2019 ಮುಗಿದುಯುತ್ತಾ ಬರುತ್ತಿದೆ. ಹೊಸ ವರುಷಕ್ಕೆ ಕೇವಲ ಒಂದು ವಾರಗಳಷ್ಟೇ ಬಾಕಿ ಉಳಿದಿದೆ. ಈ ವರುಷ ಕಿರುತೆರೆ ಪ್ರಿಯರಿಗೆ ಹಬ್ಬವೋ ಹಬ್ಬ. ಯಾಕೆಂದರೆ ಈ ವರುಷ ಬರೋಬ್ಬರಿ 25 ಧಾರಾವಾಹಿಗಳು ತೆರೆ ಕಂಡಿವೆ. ಇದರಲ್ಲಿ ಮೂರು ಧಾರಾವಾಹಿಗಳು ಟಿಆರ್ಪಿ ಸಮಸ್ಯೆಯಿಂದಾಗಿ ಪ್ರಸಾರ ನಿಲ್ಲಿಸಿವೆ.
ಇದರ ಜೊತೆಗೆ ಬೇರೆ ಧಾರಾವಾಹಿಗಳು ಕೂಡಾ ಮುಕ್ತಾಯಗೊಂಡಿವೆ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ 2014 ರಲ್ಲಿ ಆರಂಭವಾದ ಕುಲವಧು ಧಾರಾವಾಹಿ ಈ ವರುಷ ಮುಕ್ತಾಯಗೊಂಡಿದೆ. ದೀಪಿಕಾ, ಶಿಶಿರ್ ಶಾಸ್ತ್ರಿ, ಅಮೃತಾ ರಾಮಮೂರ್ತಿ, ಸೂರಜ್ ಮುಖ್ಯ ಪಾತ್ರಧಾರಿಗಳಾಗಿ ನಟಿಸಿರುವ ಈ ಧಾರಾವಾಹಿ ಬರೋಬ್ಬರಿ 1590 ಸಂಚಿಕೆಗಳನ್ನು ಪೂರೈಸಿತ್ತು.
2017 ರಲ್ಲಿ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಶುರುವಾದ 'ಪದ್ಮಾವತಿ' ಧಾರಾವಾಹಿಯೂ ಕೂಡಾ ಪ್ರಸಾರ ನಿಲ್ಲಿಸಿದೆ. ದೀಪ್ತಿ ಮನ್ನೆ, ತ್ರಿವಿಕ್ರಮ್ ನಾಯಕ ನಾಯಕಿಯಾಗಿ ನಟಿಸಿರುವ ಈ ಧಾರಾವಾಹಿ 590 ಸಂಚಿಕೆ ಪೂರೈಸಿ ಪ್ರಸಾರ ನಿಲ್ಲಿಸಿದೆ.
ಇದರ ಜೊತೆಗೆ 2017 ರಲ್ಲಿ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಆರಂಭವಾದ ರಾಧಾ ರಮಣ ಧಾರಾವಾಹಿಯು ಕೂಡಾ ಪ್ರಸಕ್ತ ವರ್ಷ ಪ್ರಸಾರ ನಿಲ್ಲಿಸಿದೆ. ಶ್ವೇತಾ ಪ್ರದೀಪ್ ರಾಧಾಳಾಗಿ ನಟಿಸಿದ್ದರೆ, ಸ್ಕಂದ ಅಶೋಕ್ ರಮಣನಾಗಿ ಮಿಂಚಿದ್ದರು. ಅದ್ಭುತ ಕತೆಯನ್ನು ಹೊಂದಿರುವ ಈ ಧಾರಾವಾಹಿಯಲ್ಲಿ ರಾಧಾ ರಮಣರ ಮಧಿರ ಪ್ರೇಮ ಸಲ್ಲಾಪಕ್ಕೆ ವೀಕ್ಷಕರು ಮಾರು ಹೋಗಿದ್ದರು. 713 ಸಂಚಿಕೆಗಳು ಪ್ರಸಾರ ವಾಗಿದ್ದು ಇದ್ದಕ್ಕಿದ್ದಂತೆ ಧಾರಾವಾಹಿ ನಿಂತಿರುವುದು ರಾಧಾರಮಣ ಅಭಿಮಾನಿಗಳಿಗೆ ಬೇಸರವನ್ನು ತಂದಿತ್ತು.
ಇನ್ನು ಜೀ ಕನ್ನಡದಲ್ಲಿ 2017 ರಲ್ಲಿ ಆರಂಭವಾದಂತಹ ಜೋಡಿಹಕ್ಕಿ ಧಾರಾವಾಹಿಯು ಕೂಡಾ ಈ ವರುಷ ಮುಕ್ತಾಯಗೊಂಡಿದೆ. ನಾಯಕ ಪೈಲ್ವಾನ್ ರಾಮಣ್ಣನಾಗಿ ತಾಂಡವ್ ಅವರು ಅಭಿನಯಿಸಿದ್ದರೆ, ನಾಯಕಿ ಜಾನಕಿ ಟೀಚರ್ ಆಗಿ ಚೈತ್ರಾ ನಟಿಸಿರುವ ಜೋಡಿ ಹಕ್ಕಿಯು 612 ಸಂಚಿಕೆ ಪೂರೈಸಿತ್ತು.
ಕಲರ್ಸ್ ಸೂಪರ್ ವಾಹಿನಿಯಲ್ಲಿ ಕಳೆದ ವರುಷ ಆರಂಭವಾದ ರಾಜಾ ರಾಣಿ ಧಾರಾವಾಹಿಯು ಈ ವರುಷ ಅಂತ್ಯಗೊಂಡಿದೆ. ಕೊಡಗಿನ ಕುವರ ತಾರಕ್ ಪೊನ್ನಪ್ಪ ನಾಯಕನಾಗಿ ಕಾಣಿಸಿಕೊಂಡಿದ್ದರೆ ನಾಯಕಿಯಾಗಿ ಚಂದನಾ ಅಭಿನಯಿಸಿದ್ದರು. ಕೇವಲ 363 ಸಂಚಿಕೆಗಳನ್ನು ಪೂರೈಸಿರುವ ಈ ಧಾರಾವಾಹಿಯು ಕೂಡಾ ಮುಕ್ತಾಯಗೊಂಡಿದೆ.
ಇದರ ಜೊತೆಗೆ ಶನಿ, ಆತ್ಮಬಂಧನ, ಅಮೃತವರ್ಷಿಣಿ, ಮನೆಯೇ ಮಂತ್ರಾಲಯ, ಮಹಾದೇವಿ, ನನ್ ಹೆಂಡ್ತಿ ಎಂಬಿಬಿಎಸ್, ಮಹಾರಾಣಿ, ಮೌನರಾಗ, ಬಿಳಿ ಹೆಂಡ್ತಿ, ಕಿನ್ನರಿ, ಕೃಷ್ಣ ತುಳಸಿ ಧಾರಾವಾಹಿಗಳು ಕೂಡಾ ಪ್ರಸಾರ ನಿಲ್ಲಿಸಿದೆ.
