2022ನೇ ವರ್ಷ ಕನ್ನಡ ಚಿತ್ರರಂಗಕ್ಕೆ ಲಕ್ಕಿ ಇಯರ್ ಆಗುವ ಸೂಚನೆ ಸಿಗುತ್ತಿದೆ. ಈ ವರ್ಷದ ಆರಂಭದಲ್ಲಿ ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡು ಬಂದ ಲವ್ ಮಾಕ್‌ಟೈಲ್ 2 ಸಿನಿಮಾ ಅಂದುಕೊಂಡಂತೆ ಹಿಟ್ ಆಗಿದೆ.
ಈ ಚಿತ್ರದ ಮೂಲಕ ನಿರ್ದೇಶಕನಾಗಿ ಡಾರ್ಲಿಂಗ್ ಕೃಷ್ಣ ಅವರಿಗೆ ಮತ್ತೊಂದು ಗೆಲುವು ಸಿಕ್ಕಿದೆ. ಈ ಚಿತ್ರವನ್ನು ಮಿಲನಾ ನಾಗರಾಜ್ ನಿರ್ಮಾಣ ಮಾಡಿದ್ದು, ಸಿನಿಮಾಗೆ ಈ ವರ್ಷ ದೊಡ್ಡ ಗೆಲುವು ಸಿಕ್ಕಿದೆ.
ಈ ಬಗ್ಗೆ ಚಿತ್ರತಂಡ ಸಂತೋಷ ಹಂಚಿಕೊಂಡಿದೆ. ಮೊದಲಿಗೆ ಮಾತನಾಡಿದ ನಟ-ನಿರ್ದೇಶಕ ಡಾರ್ಲಿಂಗ್ ಕೃಷ್ಣ ಲವ್ ಮಾಕ್‌ಟೈಲ್ 2 ಸಿನಿಮಾ ಸಕ್ಸಸ್ ಜರ್ನಿ ಬಗ್ಗೆ ಹಂಚಿಕೊಂಡರು. ಮೊದಲ ಲವ್‌ಮಾಕ್ ಟೈಲ್ ಸಿನಿಮಾ ಬಿಡುಗಡೆ ಮಾಡಿದಾಗ ಅಂತಂಹ ಒಳ್ಳೆ ಕಲೆಕ್ಷನ್ ಇರಲಿಲ್ಲ.
ಆದರೆ, ಲವ್ ಮಾಕ್‌ಟೈಲ್ 2 ಸಿನಿಮಾ ಉತ್ತರ ಕರ್ನಾಟಕದಿಂದ ಹಿಡಿದು, ಮೈಸೂರಿನವರೆಗೂ ಒಳ್ಳೆ ರೆಸ್ಪಾನ್ಸ್ ಸಿಕ್ಕಿದೆ. ಅದರಲ್ಲಿ ತೆಲುಗು ಸೆಂಟರ್ ಚಿತ್ರಮಂದಿರಗಳಲ್ಲಿ ಲವ್ ಮಾಕ್‌ಟೈಲ್ 2 ಸಿನಿಮಾಗೆ ಸಖತ್ ರೆಸ್ಪಾನ್ಸ್ ಸಿಗುತ್ತಿದೆ.
ಈ ಚಿತ್ರವನ್ನ ನಾನು ಗುರುವಾರದ ತನಕ ಪ್ರಮೋಷನ್ ಮಾಡಿದಷ್ಟೇ, ಶುಕ್ರವಾರದಿಂದ ನಾನು ಪ್ರಮೋಷನ್ ಮಾಡಲಿಲ್ಲ. ಸಿನಿಮಾ ಕಥೆ ಚೆನ್ನಾಗಿದ್ದರೆ ಸಿನಿಮಾವನ್ನ ಜನರು ಹೆಗಲ ಮೇಲೆ ಇಟ್ಟುಕೊಂಡು ಮೆರೆಸುತ್ತಾರೆ ಅನ್ನೋದಿಕ್ಕೆ ಲವ್ ಮಾಕ್‌ಟೈಲ್ 2 ಸಿನಿಮಾ ಸಾಕ್ಷಿ. ಮಲ್ಟಿಪ್ಲೆಕ್ಸ್ ಗಳಲ್ಲಿ 8 ರಿಂದ 10 ಶೋಗಳು ಪ್ರದರ್ಶನ ಆಗುತ್ತಿವೆ. ಅಷ್ಟೇ ಅಲ್ಲ, ಬಾಕ್ಸ್ ಆಫೀಸ್‌ನಲ್ಲಿ ಲವ್ ಮಾಕ್‌ಟೈಲ್ 2 ಸಿನಿಮಾ ಒಳ್ಳೆ ಕಲೆಕ್ಷನ್ ಮಾಡಿದೆ ಎಂದ ಕೃಷ್ಣ, ಅದು ಎಷ್ಟು ಕೋಟಿ ಅಂತಾ ಹೇಳಲಿಲ್ಲ.
