ಸ್ಯಾಂಡಲ್ವುಡ್ನ ಕನಸುಗಾರ ಪ್ರೇಮಲೋಕದ ಜನಕ ಕ್ರೇಜಿಸ್ಟಾರ್ ವಿ. ರವಿಚಂದ್ರನ್ ನಮ್ಮಪ್ಪನಾಣೆ ಮತ್ತೆ ಪ್ರೇಮಲೋಕದಂತ ಸಿನಿಮಾವನ್ನು ಮಾಡುತ್ತೇನೆ ಎಂದು ಹೇಳಿದ್ದಾರೆ.
ರವಿಚಂದ್ರನ್ಗೆ ಸಿ.ಎಂ.ಆರ್ ಯುನಿವರ್ಸಿಟಿ ವತಿಯಿಂದ ಗೌರವ ಡಾಕ್ಟರೇಟ್ ಪ್ರಶಸ್ತಿ ಪ್ರದಾನ ಮಾಡಲಾಗಿದೆ. ಬೆಂಗಳೂರಿನ ಯಲಹಂಕದ ಸಿ.ಎಂ.ಆರ್ ಕಾಲೇಜು ಆವರಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಡಿಸಿಎಂ ಅಶ್ವಥ್ ನಾರಾಯಣ್ ಅವರು ನಟ ರವಿಚಂದ್ರನ್ಗೆ ಡಾಕ್ಟರೇಟ್ ಪದವಿ ಪ್ರದಾನ ಮಾಡಿದರು. ಈ ವೇಳೆ ರವಿಚಂದ್ರನ್ ಪತ್ನಿ ಸುಮತಿ, ಮಗಳು ಗೀತಾಂಜಲಿ, ಅಳಿಯ ಅಜಯ್, ಮಕ್ಕಳಾದ ವಿಕ್ರಂ ಮತ್ತು ಮನೋರಂಜನ್ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು.
ಗೌರವ ಡಾಕ್ಟರೇಟ್ ಪ್ರಶಸ್ತಿ ಸ್ವೀಕರಿಸಿ ಮಾತಾನಡಿದ ಕ್ರೇಜಿಸ್ಟಾರ್, ಈ ಡಾಕ್ಟರೇಟ್ ನನ್ನ ತಂದೆಗೆ ಸಲ್ಲಬೇಕು, ಇವತ್ತಿನ ನನಗೆ ಹಳದಿ ಮತ್ತು ಕೆಂಪು ಉಡುಪು ಕೊಟ್ಟು ಮತ್ತೆ ನನ್ನನ್ನು ಕರ್ನಾಟಕದ ಮಡಿಲಿಗೆ ಹಾಕಿದ್ದಾರೆ. ಇಷ್ಟು ದಿನ ದಾರಿ ತಪ್ಪಿದ್ದೆ. ಈಗ ಈ ಪದವಿ ನನ್ನನ್ನು ಸರಿದಾರಿಗೆ ತಂದಿದೆ ಅನ್ನೋ ಭಾವ ನನ್ನಲ್ಲಿ ಮೂಡಿದೆ ಎಂದರು.
ಮುಂದಿನ ವರ್ಷ ಮತ್ತೊಂದು ಪ್ರೇಮಲೋಕ ಸೃಷ್ಟಿಯಾಗುತ್ತೆ. ಆದ್ರೆ ಆ ಹಳೆ ಹೆಸರನ್ನೇ ಇಟ್ಟು ಸಿನಿಮಾವನ್ನು ಮಾಡುವುದಿಲ್ಲ. ಬದಲಾಗಿ ಇನ್ನೊಂದು ಸಿನಿಮಾವನ್ನು ಪ್ರೇಮಲೋಕಕ್ಕಿಂತ ದೊಡ್ಡದಾಗಿ ಮಾಡುವೆ ಎಂದು ಹೇಳುತ್ತ, ರವಿಮಾಮ ಡಾಕ್ಟರೇಟ್ ಪಡೆದ ಖುಷಿ ಹಂಚಿಕೊಂಡರು.
