ಸ್ಟಾರ್ ಸುವರ್ಣ ವಾಹಿನಿಯಲ್ಲಿ, ಮಧುಸೂದನ್ ನಿರ್ದೇಶನದಲ್ಲಿ ಪ್ರಸಾರವಾಗುತ್ತಿರುವ ಮತ್ತೆ ವಸಂತ ಧಾರಾವಾಹಿ ಯಶಸ್ವಿ ನೂರು ದಿನಗಳನ್ನು ಪೂರೈಸಿದೆ. "ನೂರರ ಸಂಭ್ರಮದಲ್ಲಿ ಮತ್ತೆ ವಸಂತ. ಇದರ ಭಾಗಿಯಾಗಲು ಖುಷಿಯಿದೆ. ವಸಂತನ ವಿಜಯ ಯಾತ್ರೆ ಹೀಗೆಯೇ ಮುಂದುವರಿಯಲಿ. ಈ ಗೆಲುವಲ್ಲಿ ನಿಮ್ಮ ಪಾತ್ರ ಅತಿ ಮುಖ್ಯ ಮತ್ತು ಅಪೂರ್ವ. ನಿಮ್ಮ ಈ ಉತ್ಸಾಹಭರಿತ ಉಪಸ್ಥಿತಿಗೆ ತುಂಬು ಹೃದಯದ ಧನ್ಯವಾದಗಳು" ಎಂದು ಹೇಳಿದ್ದಾರೆ ವಸಂತ ಪಾತ್ರಧಾರಿ ರಕ್ಷಿತ್ ಅರಸ್.
ಅಣ್ಣಾಜಿ ಎಂಬ ಏರಿಯಾ ಡಾನ್ ಆಶ್ರಯದಲ್ಲಿ ಬೆಳೆಯುವ ವಸಂತ ಹಾಗೂ ತಂದೆ ತಾಯಿಯ ಪ್ರೀತಿಯಲ್ಲಿ ಬೆಳೆಯುವ ಅಪರ್ಣಾಳ ನಡುವೆ ನಡೆಯುವ ಕಥೆಯೇ 'ಮತ್ತೆ ವಸಂತ' ಧಾರಾವಾಹಿಯ ಕಥಾ ಹಂದರ. ನಾಯಕ ವಸಂತನಿಗೆ ಗ್ಯಾರೇಜ್ ನಲ್ಲಿ ಕೆಲಸ. ಕೆಲಸದ ಹೊರತಾಗಿ ಸಣ್ಣ ಪುಟ್ಟ ಗೂಂಡಾಗಿರಿ ಕೆಲಸ ಮಾಡುವ ಮೂಲಕ ರೌಡಿಯಾಗಿ ಆತ ಗುರುತಿಸಿಕೊಂಡಿರುತ್ತಾನೆ. ಸಂಪ್ರದಾಯಸ್ಥ ಕುಟುಂಬದ ನಾಯಕಿ ಅಪರ್ಣಾಗೆ ಫ್ಯಾಷನ್ ಡಿಸೈನರ್ ಆಗಬೇಕೆಂದು ಕನಸು. ಅದನ್ನು ನನಸು ಮಾಡಬೇಕೆಂದು ಪಣತೊಡುವ ಅಪರ್ಣಾಗೆ ತಮ್ಮನ ಭವಿಷ್ಯ ಮತ್ತು ತಂದೆ ತಾಯಿಯನ್ನು ಚೆನ್ನಾಗಿ ನೋಡಿಕೊಳ್ಳಬೇಕು ಎನ್ನುವುದೇ ಜೀವನದ ಮುಖ್ಯ ಗುರಿ. ವಸಂತ ಮುಂಗೋಪಿಯಾಗಿದ್ದರೆ, ಅಪರ್ಣ ಬಹಳ ಸಂಯಮಿ.
ಅಣ್ಣಾಜಿಗಾಗಿ ಏನು ಬೇಕಾದರೂ ಮಾಡಲು ತಯಾರಾಗಿರುವ ವಸಂತನಿಗೆ ಕರುಣೆಯೇ ಇಲ್ಲ, ಆದರೆ ಈಕೆ ಮಮತಾಮಯಿ. ಒಟ್ಟನಲ್ಲಿ ವಿರುದ್ಧ ವ್ಯಕ್ತಿತ್ವದ ಇವರು ವೈರಿಗಳಂತೆ ಭೇಟಿಯಾಗುತ್ತಾರೆ. ಆದರೆ ಇದೀಗ ವೈರಿಗಳಂತಿದ್ದವರು ಇದೀಗ ನಿಧಾನವಾಗಿ ಸ್ನೇಹಿತರಾಗುತ್ತಾರೆ. ಇವರಿಬ್ಬರ ನಡುವೆ ಪ್ರೀತಿ ಮೂಡುತ್ತದಾ? ಇವರಿಬ್ಬರೂ ಮದುವೆಯಾಗುತ್ತಾರಾ ಎಂಬುದನ್ನು ಮುಂದಿನ ದಿನಗಳಲ್ಲಿ ಕಾದು ನೋಡಬೇಕಾಗಿದೆ.
ನಾಯಕ ವಸಂತ ಆಗಿ ರಕ್ಷಿತ್ ಅರಸ್ ಅಭಿನಯಿಸುತ್ತಿದ್ದಾರೆ. ನಾಯಕಿ ಅಪರ್ಣಾ ಆಗಿ ಅಕ್ಷತಾ ನಟಿಸುತ್ತಿದ್ದಾರೆ. ಉಳಿದಂತೆ ಕೀರ್ತಿಭಾನು, ಜಯದೇವ್, ಸ್ಪಂದನಾ ಮುಂತಾದ ಕಲಾವಿದರುಗಳು ನಟಿಸುತ್ತಿದ್ದಾರೆ.
