ಟಾಲಿವುಡ್ ಖ್ಯಾತ ನಟ ವಿಜಯ್ ದೇವರಕೊಂಡ ಅವರ ಇತ್ತೀಚಿನ ಮೇಕ್ ಓವರ್ ಎಲ್ಲರ ಗಮನ ಸೆಳೆದಿದ್ದು, ಅವರ ಕೇಶವಿನ್ಯಾಸ ಕಂಡು ಅಭಿಮಾನಿಗಳು ಬೆರಗಾಗಿದ್ದಾರೆ. ಅವರು ದಿಢೀರ್ ದಟ್ಟವಾದ ತಮ್ಮ ತಲೆ ಕೂದಲನ್ನು ಟ್ರಿಮ್ ಮಾಡಿಸಿಕೊಂಡು, ಹ್ಯಾಟ್ ಹಾಕಿಕೊಂಡಿರುವ ಫೋಟೋ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿದೆ.
ಅನನ್ಯಾ ಪಾಂಡೆ ಜೊತೆಗಿನ 'ಲೈಗರ್' ಸಿನಿಮಾದ ಚಿತ್ರೀಕರಣ ಮುಗಿಸಿರುವ ವಿಜಯ್ ದೇವರಕೊಂಡ ತಮ್ಮ ಮುಂಬರುವ ಚಿತ್ರ ಜನ ಗಣ ಮನದಲ್ಲಿ ಮಿಲಿಟರಿ ಅಧಿಕಾರಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ವರದಿಯಾಗಿದೆ. ಇತ್ತೀಚೆಗಷ್ಟೇ ಪ್ರೈಮ್ ವಾಲಿಬಾಲ್ ಲೀಗ್‌ಗಾಗಿ ತೆಲಂಗಾಣದ ಗಚಿಬೌಲಿ ಒಳಾಂಗಣ ಕ್ರೀಡಾಂಗಣದಲ್ಲಿ ಕಾಣಿಸಿಕೊಂಡರು. ಈ ವೇಳೆ ಅವರ ಹೊಸ ಹೇರ್ ಸ್ಟೈಲ್ ಎಲ್ಲರ ಗಮನ ಸೆಳೆಯಿತು. 'ಜನ ಗಣ ಮನ' ಚಿತ್ರಕ್ಕಾಗಿಯೇ 'ಅರ್ಜುನ್ ರೆಡ್ಡಿ' ಖ್ಯಾತಿಯ ನಟ ಹೊಸ ಅವತಾರ ಎತ್ತುತ್ತಾರೆ ಎಂದು ವರದಿಯಾಗಿದೆ.
ಇದನ್ನೂ ಓದಿ: ರಶ್ಮಿಕಾ ಜೊತೆ ಮದುವೆ ವರದಿ: 'ನಾನ್ಸೆನ್ಸ್' ಎಂದ ವಿಜಯ್ ದೇವರಕೊಂಡ
ಇನ್ನು 'ಜನ ಗಣ ಮನ' ಸಿನಿಮಾವನ್ನು ಪುರಿ ಜಗನ್ನಾಥ್ ನಿರ್ದೇಶಿಸಲಿದ್ದು, ವಿಜಯ್ - ಪುರಿ ಜೋಡಿಯ ಎರಡನೇ ಚಿತ್ರ ಇದಾಗಲಿದೆ. ಏಕೆಂದರೆ ಈ ಜೋಡಿಯ ಮೊದಲ ಚಿತ್ರ ಲೈಗರ್ ಆಗಿದ್ದು, ಆಗಸ್ಟ್ 25 ರಂದು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಗಲಿದೆ.
