’ರತ್ನಮಂಜರಿ’ಯನ್ನ ’ಮೂಕವಿಸ್ಮಿತ’ ಮಾಡಿ ಕಾರ್ಮೋಡ ಸರಿಸುತ್ತಾ? :ಯಾರ ನಟನೆಗೆ ಫಿದಾ ಆಗ್ತಾನೆ ವೀಕ್ಷಕ

ಈ ವಾರ ಕನ್ನಡದ ಮೂರು ಸಿನಿಮಾಗಳು ಬಿಡುಗಡೆಯಾಗುತ್ತಿವೆ. ರಿಲೀಸ್ ಆಗುತ್ತಿರುವುದು ಮೂರು ಸಿನಿಮಾ ಆದರೂ ಏಳು ನಾಯಕಿಯರ, ಮೂವರು ನಾಯಕರ ಅದೃಷ್ಟ ಪರೀಕ್ಷೆ ನಡೆಯುತ್ತಿದೆ.

ರತ್ನ ಮಂಜರಿ

ಅನಿವಾಸಿ ಭಾರತೀಯರು ಸೇರಿ ನಿರ್ಮಿಸಿರುವ ‘ರತ್ನ ಮಂಜರಿ’ ಈ ವಾರ ಬಿಡುಗಡೆಯಾಗುತ್ತಿದೆ. ಡೆನ್ಮಾರ್ಕ್ ನಿವಾಸಿ ಪ್ರಸಿದ್ಧ್​ ಈ ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ. ಚಿತ್ರದ ಮೂವರು ನಾಯಕಿಯರಲ್ಲಿ ಅಖಿಲಾ ಪ್ರಕಾಶ್ , ಪಲ್ಲವಿ ರಾಜ್ ಈ ಮುನ್ನ ಕೆಲವೊಂದು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಆದರೆ, ಮುಂಬೈ ಹುಡುಗಿ ಶ್ರದ್ಧಾ ಸಾಲಿಯನ್​​ಗೆ ಇದು ಮೊದಲ ಸಿನಿಮಾ. ಹಾಗೇ ಚಿತ್ರದ ಹೀರೋ ರಾಜ್ ಚರಣ್​​​​​ಗೂ ಇದು ಮೊದಲ ಸಿನಿಮಾ. ಈ ಚಿತ್ರದ ನಿರ್ಮಾಪಕರು ಕೂಡಾ ಹೊಸಬರು.

'ರತ್ನಮಂಜರಿ'

ಶರಾವತಿ ಫಿಲಮ್ಸ್​​​​ ಬ್ಯಾನರ್​​​​ ಅಡಿ ಸಂದೀಪ್ ಕುಮಾರ್, ಡಾ.ನವೀನ್ ಕೃಷ್ಣ ಹಾಗೂ ನಟರಾಜ ಹಳೇಬೀಡು ಸಿನಿಮಾವನ್ನು ನಿರ್ಮಿಸಿದ್ದಾರೆ. ಅಮೆರಿಕದಲ್ಲಿ ನಡೆದ ನೈಜ ಘಟನೆಯೊಂದಕ್ಕೆ ಕರ್ನಾಟಕದ ಕನೆಕ್ಷನ್ ಮಾಡಿ ಚಿತ್ರಕಥೆ ಬರೆಯಲಾಗಿದೆ. ಇದೊಂದು ಸಸ್ಪೆನ್ಸ್ ಥ್ರಿಲ್ಲರ್ ಸಿನಿಮಾ. ಅಮೆರಿಕ ಹಾಗೂ ಕರ್ನಾಟಕದ ಕೆಲವೊಂದು ಸುಂದರ ಸ್ಥಳಗಳಲ್ಲಿ ಚಿತ್ರೀಕರಣ ಮಾಡಲಾಗಿದೆ. ಪ್ರೀತಂ ಮತ್ತು ಕಿಟ್ಟಿ ಛಾಯಾಗ್ರಹಣ, ಹರ್ಷವರ್ಧನ ರಾಜ್ ಸಂಗೀತ ಸಂಯೋಜನೆ, ಪವನ್ ರಾಮ್ ಶೆಟ್ಟಿ ಸಂಕಲನ, ವಿಕ್ರಮ್ ಮೋರ್ ಸಾಹಸ ನಿರ್ದೇಶನ ಚಿತ್ರಕ್ಕಿದೆ.

ಮೂಕ ವಿಸ್ಮಿತ

ಇದು ಕನ್ನಡ ಸಾಹಿತ್ಯ ಲೋಕದ ದಿಗ್ಗಜರಲ್ಲಿ ಒಬ್ಬರಾದ ಟಿ.ಪಿ. ಕೈಲಾಸಂ ನಾಟಕ ಆಧಾರಿತ ಸಿನಿಮಾ. ನಿರ್ದೇಶಕ ಗುರುದತ್ ಶ್ರೀಕಾಂತ್ ನಟನಾಗಿ ಮೊದಲ ಬಾರಿಗೆ ಮೂರು ವಿಭಿನ್ನ ಪಾತ್ರಗಳನ್ನು ನಿರ್ವಹಿಸಿದ್ದಾರೆ.

