ಸುದೀಪ್ ಅಭಿನಯದ 'ಕೋಟಿಗೊಬ್ಬ 3' ಚಿತ್ರವು ದಸರಾ ಹಬ್ಬದ ಪ್ರಯುಕ್ತ ಅಕ್ಟೋಬರ್ 14ಕ್ಕೆ ಬಿಡುಗಡೆಯಾಗುತ್ತಿರುವುದು ಗೊತ್ತೇ ಇದೆ. ಚಿತ್ರ ಇನ್ನೂ ಸೆನ್ಸಾರ್ ಆಗಿಲ್ಲ. ಮೇಲಾಗಿ ಪ್ರಮೋಷನ್ ಕೂಡ ಶುರುವಾಗಿಲ್ಲ. ಬಿಡುಗಡೆಗೆ 10 ದಿನಗಳು ಮಾತ್ರ ಇದೆ. ಇನ್ನೂ ಪ್ರಚಾರ ಶುರುವಾಗಿಲ್ಲ ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ತಾವೇ ಚಿತ್ರದ ಪೋಸ್ಟರ್ ಮತ್ತು ಫೋಟೊ ಬಳಸಿಕೊಂಡು ಪ್ರಚಾರಕ್ಕಿಳಿದಿದ್ದಾರೆ.
ಇಷ್ಟಕ್ಕೂ ಯಾಕೆ ಪ್ರಚಾರ ಶುರುವಾಗಿಲ್ಲ ಎಂದರೆ ಪಕ್ಷಮಾಸದ ಕಾರಣ ನೀಡುತ್ತಾರೆ ನಿರ್ಮಾಪಕ ಸೂರಪ್ಪ ಬಾಬು ಬೆಂಬಲಿಗರು. ಅ.6ಕ್ಕೆ ಪಕ್ಷಮಾಸ ಅಧಿಕೃತವಾಗಿ ಮುಗಿಯಲಿದೆ. ಸೆ.7ರಂದು ಪ್ರಚಾರ ಕೆಲಸ ಶುರುವಾಗಲಿದ್ದು, ಅಂದೇ ಸಂಜೆ ಯೂಟ್ಯೂಬ್ನ ಆನಂದ್ ಆಡಿಯೋ ಚಾನಲ್ನಲ್ಲಿ ಚಿತ್ರದ ಟ್ರೇಲರ್ ಬಿಡುಗಡೆಯಾಗಲಿದೆ. ಅದಾಗಿ ಮೂರನೇ ದಿನಕ್ಕೆ ಚಿತ್ರದ ಪ್ರೀ-ರಿಲೀಸ್ ಇವೆಂಟ್ ನಡೆಯಲಿದೆ. ಶ್ರೇಯಸ್ ಮೀಡಿಯಾ ಈ ಕಾರ್ಯಕ್ರಮವನ್ನು ಆಯೋಜಿಸುತ್ತಿದ್ದು, ಅಂದು ಸುದೀಪ್ ಮತ್ತು ಚಿತ್ರತಂಡದವರು ಇದರಲ್ಲಿ ಭಾಗವಹಿಸಿ, ಚಿತ್ರದ ಬಗ್ಗೆ ಮೊದಲ ಬಾರಿಗೆ ಮಾತನಾಡಲಿದ್ದಾರೆ.
ಮೂರು ವರ್ಷಗಳ ಹಿಂದೆಯೇ 'ಕೋಟಿಗೊಬ್ಬ 3' ಚಿತ್ರವು ಪ್ರಾರಂಭವಾಗಿತ್ತು. 2020ರ ಆರಂಭದಲ್ಲೇ ಚಿತ್ರೀಕರಣ ಮುಗಿಸಿದರೂ ಲಾಕ್ಡೌನ್ ಹಿನ್ನೆಲೆಯಲ್ಲಿ ಬಿಡುಗಡೆ ಮುಂದೂಡಿದ್ದ ಬಾಬು, ನಂತರ ಏಪ್ರಿಲ್ನಲ್ಲಿ ರಿಲೀಸ್ ಮಾಡುವುದಾಗಿ ಘೋಷಿಸಿದ್ದರು. ಆದರೆ ನಂತರ ಕೋವಿಡ್ ಎರಡನೇ ಲಾಕ್ಡೌನ್ ಘೋಷಣೆಯಾಗಿದ್ದರಿಂದ ಚಿತ್ರ ಬಿಡುಗಡೆ ಮತ್ತೆ ಮುಂದೂಡಲ್ಪಟ್ಟು, ಅಂತಿಮವಾಗಿ ಇದೀಗ ಅ.14ಕ್ಕೆ ಬಿಡುಗಡೆಯಾಗುತ್ತಿದೆ.
'ಕೋಟಿಗೊಬ್ಬ 3'ರಲ್ಲಿ ಸುದೀಪ್ ಜೊತೆಗೆ ಮಡೋನಾ ಸೆಬಾಸ್ಟಿಯನ್, ರವಿಶಂಕರ್, ಅಫ್ತಾಬ್ ಶಿವದಾಸಾನಿ ಮುಂತಾದವರು ನಟಿಸಿದ್ದು, ಆಶಿಕಾ ರಂಗನಾಥ್ ಒಂದು ಐಟಂ ಸಾಂಗ್ನಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರಕ್ಕೆ ಅರ್ಜುನ್ ಜನ್ಯ ಸಂಗೀತವಿದ್ದು, ಶೇಖರ್ ಚಂದ್ರು ಛಾಯಾಗ್ರಹಣ ಮಾಡಿದ್ದಾರೆ. ಶಿವಕಾರ್ತಿಕ್ ಕಥೆ, ಚಿತ್ರಕಥೆ ಬರೆಯುವುದರ ಜೊತೆಗೆ ನಿರ್ದೇಶನ ಮಾಡಿದ್ದಾರೆ.
ಇದನ್ನೂ ಓದಿ: 'ಶಬರಿ ಇನ್ ಸರ್ಚ್ ಆಫ್ ರಾವಣ'ದಲ್ಲಿ ಡಿಂಪಲ್ ಕ್ವೀನ್ ವಿಭಿನ್ನ ಲುಕ್ ರಿವೀಲ್
