ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ಕರಿಯರ್‌ಗೆ ದೊಡ್ಡ ಬ್ರೇಕ್ ಅಂತ ಸಿಕ್ಕಿದ್ದೇ 'ಕಿರಿಕ್ ಪಾರ್ಟಿ' ಸಿನಿಮಾದಿಂದ. ಆ ಸಿನಿಮಾದಲ್ಲಿ ಮೊದಲು ಕರ್ಣನ ಪಾತ್ರದಲ್ಲಿ ಕ್ಯೂಟ್ ಆಗಿರೋ ಕಾಲೇಜ್ ಹುಡುಗನಾಗಿ ಕಾಣಿಸಿಕೊಳ್ಳುವ ರಕ್ಷಿತ್, ನಂತರ ರಗಡ್ ಆಗಿ ಅಭಿನಯಿಸುವ ಮೂಲಕ ಪ್ರೇಕ್ಷಕರನ್ನು ರಂಜಿಸಿದರು. ಸದ್ಯ, ಚಾರ್ಲಿ 777, ಸಪ್ತಸಾಗರದಾಚೆ ಸಿನಿಮಾಗಳಲ್ಲಿ ಬ್ಯುಸಿಯಾಗಿರುವ ರಕ್ಷಿತ್ ಶೆಟ್ಟಿ, ಮತ್ತೆ ಕಾಲೇಜು ಹುಡುಗನಾಗಿದ್ದಾರೆ.
ಹಾಗಾದರೆ, ರಕ್ಷಿತ್ ಶೆಟ್ಟಿ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ. ಚಿತ್ರದಲ್ಲಿ ಅಭಿನಯಯಿಸುತ್ತಿದ್ದಾರಾ ಅಂದುಕೊಂಡರೆ ನಿಮ್ಮ ಊಹೆ ತಪ್ಪು. ಸದ್ಯ, ರಕ್ಷಿತ್ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಚಿತ್ರದ ನಟಿಸುತ್ತಿಲ್ಲ. ಬದಲಾಗಿ ಆ ಚಿತ್ರದ ಪ್ರಮೋಷನಲ್ ವಿಡಿಯೋದಲ್ಲಿ ಹೊಸ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಹೌದು..ತುಂಟಾಟಿಕೆ, ಹುಡುಗಾಟದ ಬುದ್ಧಿ ಹಾಗೂ ಕಾಲೇಜಿನ ಪುಡಿರೌಡಿಗಳ ಸಹವಾಸವನ್ನು ಬಿಟ್ಟಿರುವ ಕರ್ಣ, ಈಗ ಸಂಪೂರ್ಣವಾಗಿ ಬದಲಾಗಿದ್ದಾರೆ. ಬೆಳಗ್ಗೆ ಬ್ರಾಹ್ಮೀ ಮುಹೂರ್ತದಲ್ಲಿ ಎದ್ದು ಯೋಗಾಭ್ಯಾಸ ಮಾಡುತ್ತಾರೆ. ಬಳಿಕ ಬೆಚ್ಚನೆ ಕಾಫಿ ಹೀರುತ್ತಾ, ಸೂರ್ಯೋದಯವನ್ನು ಆನಂದಿಸುತ್ತಾರೆ. ಜೊತೆಗೆ ಪಕ್ಷಿ ವೀಕ್ಷಣೆ ಕೂಡ ಇವರ ಹೊಸ ಹವ್ಯಾಸ. ಇದೆಲ್ಲ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಚಿತ್ರಕ್ಕಾಗಿ ಮಾಡಿರುವ ಹೊಸ ಪ್ರಮೋಷನಲ್ ವಿಡಿಯೋದಲ್ಲಿ ರಕ್ಷಿತ್ ಕಾಣಿಸಿಕೊಂಡಿರುವ ಪರಿ ಇದು.
