ಬಹುಭಾಷಾ ನಟಿ, ಬಿಜೆಪಿ ನಾಯಕಿ ಖುಷ್ಬೂಗೆ ಇಂದು 51ನೇ ಜನ್ಮದಿನ. ಜನ್ಮದಿನ ಸಂಭ್ರಮದಲ್ಲಿರುವ ಖುಷ್ಬೂ ಕನ್ನಡ ಚಿತ್ರರಂಗಕ್ಕೆ ಕೊಟ್ಟ ಕೊಡುಗೆ ಅಪಾರ. ಈಗಲೂ ಎಲ್ಲರ ನೆಚ್ಚಿನ ನಟಿ ಖುಷ್ಬೂ. ಇವರು 1980 ರಲ್ಲಿ ಬಾಲಕಲಾವಿದೆಯಾಗಿ ತಮ್ಮ ವೃತ್ತಿಜೀವನ ಪ್ರಾರಂಭಿಸಿದರು.
1985ರಲ್ಲಿ ಜಾಕಿ ಶ್ರಾಫ್ ಜೊತೆ ಖುಷ್ಬೂ ತಮ್ಮ ಮೊದಲ ಮುಖ್ಯ ಪಾತ್ರವನ್ನು ನಿರ್ವಹಿಸಿದರು. ಖುಷ್ಬೂ ಮೊದಲ ಹೆಸರು 'ನಖಾತ್ ಖಾನ್'. ತೆಲುಗು ಚಿತ್ರ 'ಕಲಿಯುಗ ಪಾಂಡವುಲು' (1986) ಮೂಲಕ ಖುಷ್ಬೂ ದಕ್ಷಿಣ ಭಾರತದ ಪರದೆಗಳಿಗೆ ಪರಿಚಯವಾದರು.
ಕನ್ನಡದಲ್ಲಿ ಖುಷ್ಬೂ ರವಿಚಂದ್ರನ್ ಜೊತೆ ‘ರಣಧೀರ’ (1987), ‘ಅಂಜದ ಗಂಡು’, ‘ಶಾಂತಿ ಕ್ರಾಂತಿ’ ಮತ್ತು ‘ಯುಗಪುರುಷ’ ಸೇರಿದಂತೆ ಅನೇಕ ಚಿತ್ರಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ ತೆರೆಮೇಲೆ ರವಿಚಂದ್ರನ್ ಮತ್ತು ಖುಷ್ಬೂ ಜೊಡಿ ತುಂಬಾ ಪ್ರಸಿದ್ಧವಾಗಿತ್ತು. ಪ್ರಸಿದ್ಧ ನಾಯಕಿ ಖುಷ್ಬೂಗೆ ಸಾಮಾಜಿಕ ಜಾಲತಾಣದಲ್ಲಿ ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳು, ಚಿತ್ರರಂಗದವರು ಶುಭಾಶಯಗಳ ಮಹಾಪೂರವೇ ಹರಿಸುತ್ತಿದ್ದಾರೆ.
