ಸುದೀಪ್​​​ ನಟನೆಗೆ ಸೂರಿ ನಿರ್ದೇಶನ: ‘ಕಾಗೆ ಬಂಗಾರ‘ಕ್ಕೂ ಸಿಕ್ತು ಚಾಲನೆ

ಮಾಡುವುದಿಲ್ಲ ಎಂದು ಕೈಬಿಟ್ಟಿದ್ದ 'ಕಾಗೆ ಬಂಗಾರ' ಸಿನಿಮಾಗೆ ದುನಿಯಾ ಸೂರಿ ಮತ್ತೆ ಚಾಲನೆ ನೀಡಿದ್ದಾರೆ. ಇದರ ಜೊತೆಗೆ ಅವರು ಸುದೀಪ್​​ಗಾಗಿ ವಿಭಿನ್ನ ಕಥೆಯೊಂದನ್ನು ರೆಡಿ ಮಾಡುತ್ತಿದ್ದಾರೆ ಎನ್ನಲಾಗಿದೆ.

'ಟಗರು' ನಂತರ ದುನಿಯಾ ಸೂರಿ ಡಾಲಿ ಧನಂಜಯ್​ ಅವರೊಂದಿಗೆ ‘ಪಾಪ್ ಕಾರ್ನ್ ಮಂಕಿ ಟೈಗರ್’ ಸಿನಿಮಾ ಮಾಡುತ್ತಿರುವುದು ತಿಳಿದ ವಿಚಾರ. ಆದರೆ ಈ ಸಿನಿಮಾ ಜೊತೆ ಅವರು ಮತ್ತೆ ಎರಡು ಸಿನಿಮಾಗಳ ತಯಾರಿಯಲ್ಲಿದ್ದಾರೆ ಎನ್ನಲಾಗುತ್ತಿದೆ.

‘ಕಾಗೆ ಬಂಗಾರ‘ ಎಂಬ ಸಿನಿಮಾ ಮಾಡುತ್ತಿರುವುದಾಗಿ ಕೆಲವು ದಿನಗಳ ಹಿಂದೆ ಸೂರಿ ಹೇಳಿಕೊಂಡಿದ್ದರು. ಆದರೆ ಆ ಸಿನಿಮಾ ಮಾಡುತ್ತಿಲ್ಲ ಎಂದು ನಂತರ ಹೇಳಿದ್ದರು. ಇದೀಗ ಮತ್ತೆ ‘ಕಾಗೆ ಬಂಗಾರ‘ಕ್ಕೆ ಚಾಲನೆ ದೊರೆತಿದೆ ಎಂದು ಮೂಲಗಳು ತಿಳಿಸಿವೆ. ಇದರ ಜೊತೆ ಸೂರಿ ಸುದೀಪ್​​ಗಾಗಿ ವಿಭಿನ್ನ ಚಿತ್ರಕಥೆಯೊಂದನ್ನು ಸಿದ್ಧಪಡಿಸುತ್ತಿದ್ದಾರಂತೆ. ಇನ್ನು ಸುದೀಪ್ ಹಾಗೂ ಸೂರಿ ಅವರನ್ನು ಒಟ್ಟುಗೂಡಿಸುತ್ತಿರುವುದು ನಿರ್ಮಾಪಕ ಕೆ.ಪಿ.ಶ್ರೀಕಾಂತ್.

ಸೂರಿ ಸದ್ಯಕ್ಕೆ ಪಾಪ್​ಕಾರ್ನ್ ತಯಾರಿಯಲ್ಲಿದ್ದಾರೆ. ಇದರೊಂದಿಗೆ ಸುದೀಪ್​​ ಕೂಡಾ ಇತರ ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದಾರೆ. ‘ಕೋಟಿಗೊಬ್ಬ 3‘ ನಂತರ ಸುದೀಪ್ ಹಿಂದಿಯ ‘ದಬಾಂಗ್ 3‘ ಸಿನಿಮಾದಲ್ಲಿ ನಟಿಸಲಿದ್ದಾರೆ. ಇದಾದ ನಂತರ ಅನುಪ್ ಭಂಡಾರಿ ನಿರ್ದೇಶನದಲ್ಲಿ ‘ಬಿಲ್ಲಾ ರಂಗ ಭಾಷಾ‘ ಸಿನಿಮಾ ಸೆಟ್ಟೇರಲಿದೆ. ಇವೆಲ್ಲಾ ಪ್ರಾಜೆಕ್ಟ್​​​​​ಗಳು ಮುಗಿದಾಗಲೇ ಇವರಿಬ್ಬರ ಕಾಂಬಿನೇಶನ್ ಸಿನಿಮಾ ಸೆಟ್ಟೇರಲಿದೆ. ಇನ್ನು ಸುದೀಪ್ ಅಭಿನಯದ ಬಹುನಿರೀಕ್ಷಿತ ‘ಪೈಲ್ವಾನ್‘ ಸಿನಿಮಾ ಈ ಆಗಸ್ಟ್​​​ನಲ್ಲಿ ತೆರೆ ಕಾಣುತ್ತಿದೆ.