ಈ ಹಿಂದೆ ಪುನೀತ್ ರಾಜ್‌ಕುಮಾರ್ ಜೊತೆ ಸಖತ್ ಕ್ರಿಯೇಟಿವ್ ಆಗಿರುವ ಪ್ರಮೋಷನಲ್ ವಿಡಿಯೋಗಳನ್ನು ಮಾಡಿತ್ತು ಈ ತಂಡ. ಈಗ ರಕ್ಷಿತ್ ಶೆಟ್ಟಿ ಜೊತೆ ಸೇರಿಕೊಂಡು, 'ಕಿರಿಕ್ ಪಾರ್ಟಿ' ಕರ್ಣನನ್ನು ಕರೆತಂದಿದ್ದಾರೆ. ಈ ವಿಡಿಯೋದಲ್ಲಿ ರಕ್ಷಿತ್ ಪುನಃ ಕರ್ಣ ಆಗಿ ಕಾಣಿಸಿಕೊಂಡಿದ್ದಾರೆ. ಈ ವಿಡಿಯೋ ಮುಂದುವರಿಯುತ್ತಿದ್ದಂತೆಯೇ, ರಕ್ಷಿತ್‌ಗೆ.. ಅಲ್ಲ ಅಲ್ಲ.. ಕರ್ಣನಿಗೆ ಹಾಸ್ಟೆಲ್ ಹುಡುಗರು ಕಾಣಿಸುತ್ತಾರೆ. ಬೆಳ್‌ ಬೆಳಗ್ಗೆ ಬಿಯರ್ ಕುಡಿಯೋಕೆ ಅಂತ ಅವರು ಮಾಡೋ ಸಾಹಸಗಳನ್ನು ಕಂಡು ಕರ್ಣ ಶಾಕ್ ಆಗ್ತಾನೆ. 'ನಮ್ಮ ಕಾಲದಲ್ಲಿ ಹಿಂಗೆಲ್ಲ ಇರಲಿಲ್ಲಪ್ಪ' ಅಂತ ಬೇಸರ ಮಾಡಿಕೊಳ್ತಾನೆ. ಅಷ್ಟರಲ್ಲಿ ಕರ್ಣನ ಫ್ರೆಂಡ್ಸ್ ಕೂಡ ಬಿಯರ್ ಮತ್ತು ನಾನ್‌ವೆಜ್‌ ಜೊತೆ ಬರ್ತಾರೆ. ಅಲ್ಲಿ 'ಹಾಸ್ಟೆಲ್ ಹುಡುಗರ..' ಈ ಪ್ರಮೋಷನಲ್ ವಿಡಿಯೋ ಮುಕ್ತಾಯವಾಗುತ್ತದೆ.
ಈ ಚಿತ್ರಕ್ಕೆ ನಿತಿನ್‌ ಕೃಷ್ಣಮೂರ್ತಿ ನಿರ್ದೇಶನ ಮಾಡಿದ್ದಾರೆ. ಹಾಡುಗಳಿಗೆ ಅಜನೀಶ್ ಲೋಕನಾಥ್‌ ಅವರ ಸಂಗೀತ ಸಂಯೋಜನೆ ಇದೆ. ಛಾಯಾಗ್ರಹಣವನ್ನು ಅರವಿಂದ್‌ ಕಶ್ಯಪ್‌ ಮಾಡುತ್ತಿದ್ದಾರೆ. ವರುಣ್ ಸ್ಟುಡಿಯೋ ಸಂಸ್ಥೆಯಡಿ ಈ ಸಿನಿಮಾ ನಿರ್ಮಾಣ ಆಗುತ್ತಿದೆ. ಒಟ್ಟಾರೆ ಆರಂಭದಿಂದಲೂ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ. ಚಿತ್ರತಂಡ, ವಿಭಿನ್ನ ಪ್ರಮೋಷನ್ ವಿಡಿಯೋಗಳನ್ನ ಮಾಡುತ್ತಾ ಗಮನ ಸೆಳೆಯುತ್ತಿದೆ.