ಈ ಚಿತ್ರದಲ್ಲಿ ನಿಧಿಮಾನಾಗಿ ಕಾಣಿಸಿಕೊಂಡಿರುವ ಮಿಲನಾ ನಾಗರಾಜ್ ಮಾತನಾಡಿ, ಲವ್ ಮಾಕ್‌ಟೈಲ್ 2 ಸಿನಿಮಾ ಕರ್ನಾಟಕ ಅಲ್ಲದೇ ಬೇರೆ ರಾಜ್ಯಗಳಲ್ಲಿ ಹೌಸ್ ಫುಲ್ ಪ್ರದರ್ಶನ ಆಗುತ್ತಿದೆ ಅಂದರು. 2 ಸಿನಿಮಾದ ವಿತರಣೆ ಹೊಣೆ ಹೊತ್ತಿರುವ ಡಾರ್ಲಿಂಗ್ ಕೃಷ್ಣ ತಂದೆ ನಾಗಪ್ಪ ಮಾತನಾಡಿ, ಐದು ದಿನಕ್ಕೆ ಐದು ಕೋಟಿ ಕಲೆಕ್ಷನ್ ಆಗಿದೆ. ಒಂದು ವಾರಕ್ಕೆ ಏಳು ಕೋಟಿ ಕಲೆಕ್ಷನ್ ಆಗುವ ಸಾಧ್ಯತೆ ಇದೆ ಎಂದು ಚಿತ್ರದ ಬಾಕ್ಸ್ ಆಫೀಸ್ ಕಲೆಕ್ಷನ್ ಹಂಚಿಕೊಂಡರು.
ಚಿತ್ರ ಸದ್ಯ 190ಕ್ಕೂ ಚಿತ್ರಮಂದಿರಗಳಲ್ಲಿ ಪ್ರದರ್ಶನಗೊಳ್ಳುತ್ತಿದೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಒಳ್ಳೆ ಕಲೆಕ್ಷನ್ ಆಗುವ ಸಾಧ್ಯತೆ ಇದೆ. ಈ ಸಿನಿಮಾದ ಖುಷಿಯಲ್ಲಿರೋ ನಟ, ನಿರ್ದೇಶಕ ಡಾರ್ಲಿಂಗ್ ಕೃಷ್ಣ ಮುಂದಿನ ದಿನಗಳಲ್ಲಿ ಲವ್ ಮಾಕ್ ಟೈಲ್ 3 ಸಿನಿಮಾ ಯೋಚನೆ ಇದೆ ಅಂತಾರೆ. ಈ ವರ್ಷದಲ್ಲಿ ಲವ್ ಮಾಕ್ ಟೈಲ್ 2 ಸಿನಿಮಾ ಪ್ರೇಕ್ಷಕರಿಗೆ ಇಷ್ಟ ಆಗುವ ಮೂಲಕ ಹಿಟ್ ಅಂತಾ ಕರೆಯಿಸಿಕೊಂಡಿದೆ.
ಈ ಸಂತೋಷ ಕೂಟದಲ್ಲಿ ನಟ, ನಿರ್ದೇಶಕ ಡಾರ್ಲಿಂಗ್ ಕೃಷ್ಣ, ನಟಿ ಮಿಲನಾ ನಾಗರಾಜ್, ಸಿಹಿ ಪಾತ್ರ ಮಾಡಿರೋ ರಾಚೆಲ್ ಡೆವಿಡ್, ಕ್ಯಾಮರಾಮ್ಯಾನ್ ಶ್ರೀ ಕ್ರೇಜಿಮೈಂಡ್, ಸಂಗೀತ ನಿರ್ದೇಶಕ ನಕುಲ್ ಅಭ್ಯಂಕರ್ ಹಾಗು ಕೃಷ್ಣ ತಂದೆ ನಾಗಪ್ಪ ಸೇರಿದಂತೆ ಇಡೀ ಲವ್ ಮಾಕ್ ಟೈಲ್ 2 ಚಿತ್ರತಂಡ ಉಪಸ್ಥಿತಿಯಿತ್ತು.
