ಡಯಾಕ್ಸ್ ಎಂಟರ್ನ್ಮೈಂಟ್ ಹಾಗೂ ಧೀರನ್ ಸಿನಿ ಸರ್ವಿಸಸ್ ಬ್ಯಾನರ್ನಲ್ಲಿ ವೈ.ಬಿ.ಎನ್. ಸ್ವಾಮಿ ನಿರ್ದೇಶಿಸಿ ನಟಿಸುತ್ತಿರುವ 'ಧೀರನ್' ಸಿನಿಮಾಗಾಗಿ ಇತ್ತೀಚೆಗೆ ಗುರುಕಿರಣ್ ರೆಕಾರ್ಡಿಂಗ್ ಸ್ಟುಡಿಯೋನಲ್ಲಿ ಹಾಡುಗಳನ್ನು ರೆಕಾರ್ಡ್ ಮಾಡಲಾಯಿತು. ಆರ್.ಎಸ್. ಗಣೇಶ್ ಈ ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದಾರೆ.
ಚಿತ್ರಕ್ಕಾಗಿ 'ರೈಸ್ ಲೈಕ್ ಎ ಸನ್' ಎಂಬ ಭರ್ಜರಿ ಚೇತನ್ ಬರೆದ ಹಾಡನ್ನು ಸೂಪರ್ ಸ್ಟಾರ್ ಉಪೇಂದ್ರ ಹಾಡಿದ್ದಾರೆ. ಕನ್ನಡ ಚಿತ್ರರಂಗದ ನಾಲ್ಕು ದಿಗ್ಗಜರ ಆದರ್ಶಗಳನ್ನು ಎತ್ತಿ ಹಿಡಿಯುವುದಲ್ಲದೆ, ಅವರಿಗೆ ಈ ಹಾಡನ್ನು ಅರ್ಪಣೆ ಮಾಡಲಾಗಿರುವುದು ಈ ಹಾಡಿನ ವಿಶೇಷ. ಸಿಂಪಲ್ ಸುನಿ ಬರೆದ ವಾರೆ ವಾರೆ ವಾ...ಎಂಬ ಹಾಡನ್ನು ರಾಜೇಶ್ ಕೃಷ್ಣನ್, ನಿರ್ದೇಶಕ ಕಂ ನಟ ಸ್ವಾಮಿ ಸಾಹಿತ್ಯ ಬರೆದಿರುವ ಓಲಾಡ್ ಮಗ ಓಲಾಡ್....ಹಾಡನ್ನು ನವೀನ್ ಸಜ್ಜು, ಭರ್ಜರಿ ಚೇತನ್ ರಚನೆಯ ಮತ್ತೊಂದು ಗೀತೆಯನ್ನು ಜೋಗಿ ಪ್ರೇಮ್ ಹಾಡಿದ್ದಾರೆ.
ಚಿತ್ರಕ್ಕೆ ಕಥೆ, ಚಿತ್ರಕಥೆ ಬರೆದು ನಿರ್ದೇಶನದ ಜೊತೆಗೆ ಪ್ರಮುಖ ಪಾತ್ರವನ್ನು ವೈ.ಬಿ.ಎನ್. ಸ್ವಾಮಿ ನಿಭಾಯಿಸಿದ್ದಾರೆ. ಲಕ್ಷ್ಯ ಶೆಟ್ಟಿ, ಪ್ರಮೋದ್ ಶೆಟ್ಟಿ, ರಘು ಪಾಂಡವೇಶ್ವರ್, ಮಿಮಿಕ್ರಿ ದಯಾನಂದ್, ತೇಜಸ್ವಿನಿ ಪ್ರಕಾಶ್, ವಿದ್ಯಾಮೂರ್ತಿ, ವೀಣಾ ಸುಂದರ್ ಹಾಗೂ ಇತರರು ಚಿತ್ರದ ತಾರಾಗಣದಲ್ಲಿದ್ದಾರೆ. 'ಧೀರನ್' ಚಿತ್ರ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದ್ದು ಶೀಘ್ರವೇ ಸೆನ್ಸಾರ್ ಅನುಮತಿ ಪಡೆಯಲಿದೆ. ಚಿತ್ರಕ್ಕೆ ಮಾಸ್ತಿ, ಖಡಕ್ ಸಂಭಾಷಣೆ ರಚಿಸಿದ್ದಾರೆ.
ಧೀರನ್ ಚಿತ್ರಕ್ಕೆ ಸಂದೀಪ್ ಹೊನ್ನಾಳಿ ಛಾಯಾಗ್ರಹಣ, ರಘು. ಎನ್ ಸಂಕಲನ, ಕಲೈ ಹಾಗೂ ಮನು ನೃತ್ಯ, ಸಾಹಸವನ್ನು ಚೇತನ್ ಡಿಸೋಜ ಒದಗಿಸಿದ್ದಾರೆ. ನಟನೆ ಹಾಗೂ ನಿರ್ದೇಶನ ಕೂಡಾ ಮಾಡುತ್ತಿರುವುದರಿಂದ ವೈ.ಬಿ.ಎನ್. ಸ್ವಾಮಿ, ನಿರ್ದೇಶಕರ ತಂಡದಲ್ಲಿ ಪ್ರವೀಣ್ ಚಿದಾನಂದ್, ಹೇಮಂತ್ ಗೌಡ ಡಿ.ಎ, ವಿಶ್ವಾಸ್ ಅಂಜಲ್ ಹಾಗೂ ಮಂಜೂರಾಜ್ ಅವರ ನೆರವು ಪಡೆದಿದ್ದಾರೆ.
