ಟಿಪಿ ಕೈಲಾಸಂ ಅವರ ನಾಟಕ ಆಧಾರಿತ ಸಿನಿಮಾ ’ಮೂಕವಿಸ್ಮಿತ’, ಮೇ 17 ರಂದು ರಾಜ್ಯಾದ್ಯಂತ ಬಿಡುಗಡೆಯಾಗಲಿದೆ.
ಇದು ಟಿ.ಪಿ.ಕೆ ಅವರ ಟೊಳ್ಳು ಗಟ್ಟಿ ನಾಟಕ ಆಧಾರಿತ ಸಿನಿಮಾ. ರಂಗಭೂಮಿ ಕಲಾವಿದ ಗುರುದತ್ ಶ್ರೀಕಾಂತ್ ಈ ಸಿನಿಮಾವನ್ನು ನಿರ್ದೇಶಿಸಿ ಪ್ರಮುಖ ಪಾತ್ರದಲ್ಲೂ ನಟಿಸಿದ್ದಾರೆ. ವಾಣಿಶ್ರೀ ಭಟ್ ಹಾಗೂ ಶುಭಾ ರಕ್ಷ ಈ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ರಂಗಭೂಮಿ ಕಲಾವಿದ ಹಾಗೂ ಪತ್ರಕರ್ತ ಮಾವಳ್ಳಿ ಕಾರ್ತಿಕ್‌ ಕೂಡಾ ಸಿನಿಮಾದಲ್ಲಿ ಪುಟ್ಟ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಬಹುಭಾಷಾ ನಟ ಸಂದೀಪ್ ಮಲಾನಿ ಕೂಡಾ ಚಿತ್ರದಲ್ಲಿದ್ದಾರೆ.
ಹೊಸಬರ ತಂಡವಾದರೂ ಸಿನಿಮಾದಲ್ಲಿ ಎಲ್ಲರಿಗೂ ಇಷ್ಟವಾಗುವ ಕಥೆ ಇದ್ದು ವಿಶಿಷ್ಟವಾದ ನಿರೂಪಣೆಯಿಂದ ಕೂಡಿದೆ ಎಂದು ಚಿತ್ರತಂಡ ಹೇಳಿದೆ. ಚಿತ್ರಕ್ಕೆ ಸೆನ್ಸಾರ್ ಮಂಡಳಿಯಿಂದ ’ಯು’ ಸರ್ಟಿಫಿಕೇಟ್ ಸಿಕ್ಕಿದೆ. ಚಿತ್ರದ ಕಥೆಗೆ ತಕ್ಕಂತೆ ಹಾಡುಗಳಿಗೆ ಸಂಗೀತ ನೀಡಿದ್ದು ಪ್ರೇಕ್ಷಕರ ಮನಮುಟ್ಟುವುದು ಖಂಡಿತ ಎಂದು ಸಂಗೀತ ನಿರ್ದೇಶಕ ಚಿನ್ಮಯ್ ಡಿ. ರಾವ್ ಭರವಸೆ ವ್ಯಕ್ತಪಡಿಸಿದ್ದಾರೆ. ಒಟ್ಟಿನಲ್ಲಿ ಸಿನಿಮಾ ಕನ್ನಡ ಪ್ರೇಕ್ಷಕರನ್ನ ಹೇಗೆ ಮೋಡಿ ಮಾಡಲಿದೆ ಎಂಬುದನ್ನು ಬಿಡುಗಡೆಯಾಗುವರೆಗೂ ಕಾದು ನೋಡಬೇಕು.
