ಜನಪ್ರಿಯ ನಟಿ, ರಿಯಲ್ ಸ್ಟಾರ್ ಉಪೇಂದ್ರ ಪತ್ನಿ ಪ್ರಿಯಾಂಕ ವೃತ್ತಿ ಜೀವನದಲ್ಲಿ ಮೊದಲ ಬಾರಿಗೆ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಹೌದು ಬೆಂಗಳೂರು ಮಹಾನಗರದ ಸೈಂಟ್ ಮಾರ್ಕ್ಸ್ ರಸ್ತೆಯಲ್ಲಿ ನಡೆದ ಒಂದು ಘಟನೆ ಆಧರಿಸಿ ಕನ್ನಡದಲ್ಲಿ ‘ಸೈಂಟ್ ಮಾರ್ಕ್ಸ್ ರಸ್ತೆ’ ಎಂಬ ಸಿನಿಮಾ ನಿರ್ಮಾಣವಾಗುತ್ತಿದ್ದು, ಈ ಚಿತ್ರದಲ್ಲಿ ಪ್ರಿಯಾಂಕ ದ್ವಿಪಾತ್ರಕ್ಕೆ ಬಣ್ಣ ಹಚ್ಚುತ್ತಿದ್ದಾರೆ.
ನಿಜ ಜೀವನದ ಆಧಾರದ ಮೇಲೆ ಸಿದ್ದವಾಗುತ್ತಿರುವ ಈ ಸಿನಿಮಾ ಕನ್ನಡ ಅಷ್ಟೇ ಅಲ್ಲದೆ ತಮಿಳಿನಲ್ಲಿಯೂ ತಯಾರಾಗುತ್ತಿದೆ. ಅಂದ ಹಾಗೆ ಪ್ರಿಯಾಂಕ ಉಪೇಂದ್ರ ಬಹಳ ವರ್ಷಗಳ ನಂತರ ತಮಿಳು ಭಾಷೆಗೆ ಮತ್ತೆ ವಾಪಸಾಗುತ್ತಿದ್ದಾರೆ. ಇನ್ನು ಪ್ರಿಯಾಂಕ ಉಪೇಂದ್ರ ಈ ಹಿಂದೆ ತೆಲುಗು, ಬಂಗಾಳಿ, ಹಿಂದಿ ಭಾಷೆಗಳಲ್ಲೂ ನಟಿಸಿದ್ದರು.
ಯುವ ನಿರ್ದೇಶಕರಾದ ಮಗೇಶ್ ಹಾಗೂ ವೆಂಕಟೇಶ್, ಮ್ಯಾಗ್ವನ್ ಹೆಸರಿನಲ್ಲಿ ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದಾರೆ. ಈ ಸಿನಿಮಾದ ಕಥೆಯಲ್ಲಿ ಡೆಲ್ಸಿ ಹಾಗೂ ವೇರಾ ಎಂಬ ಎರಡು ಕ್ರಿಶ್ಚಿಯನ್ ಪಾತ್ರಗಳು ಇರುವುದರಿಂದ ಪ್ರಿಯಾಂಕ ಆಂಗ್ಲ ಭಾಷೆಯಲ್ಲಿ ಹೆಚ್ಚು ಸಂಭಾಷಣೆ ಮಾಡಲಿದ್ದಾರಂತೆ.
ಈಗಾಗಲೇ ಪ್ರಿಯಾಂಕ ಜನುಮ ದಿನವಾದ ನವೆಂಬರ್ 12ರಂದು ‘ಸೈಂಟ್ ಮಾರ್ಕ್ಸ್ ರಸ್ತೆ’ ಚಿತ್ರದ ಪೋಸ್ಟರ್ ಬಿಡುಗಡೆಯಾಗಿತ್ತು. ಇನ್ನು ಸಿನಿಮಾದಲ್ಲಿ ತಮಿಳು ನಟರಾದ ಮೇಹತ್ ರಾಘವೇಂದ್ರ, ಯಶಿಕ ಆನಂದ್, ಸಾರಾ ವೆಂಕಟೇಶ್, ಮನೋಬಲಾ ಸಹ ನಟಿಸಲಿದ್ದಾರಂತೆ.
