ಕನ್ನಡ ಚಿತ್ರರಂಗದ ಅತ್ಯಂತ ಹಿರಿಯ ಸಿನಿಮಾ ಪಿಆರ್ಒ ಸಂಸ್ಥೆ ‘ಶ್ರೀ ರಾಘವೇಂದ್ರ ಚಿತ್ರವಾಣಿ’ ಕಳೆದ 43 ವರ್ಷಗಳಿಂದ ಸೇವೆ ಸಲ್ಲಿಸುತ್ತಾ ಬಂದಿದೆ. ಈ ಬಾರಿಯ19 ನೇ ವರ್ಷದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಎಲ್ಲರ ಗಮನ ಸೆಳೆದದ್ದು ಬೆಂಗಳೂರಿನ ಹನುಮಂತ ನಗರದ ಎನ್ಐಸಿಟಿ ಕಾಲೇಜಿನಲ್ಲಿ ದ್ವಿತೀಯ ಪಿಯುಸಿ ಓದುತ್ತಿರುವ ಪವನ್ ವೆಂಕಟೇಶ್ ಎಂಬ ಯುವಕ ತಯಾರಿಸಿರುವ ‘ಸುಧೀಂದ್ರ ಸಿನಿ ಪಯಣ’ ಎಂಬ ಸಾಕ್ಷ್ಯ ಚಿತ್ರ.
ಸುಮಾರು 31 ನಿಮಿಷ ಅವಧಿಯ ಈ ಸಾಕ್ಷ್ಯಚಿತ್ರವನ್ನು ನೋಡಿ ಹಲವಾರು ಪ್ರಸಿದ್ಧ ವ್ಯಕ್ತಿಗಳು ತಮ್ಮ ಅನಿಸಿಕೆ ವ್ಯಕ್ತಪಡಿಸಿದ್ದಾರೆ. ಬಹುಶಃ ಭಾರತೀಯ ಚಿತ್ರರಂಗದಲ್ಲಿ ಇದುವರೆಗೂ ಯಾವುದೇ ಸಿನಿಮಾ ಪಿಆರ್ಒ ಸಂಸ್ಥೆಯ ಬಗ್ಗೆ ಸಾಕ್ಷ್ಯಚಿತ್ರ ತಯಾರಾಗಿಲ್ಲ ಎನ್ನಬಹುದು. ‘ಶ್ರೀ ರಾಘವೇಂದ್ರ ಚಿತ್ರವಾಣಿ’ ಸುಮಾರು 2000 ಸಿನಿಮಾಗಳಿಗೆ ಕಾರ್ಯ ನಿರ್ವಹಿಸಿದೆ. ಈ ಸಾಕ್ಷ್ಯಚಿತ್ರದ ಮೊದಲ ಆಕರ್ಷಣೆಯೇ ಡಾ. ವಿಷ್ಣುವರ್ಧನ್ ಅವರು ದಿವಂಗತ ಡಿ.ವಿ. ಸುಧೀಂದ್ರ ಅವರ ಕುರಿತು ರಚಿಸಿದ ಗೀತೆ. ಈ ಗೀತೆಗೆ ಸಂಗೀತ ನಿರ್ದೇಶಕ ಶ್ರೀಧರ್ ಸಂಭ್ರಮ್ ರಾಗ ಸಂಯೋಜನೆ ಮಾಡಿದ್ದಾರೆ, ಅಜಯ್ ವಾರಿಯರ್ ಈ ಗೀತೆಯನ್ನು ಹಾಡಿದ್ದಾರೆ. ಖ್ಯಾತ ಕಂಠದಾನ ಕಲಾವಿದ ಸುದರ್ಶನ್, ಈ ಸಾಕ್ಷ್ಯಚಿತ್ರಕ್ಕೆ ಮಾತುಗಳನ್ನು ಜೋಡಿಸಿದ್ದಾರೆ. ವಿ.ಸಿ.ಎನ್. ಮಂಜುನಾಥ್ ಅವರ ಕ್ಯಾಮರಾ ಕೈಚಳಕ ಈ ಸಾಕ್ಷ್ಯಚಿತ್ರಕ್ಕಿದೆ. ಸ್ನೇಹಿತರ ಮಲ್ಲೇಶ್ ಹಾಗೂ ಭರತ್.ಕೆ ಒಂದು ತಿಂಗಳ ಅವಧಿಯಲ್ಲಿ ಹೊಂದಿಸಿದ ಮಾಹಿತಿಯನ್ನು ಪವನ್ ವೆಂಕಟೇಶ್ 15 ದಿನಗಳಲ್ಲಿ ಸಾಕ್ಷ್ಯಚಿತ್ರವನ್ನಾಗಿ ಸಿದ್ಧಪಡಿಸಿದ್ದಾರೆ.
ಮಂತ್ರಾಲಯದ ಶ್ರೀ ಸುಬುದೇಂದ್ರ ಶ್ರೀ ಪಾದಂಗಳವರು, ಪ್ರೊ. ಬರಗೂರು ರಾಮಚಂದ್ರಪ್ಪ, ಹೆಚ್.ಆರ್. ಭಾರ್ಗವ, ದ್ವಾರಕೀಶ್, ಉಪೇಂದ್ರ, ಶಿವರಾಜ್ಕುಮಾರ್, ದರ್ಶನ್, ಪುನೀತ್ ರಾಜಕುಮಾರ್, ಡಾ ವಿಜಯಮ್ಮ, ರಾಘವೇಂದ್ರ ರಾಜಕುಮಾರ್, ಎಸ್.ಕೆ. ಭಗವಾನ್, ಲಹರಿ ವೇಲು, ಕೆ.ಸಿ.ಎನ್.ಚಂದ್ರಶೇಖರ್, ಎಸ್.ಆರ್. ರಘುನಾಥ್, ಸುಧೀಂದ್ರ ಅವರ ಪತ್ನಿ ಆರ್. ಪದ್ಮ, ಮಗಳು ಶಿಲ್ಪಾ, ಅಳಿಯ ಶ್ರೀಧರ್ ಜಮದಗ್ನಿ, ಸುಧೀಂದ್ರ ವೆಂಕಟೇಶ್ , ಸುಧೀಂದ್ರ ಅವರ ಪುತ್ರ ಸುನಿಲ್, ಡಿ.ಜಿ. ವಾಸುದೇವ್ ಈ ಸಾಕ್ಷ್ಯಚಿತ್ರ ಬಿಡುಗಡೆ ವೇಳೆ ಹಾಜರಿದ್ದರು.
