ಸಂಪೂರ್ಣ ಮಕ್ಕಳೇ ಆವರಿಸಿಕೊಂಡಿರುವ ಚಿತ್ರ ‘ಗಿರ್ಮಿಟ್’. ಸುಮಾರು 300 ಮಕ್ಕಳು ಈ ಚಿತ್ರದಲ್ಲಿ ಅಭಿನಯ ಮಾಡಿದ್ದಾರೆ. ಮನರಂಜನೆ ಜೊತೆ ಹಾಸ್ಯದ ಹೊನಲು ಹರಿಯುವುದಕ್ಕೆ ಕಾರಣ ಜನಪ್ರಿಯ ನಟರುಗಳ ಸಂಭಾಷಣೆ.
ಸಿನಿಮಾದಲ್ಲಿ ಪುಟ್ಟ ಮಕ್ಕಳಾದ ಆಶ್ಲೇಶ್ ಹಾಗೂ ಶ್ಲಾಘಾ ಪಾತ್ರಕ್ಕೆ ರಾಕಿಂಗ್ ಸ್ಟಾರ್ ಯಶ್ ಹಾಗೂ ರಾಧಿಕಾ ಪಂಡಿತ್ ದನಿಯಾಗಿದ್ದಾರೆ. ಸುಧಾ ಬೆಳವಾಡಿ ಹಾಗೂ ರಂಗಾಯಣ ರಘು ಮೂರು ಹೆಣ್ಣುಮಕ್ಕಳ ತಾಯಿ ಹಾಗೂ ತಂದೆಯ ಪಾತ್ರಕ್ಕೆ ತಮ್ಮ ವಾಯ್ಸ್ ಡಬ್ ಮಾಡಿದ್ದಾರೆ. ಅಚ್ಯುತ್ ಕುಮಾರ್ ನಾಯಕನ ತಂದೆಗೆ ಪಾತ್ರಕ್ಕೆ ಧ್ವನಿ ನೀಡಿದ್ರೆ, ತಾರಾ ಅನುರಾಧ ನಾಯಕನ ತಾಯಿ ಪಾತ್ರಕ್ಕೆ ನೀಡಿದ್ದಾರೆ.
ಅಸಲಿಗೆ ಈ ಮಕ್ಕಳ ಅಭಿನಯದ ‘ಗಿರ್ಮಿಟ್’ ಚಿತ್ರದ ಕಥೆ ಏನಪ್ಪಾ ಅಂದರೆ, ಶಂಕ್ರಪ್ಪನ ಮನೆಯಲ್ಲಿ ಮೂರು ಹೆಣ್ಣು ಮಕ್ಕಳು. ದೊಡ್ಡವಳಿಗೆ ಮದುವೆ ಆಗದೇ ಮಿಕ್ಕವರಿಗೆ ಮದುವೆ ಆಗುವಂತಿಲ್ಲ. ಶಂಕರಪ್ಪ ಬಹಳ ಜುಗ್ಗ ಆಸಾಮಿ. ಈ ಮನೆಯ ಕೊನೆಯ ಮಗಳು ರಶ್ಮಿ ಹಾಗೂ ರಾಜ ಪ್ರೇಮಿಗಳು. ಆದರೆ ರಶ್ಮಿ ಹಾಕುವ ಷರತ್ತು ಏನಪ್ಪ ಅಂದರೆ , ರಾಜನೇ ಇಬ್ಬರು ಹುಡುಗರನ್ನು ಹುಡುಕಿ ಅಕ್ಕಂದಿರ ಮದುವೆಗೆ ವ್ಯವಸ್ಥೆ ಮಾಡಿದರೆ ಎಲ್ಲವೂ ಸರಾಗ ಎಂದು.
- " class="align-text-top noRightClick twitterSection" data="">
ಈಗ ರಾಜ ಈ ರಶ್ಮಿಯನ್ನೇ ಇಷ್ಟ ಪಡಲು ಕಾರಣ ರಾಜನ ಅಮ್ಮ ಇಂಗ್ಲಿಷ್ ವ್ಯಾಮೋಹಿ. ಇಂಗ್ಲೀಷ್ ಗೊತ್ತಿರುವವಳೇ ಸೊಸೆ ಆಗಬೇಕು. ರಾಜ ರಶ್ಮಿ ಪರಸ್ಪರ ಒಪ್ಪಿದ್ದಾರೆ. ಆದರೆ, ರಾಜ ಇನ್ನ ಎರಡು ಹುಡುಗರನ್ನು ಹುಡುಕುವುದು ಚಿತ್ರದ ಮುಂದಿನ ವಿಚಾರ. ಇದರ ಜೊತೆಗೆ ರಶ್ಮಿಯನ್ನು ಇಷ್ಟ ಪಡುವ ವಿಲನ್ ಸಹ ಇದ್ದಾನೆ. ಮುಂದಿನದ್ದು ಥೇಟ್ ದೊಡ್ಡವರ ಸಿನಿಮಾದಲ್ಲಿ ಆಗುವಂತೆ ಈ ಮಕ್ಕಳ ಅಭಿನಯದ ಸಿನಿಮಾದಲ್ಲಿಯೂ ಆಗುವುದು.
ಮಾಸ್ಟರ್ ಆಶ್ಲೇಶ್ ಸ್ಟೈಲ್ ರಾಕಿಂಗ್ ಸ್ಟಾರ್ ಯಶ್ ಅನುಕರಣೆ. ಶ್ಲಾಘಾ ಪಾತ್ರ ಸಹ ರಾಧಿಕಾ ಪಂಡಿತ್ ಪಡಿಯಚ್ಚು. ಮಕ್ಕಳ ಅಭಿನಯದ ಜೊತೆಗೆ, ವೇಷ ಭೂಷಣ ದೊಡ್ಡವರನ್ನು ಹೋಲುವಂತೆ ಮಾಡಿರುವುದು ಬೇಶ್ ಎನ್ನಿಸಿಕೊಳ್ಳುತ್ತದೆ. ‘ಗಿರ್ಮಿಟ್’ ಚಿತ್ರದ ಸಂಭಾಷಣೆ ಚುರುಕಾಗಿ ಹಾಗೂ ಹಾಸ್ಯಮಯವಾಗಿದೆ. ರವಿ ಬಸ್ರೂರ್ ಅವರು ಮೂರು ಹಾಡುಗಳನ್ನು ಕೇಳುವಂತೆ ಮಾಡಿದ್ದಾರೆ. ಪವರ್ ಸ್ಟಾರ್ ಪುನೀತ್ ರಾಜಕುಮಾರ್ ಹಾಡಿನಲ್ಲಿ ಕರ್ನಾಟಕದ 30 ಜಿಲ್ಲೆಗಳ ಹೆಸರುಗಳು ಬರುವುದುಂಟು.
ಚಿತ್ರ : ಗಿರ್ಮಿಟ್
ನಿರ್ಮಾಪಕರು : ಎನ್ ಎಸ್ ರಾಜಕುಮಾರ
ನಿರ್ದೇಶನ : ರವಿ ಬಸ್ರೂರ್
ಸಂಗೀತ : ರವಿ ಬಸ್ರೂರ್
ಛಾಯಾಗ್ರಹಣ : ಸಚಿನ್ ಬಸ್ರೂರ್
