆ. ಶೀರ್ಷಿಕೆ ಗೀತೆ ಹಾಡಿರುವ ಗುರುಕಿರಣ್ ಹಾಡು ಚೆನ್ನಾಗಿದೆ. ಛಾಯಾಗ್ರಾಹಕ ಉದಯ ಬಲ್ಲಾಳ್ ಅವರ ಕೆಲಸದಲ್ಲಿ ಅಚ್ಚುಕಟ್ಟಾಗಿದೆ. ಪ್ರೇಕ್ಷಕನ ಹಣ ಚಿತ್ರದ ದ್ವಿತೀಯಾರ್ಧದಲ್ಲಿ ಫಲಿಸುತ್ತದೆ.