ಕನ್ನಡ ಚಿತ್ರರಂಗದ ಬಗ್ಗೆ ಮಾತನಾಡಲು ಪ್ರಶಾಂತ್ ಸಂಬರಗಿ ಯಾರು, ಅವರೇನು ನಿರ್ಮಾಪಕನ ಇಲ್ಲ ವಿತರಕನ ಎಂದು ವಾಣಿಜ್ಯ ಮಂಡಳಿ ಕಾರ್ಯದರ್ಶಿಗಳಾದ ಎನ್ ಎಮ್ ಸುರೇಶ್ ಹಾಗೂ ಎ ಗಣೇಶ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಸ್ಯಾಂಡಲ್ ವುಡ್ನಲ್ಲಿ ಡ್ರಗ್ಸ್ ದಂಧೆ ಇದೆ ಎಂದು ಆರೋಪ ಮಾಡುವ ಪ್ರಶಾಂತ್ ಸಂಬರಗಿ ತಾಕತ್ ಇದ್ರೆ ದಾಖಲೆ ಸಮೇತ ನಮ್ಮ ಮುಂದೆ ಬರಲಿ ಎಂದು ವಿತರಕ ವಲಯದ ಕಾರ್ಯದರ್ಶಿ ಎ ಗಣೇಶ್ ಪ್ರಶಾಂತ್ ಸಂಬರಗಿಗೆ ಓಪನ್ ಚಾಲೆಂಜ್ ಹಾಕಿದ್ದಾರೆ. ಅಲ್ಲದೆ ಇದೇ ವೇಳೆ ಮಾತನಾಡಿದ ನಿರ್ಮಾಪಕರ ವಲಯದ ಕಾರ್ಯದರ್ಶಿ
ಎನ್ ಎಮ್ ಸುರೇಶ್, ಪ್ರಶಾಂತ್ ಸಂಬರಗಿ ಕೆಲವು ನಟರ ಚೇಲಾ. ಬಕೆಟ್ ಕೆಲಸ ಮಾಡಿಕೊಂಡು ಜೀವನ ಮಾಡ್ತಿದ್ದಾನೆ ಎಂದು ಏಕವಚನದಲ್ಲೇ ಆಕ್ರೋಶ ವ್ಯಕ್ತಪಡಿಸಿದರು.
ಸಾಮಾಜಿಕ ಕಾರ್ಯಕರ್ತ ಆಂತ ಹೇಳುವ ಪ್ರಶಾಂತ್ ಯಾರಿಗಾದ್ರು ನೆರವು ನೀಡಿದ್ದಾನಾ? ವೈಯಕ್ತಿಕವಾಗಿ ವೈಭವೀಕರಣ ಮಾಡಿಕೊಳ್ಳುವ ಅವರು, ಚಿತ್ರರಂಗದ ಬಗ್ಗೆ ಮಾತಾಡೋಕೆ ಯಾರು? ಇದರ ಜೊತೆಗೆ ಇಂದ್ರಜಿತ್ ಲಂಕೇಶ್ ಮಾಡಿರುವ ಆರೋಪಕ್ಕೆ ಸೂಕ್ತ ದಾಖಲೆ ಇಲ್ಲ ಎಂದು ಸಿಸಿಬಿ ಹೇಳಿದೆ. ಇವರೆಲ್ಲ ಚಿತ್ರರಂಗಕ್ಕೆ ಮಸಿ ಬಳಿಯುವ ಕೆಲಸ ಮಾಡ್ತಿದ್ದಾರೆ ಎಂದು ಪ್ರಶಾಂತ್ ಸಂಬರಗಿ ಹಾಗು ಇಂದ್ರಜಿತ್ ಲಂಕೇಶ್ ವಿರುದ್ದ ಆಕ್ರೋಶ ವ್ಯಕ್ತಪಡಿಸಿದರು.