'ಮೂಕ ವಿಸ್ಮಿತ' ನಟಿ ಶುಭರಕ್ಷ

'ಮೂಕ ವಿಸ್ಮಿತ' ನಾಯಕ ಗುರುದತ್ ಶ್ರೀಕಾಂತ್

'ಮೂಕ ವಿಸ್ಮಿತ' ನಟಿ ವಾಣಿಶ್ರೀ ಭಟ್

ಶುಭರಕ್ಷ ಹಾಗೂ ವಾಣಿಶ್ರೀ ಭಟ್ ಸಿನಿಮಾದಲ್ಲಿ ನಾಯಕಿಯರಾಗಿ ನಟಿಸಿದ್ದಾರೆ. 1920 ರಲ್ಲಿ ರಚಿಸಿದ ‘ಟೊಳ್ಳುಗಟ್ಟಿ’ ನಾಟಕ ‘ಮೂಕ ವಿಸ್ಮಿತ ಸಿನಿಮಾವಾಗಿ ಹೊರಬಂದಿದೆ. 1950 ರ ಕಾಲಘಟ್ಟಕ್ಕೆ ಸಂಪ್ರದಾಯ ಕುಟುಂಬದ ಹಿನ್ನೆಲೆಯನ್ನು ತರಲಾಗಿದೆ. ಜೈ ಗುರು ಕ್ರಿಯೇಷನ್ಸ್ ಬ್ಯಾನರ್ ಅಡಿ ಈ ಸಿನಿಮಾ ನಿರ್ಮಿಸಲಾಗಿದೆ. 90 ನಿಮಿಷದ ನಾಟಕವನ್ನು ಇಲ್ಲಿ 2 ಗಂಟೆ ಅವಧಿಯಲ್ಲಿ ಹೇಳಲಾಗಿದೆ. ಸಂದೀಪ್ ಮಲಾನಿ ಬ್ರಾಹ್ಮಣ ಕುಟುಂಬದ ಸಿಟ್ಟು, ಅಹಂಕಾರ ಇರುವ ವ್ಯಕ್ತಿ ಪಾತ್ರದಲ್ಲಿ ನಟಿಸಿದ್ದಾರೆ. ಚಂದ್ರಕೀರ್ತಿ, ಪುಷ್ಪ ರಾಘವೇಂದ್ರ, ಶಿಲ್ಪಾ ಭಾಗವತರ್, ಚಿದಾನಂದ್ ಕುಲಕರ್ಣಿ, ಡಿ. ಶ್ರೀಕಾಂತ್, ಸೂರಜ್ ಹಾಗೂ ಇತರರು ತಾರಾಗಣದಲ್ಲಿದ್ದಾರೆ. ಡಾ.ಚಿನ್ಮಯ್​ ಎಂ. ರಾವ್ ಸಂಗೀತ, ಸಂತೋಷ್ ಆರ್. ಚಾವ್ಲ ಸಂಕಲನ, ಸಿದ್ದು ಬಿ.ಎಸ್​​. ಛಾಯಾಗ್ರಹಣ ಸಿನಿಮಾಗೆ ಇದೆ.

ಕಾರ್ಮೋಡ ಸರಿದು

ಕರ್ನಾಟಕದ ಅನೇಕ ಪ್ರಸಿದ್ಧ ಪ್ರವಾಸಿ ತಾಣಗಳಲ್ಲಿ ಕುದುರೆಮುಖ ಸಹ ಒಂದು. ನೀವು ಮಳೆಗಾಲದಲ್ಲಿ ಕುದುರೆಮುಖವನ್ನು ನೋಡಬೇಕು ಅಂತಿದ್ದರೆ 'ಕಾರ್ಮೋಡ ಸರಿದು' ಸಿನಿಮಾವನ್ನು ಆಯ್ಕೆ ಮಾಡಿಕೊಳ್ಳಿ. ಕುದುರೆಮುಖ ಟಾಕೀಸ್ ಬ್ಯಾನರ್​ ಅಡಿ ಈ ಸಿನಿಮಾ ಸಿದ್ಧವಾಗಿದೆ. ಚಿತ್ರದ ನಟ ಮಂಜು ರಾಜಣ್ಣ ಅವರೇ ಚಿತ್ರವನ್ನು ನಿರ್ಮಿಸಿದ್ದಾರೆ. ಪಿ.ಎಸ್​​​​​​. ಕುಮಾರ್ ಕಥೆ, ಚಿತ್ರಕಥೆ ಬರೆದು ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಚಿತ್ರಕ್ಕೆ ಸತೀಶ್ ಬಾಬು ಸಂಗೀತ, ಅರುಣ್ ಸುರೇಶ್ ಛಾಯಾಗ್ರಹಣ, ಅಮರನಾಥ್ ಸಂಭಾಷಣೆ ಇದೆ. ಡಾ ವಿ. ನಾಗೇಂದ್ರ ಪ್ರಸಾದ್ ಹಾಗೂ ಕಿರಣ್ ಚಿತ್ರದ ಹಾಡುಗಳನ್ನು ರಚಿಸಿದ್ದಾರೆ. ಅದ್ವಿತಿ ಶೆಟ್ಟಿ ಈ ಚಿತ್ರದ ಮೂಲಕ ಪೂರ್ಣ ಪ್ರಮಾಣದ ನಾಯಕಿ ಆಗಿ ಡಾಕ್ಟರ್ ಪಾತ್ರದಲ್ಲಿ ನಟಿಸಿದ್ದಾರೆ. ದಿವ್ಯಶ್ರೀ, ಶ್ರೀಧರ್, ಮಾಸ್ಟರ್ ಹೇಮಂತ್ ಹಾಗೂ ಇತರರು ತಾರಾಗಣದಲ್ಲಿದ್ದಾರೆ.

'ಕಾಮೋಡ ಸರಿದು'ನಾಯಕ ಮಂಜುರಾಜಣ್ಣ

'ಕಾಮೋಡ ಸರಿದು' ನಾಯಕಿ ಅದ್ವಿತಿ ಶೆಟ್ಟಿ