ಕಳೆದ 30 ವರ್ಷಗಳಿಂದ ಸಿನಿಮಾ ಪತ್ರಿಕಾಗೋಷ್ಠಿಗಳಿಗೆ ಹಾಗೂ ಸಮಾರಂಭಗಳಿಗೆ ಸಾಕ್ಷಿಯಾಗಿದ್ದ ಗ್ರೀನ್ಹೌಸ್ ಇಂದು ಮುಗಿದ ಅಧ್ಯಾಯವಾಗಿದೆ. ಈ ಸ್ಥಳ ಗಾಂಧಿನಗರದ ತ್ರಿಭುವನ್ ಹಾಗೂ ಕೈಲಾಶ್ ಚಿತ್ರಮಂದಿರದ ಪಕ್ಕದ ಓಣಿಯಲ್ಲಿತ್ತು.
ಡಾ. ರಾಜ್ಕುಮಾರ್ ಸಂಬಂಧಿಗಳಾದ ಶ್ರೀ ವಾಸು ಹಾಗೂ ಸಹೋದರರು ನಡೆಸಿಕೊಂಡು ಬಂದಿದ್ದ ಈ ಗ್ರೀನ್ಹೌಸ್ ಉದ್ಘಾಟನೆ ಮಾಡಿದ್ದೇ ಡಾ. ರಾಜ್ಕುಮಾರ್ ಹಾಗೂ ಪಾರ್ವತಮ್ಮ ರಾಜಕುಮಾರ್. ಆರ್ಥಿಕ ಹೊಡೆತವೇ ಈ ನಿರ್ಧಾರಕ್ಕೆ ಕಾರಣ ಎನ್ನಲಾಗಿದೆ. ಬೇರೊಂದು ಸ್ಥಳದಲ್ಲಿ ‘ಗ್ರೀನ್ಹೌಸ್‘ ಹೆಸರಿನಲ್ಲೇ ಮತ್ತೊಂದು ರೆಸ್ಟೋರೆಂಟ್ ತೆರೆಯಬೇಕು ಎಂಬುದು ವಾಸು ಅವರ ಆಸೆಯಂತೆ. ಗ್ರೀನ್ ಹೌಸ್ ಸಹೋದರರು ಎಂದೇ ಕರೆಸಿಕೊಳ್ಳುವ ವಾಸು, ರಾಮು, ಉಮೇಶ್, ಗೋವಿಂದರಾಜ್ ಹಾಗೂ ಲಿಂಗರಾಜ್ ಈ ಬಾರ್ ಹಾಗೂ ರೆಸ್ಟೋರೆಂಟ್ ಹಕ್ಕನ್ನು ಬೇರೆಯವರಿಗೆ ವರ್ಗಾಯಿಸಿದ್ದಾರೆ. ಗ್ರೀನ್ಹೌಸ್ನ ಕೆಳ ಅಂತಸ್ಥಿನ ಸ್ಥಳವೇ ಚಿತ್ರರಂಗದ ವ್ಯಕ್ತಿಗಳ ಜನಪ್ರಿಯ ಸ್ಥಳ. 2015 ನವೆಂಬರ್ ತಿಂಗಳಿನಲ್ಲಿ ಸಿಲ್ವರ್ ಜ್ಯೂಬ್ಲಿ ಆಚರಿಸಿಕೊಂಡಿತ್ತು.
2015 ರಲ್ಲೇ ಸುಮಾರು 1,500 ಸಿನಿಮಾ ಪತ್ರಿಕಾಗೋಷ್ಠಿಗಳು ಈ ಗ್ರೀನ್ಹೌಸ್ನಲ್ಲಿ ನಡೆದಿತ್ತು. ಕೇವಲ ಪತ್ರಿಕಾಗೋಷ್ಠಿ ಮಾತ್ರವಲ್ಲದೇ ಆಡಿಯೋ ಬಿಡುಗಡೆ, ಟೀಸರ್, ಟ್ರೇಲರ್ ಬಿಡುಗಡೆ, ಕಾರ್ಯಾಗಾರ, ‘ಮುಂಗಾರು ಮಳೆ' ಯಂತ ಯಶಸ್ಸು ಕಂಡ ಸಿನಿಮಾ ಮೀಟಿಂಗ್ ಹಾಗೂ ನೂರಾರು ಕಲಾವಿದರು ಈ ಗ್ರೀನ್ಹೌಸ್ಗೆ ಬಂದು ತಮ್ಮನ್ನು ಪರಿಚಯ ಮಾಡಿಕೊಂಡಿರುವ ಉದಾಹರಣೆ ಇದೆ. ಇಂತಹ ಹಸಿರು ವಾತಾವರಣದಲ್ಲಿ ಕಾಲ ಕಳೆಯಲು ಹಾಗೂ ಕಾರ್ಯಕ್ರಮ ನಡೆಸಲು ಈ ಗ್ರೀನ್ಹೌಸ್ ತವರು ಮನೆಯಿದ್ದಂತೆ ಎಂದು ಎಷ್ಟೋ ಕಲಾವಿದರು ಹೇಳಿದ್ದುಂಟು. ಈ ಸ್ಥಳದಲ್ಲಿ ಹೆಚ್ಚು ಸುದ್ದಿಗೋಷ್ಠಿ ನಡೆಸಿದ್ದು, ಸಿನಿಮಾ ಪ್ರಚಾರಕರ್ತ ಸುಧೀಂದ್ರ ವೆಂಕಟೇಶ್ ಅವರ ಶ್ರೀ ರಾಘವೇಂದ್ರ ಚಿತ್ರವಾಣಿ. ಈ ಸ್ಥಳ ಈಗ ಮುಚ್ಚುತ್ತಿರುವುದು ನೋವಿನ ಸಂಗತಿ ಎಂದು ಅವರೂ ಕೂಡಾ ಬೇಸರ ವ್ಯಕ್ತಪಡಿಸಿದ್ದಾರೆ.
