ಜೀ ಕನ್ನಡ ವಾಹಿನಿಯ ರಾಧಾ ಕಲ್ಯಾಣ ಧಾರಾವಾಹಿಯಲ್ಲಿ ನಾಯಕಿ ರಾಧಾಳಾಗಿ ಅಭಿನಯಿಸುತ್ತಿರುವ ಕರಾವಳಿ ಕುವರಿ ರಾಧಿಕಾಗೆ ಇಂದು ಜನುಮದಿನದ ಸಂಭ್ರಮ.
ರೀಲ್ ರಾಧಾಳಾಗಿ ಬ್ಯುಸಿಯಾಗಿರುವ ರಿಯಲ್ ರಾಧಿಕಾ ಸದ್ಯ ಕಿರುತೆರೆಯ ಬೇಡಿಕೆಯ ನಟಿಯೂ ಹೌದು. ಕಲರ್ಸ್ ಸೂಪರ್ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಮಂಗ್ಳೂರು ಹುಡ್ಗಿ-ಹುಬ್ಬಳ್ಳಿ ಹುಡ್ಗ' ಧಾರಾವಾಹಿಯಲ್ಲಿ ಮಂಗಳೂರು ಕುವರಿ ಅಮೂಲ್ಯಳಾಗಿ ಅಭಿನಯಿಸುವ ಮೂಲಕ ನಟನಾ ಪಯಣ ಆರಂಭಿಸಿದ ಚೆಲುವೆಗೆ ನಟನೆ ಬಯಸದೇ ಬಂದ ಭಾಗ್ಯವೂ ಹೌದು.
ಕಿರುತೆರೆಗೆ ಬರುವ ಮೊದಲೇ ಕೋಸ್ಟಲ್ವುಡ್ನಲ್ಲಿ ಮಿಂಚಿದ ಚೆಂದುಳ್ಳಿ ಚೆಲುವೆ ಇಂದು ಬಣ್ಣದ ಜಗತ್ತಿನಲ್ಲಿ ಮಿಂಚುತ್ತಿದ್ದಾರೆ. ಸಂಬಂಧಿಯೊಬ್ಬರ ಒತ್ತಾಯಕ್ಕೆ ಮಣಿದು ಪುದರುಗೊಂಜಿ ಬುಡೆದಿ ಎಂಬ ತುಳು ಸಿನಿಮಾದಲ್ಲಿಯೂ ರಾಧಿಕಾ ಅಭಿನಯಿಸಿದ್ದಾರೆ.
ಮಂಗ್ಳೂರು ಹುಡ್ಗಿ ಹುಬ್ಬಳ್ಳಿ ಹುಡ್ಗ ಧಾರಾವಾಹಿಯಲ್ಲಿ ನಟಿಸಿದ ಕರಾವಳಿ ಕುವರಿ ಮುಂದೆ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಮಹಾರಾಣಿ ಧಾರಾವಾಹಿಯಲ್ಲೂ ಕಾಣಿಸಿಕೊಂಡಿದ್ದಾರೆ. ಸದ್ಯ ರಾಧಾ ಕಲ್ಯಾಣದ ರಾಧಾಳಾಗಿ ಕಿರುತೆರೆಯಲ್ಲಿ ಮಿಂಚುತ್ತಿದ್ದಾರೆ.
ಲುಂಗಿ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿರುವ ಇವರು, ಎಲ್ಲಿದ್ದೆ ಇಲ್ಲಿ ತನಕ ಸಿನಿಮಾದಲ್ಲಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಕಳೆದ ವರ್ಷವಷ್ಟೇ ಆಕರ್ಷ್ ಭಟ್ ಅವರೊಂದಿಗೆ ಅದ್ಧೂರಿಯಾಗಿ ನಿಶ್ಚಿತಾರ್ಥ ಮಾಡಿಕೊಂಡಿರುವ ನಟಿ ಮುಂದಿನ ತಿಂಗಳ 11ರಂದು ದಾಂಪತ್ಯ ಜೀವನಕ್ಕೆ ಕಾಲಿರಿಸಲಿದ್ದಾರೆ.
