ಎಷ್ಟೋ ಮಂದಿ ಸಾಕಷ್ಟು ನಿರೀಕ್ಷೆಗಳನ್ನು ಇಟ್ಟುಕೊಂಡು ಚಿತ್ರರಂಗಕ್ಕೆ ಬರುತ್ತಾರೆ. ಅದರೆ ಇಲ್ಲೊಂದು ತಂಡ 'ಟೊಳ್ಳು ನಿರೀಕ್ಷೆ ಗಟ್ಟಿ ಸಿನಿಮಾ' ಎಂಬ ಕುತೂಹಲಕಾರಿ ಟ್ಯಾಗ್ಲೈನ್ ಇಟ್ಟುಕೊಂಡು 'ಮೂಕವಿಸ್ಮಿತ' ಎಂಬ ಸಿನಿಮಾ ಮಾಡಿದೆ.
ಇಂದು ಚಿತ್ರದ ಆಡಿಯೋ ಬಿಡುಗಡೆಯಾಗಿದೆ. ನಗರದ ರೇಣುಕಾಂಬಾ ಸ್ಟುಡಿಯೋದಲ್ಲಿ ನಡೆದ ಆಡಿಯೋ ಬಿಡುಗಡೆ ಸಮಾರಂಭಕ್ಕೆ ಸಾಹಿತಿ ದೊಡ್ಡರಂಗೇಗೌಡ್ರು ಹಾಗೂ ಲಹರಿ ವೇಲು ಆಗಮಿಸಿ ಆಡಿಯೋ ಲಾಂಚ್ ಮಾಡಿ ಚಿತ್ರತಂಡಕ್ಕೆ ವಿಶ್ ಮಾಡಿದರು. ಟಿ.ಪಿ ಕೈಲಾಸಂ ಅವರ 'ಟೊಳ್ಳು ಕಥೆಗಳು' ಎಂಬ ನಾಟಕವನ್ನು ಸಿನಿಮಾ ಮಾಡಿರುವುದು ವಿಶೇಷ. ಚಿತ್ರಕ್ಕೆ ಗುರುದತ್ ಶ್ರೀಕಾಂತ್ ಚಿತ್ರಕಥೆ ಸಂಭಾಷಣೆ, ಸಾಹಿತ್ಯ ಬರೆದು ನಿರ್ದೇಶನದ ಜೊತೆಗೆ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರದಲ್ಲಿ ಮೂರು ಹಾಡುಗಳಿದ್ದು ಡಾ.ಚಿನ್ಮಯ್ ಸಂಗೀತ ನೀಡಿದ್ದಾರೆ.
ಚಿತ್ರದಲ್ಲಿ ಬಹು ದೊಡ್ಡ ತಾರಾಗಣವಿದ್ದು ಬಹುಭಾಷಾ ನಟ ಕನ್ನಡಿಗ ಸಂದೀಪ್ ಮಲಾನಿ, ಕಿರುತೆರೆ ನಟ ರಾಜೇಶ್ ಎಸ್. ರಾವ್ , ಶುಭಾರಕ್ಷಾ, ಪುಷ್ಪ ರಾಘವೇಂದ್ರ, ಪತ್ರಕರ್ತ ಮಾವಳ್ಳಿ ಕಾರ್ತಿಕ್ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಚಿತ್ರತಂಡ ಶೂಟಿಂಗ್ ಮುಗಿಸಿ ಪೋಸ್ಟ್ ಪ್ರೊಡಕ್ಷನ್ ಕೆಲಸದಲ್ಲಿ ಬ್ಯುಸಿಯಾಗಿದೆ. ಎಲ್ಲಾ ಅಂದುಕೊಂಡಂತೆ ಆದರೆ ಜೂನ್-ಜುಲೈನಲ್ಲಿ ಚಿತ್ರವನ್ನು ಬಿಡುಗಡೆ ಮಾಡಲು ಚಿತ್ರತಂಡ ಪ್ಲ್ಯಾನ್ ಮಾಡಿದೆ.
