ರಾಜಮೌಳಿ ಭಾರತೀಯ ಚಿತ್ರರಂಗಕ್ಕೆ ಸೂಪರ್ ಡೂಪರ್ ಚಿತ್ರಗಳನ್ನು ನೀಡಿರುವ ಹೆಸರಾಂತ ನಿರ್ದೇಶಕ. ಸ್ಟಾರ್ ನಟರು ಹೇಗೋ ಹಾಗೇ ಸ್ಟಾರ್ ನಿರ್ದೇಶಕ ಅನ್ನೋ ಪಟ್ಟ ಪಡೆದಿರುವ ಮಹಾ ಬುದ್ಧಿವಂತ. ಅದರಲ್ಲೂ ಬಾಹುಬಲಿ ಚಿತ್ರದ ನಂತರ ಭರತ ಖಂಡವಷ್ಟೇಯಲ್ಲ ಇಡೀ ವಿಶ್ವವೇ ಸೌಥ್ ಸಿನಿರಂಗದತ್ತ ತಿರುಗಿ ನೋಡುವಂತೆ ಮಾಡಿರುವ ಕಲಾತ್ಮಕ ಪಾತ್ರಗಳ ಪೋಷಕ.
ಹೌದು, ಮೇಲೆ ಹೇಳಿದ ಎಲ್ಲ ಪದಗಳು ರಾಜಮೌಳಿಗೆ ಸಿನಿಮಾಗಳ ಕುರಿತು ಇರುವ ಅಗಾಧ ಪಾಂಡಿತ್ಯ ಬಿಂಬಿಸುತ್ತವೆ. ಇವರ ಚಿತ್ರಗಳು ಸೆಟ್ಟೇರಿದಾಗಿನಿಂದ ಬಿಡುಗಡೆಯವರೆಗೂ ಸದ್ದು ಮಾಡುತ್ತವೆ. ಅದರಲ್ಲೂ ರಿಲೀಸ್ ಟೈಮಿನಲ್ಲಂತೂ ಸೌಥ್, ನಾರ್ಥ್, ಈಸ್ಟ್, ವೆಸ್ಟ್ಗಳಲ್ಲಿ ಹಬ್ಬದ ಸಂಭ್ರಮ ಮನೆ ಮಾಡಿರುತ್ತದೆ. ರಾಜಮೌಳಿ ಚಿತ್ರ ತೆರೆಗೆ ಬರುತ್ತಿದೆ ಅನ್ನೋ ಸುದ್ದಿ ತಿಳಿಯುತ್ತಿದ್ದಂತೆ ಬಿಡುಗಡೆಗೆ ರೆಡಿಯಾಗಿರುವಂತಹ ಚಿತ್ರಗಳು ಸೈಡಿಗೆ ಸರಿದು, ಮೂಲೆ ಹಿಡಿದು ಕುಳಿತು ಬಿಡುತ್ತವೆ. ಈ ಮಟ್ಟಿಗೆ ಹವಾ ಕ್ರಿಯೇಟ್ ಮಾಡುವ ರಾಜಮೌಳಿ ಸದ್ಯ ಆರ್ಆರ್ಆರ್ ಚಿತ್ರ ಕೈಗೆತ್ತಿಕೊಂಡಿದ್ದಾರೆ. ಇದು ಬಾಹುಬಲಿ ನಂತರ ಅವರ ಮೆಗಾ ಬಜೆಟ್ ಚಿತ್ರವಾಗಿದೆ.
ಹೀಗೆ ಅದ್ಭುತ ಚಿತ್ರಗಳ ಸೃಷ್ಟಿಕರ್ತ ರಾಜಮೌಳಿಯ ಬತ್ತಳಿಕೆಯಿಂದ ಸಾಕಷ್ಟು ಚಿತ್ರಗಳನ್ನು ಜನರು ನಿರೀಕ್ಷಿಸುತ್ತಿದ್ದಾರೆ. ಆದರೆ, ರಾಜಮೌಳಿ ಮಾತ್ರ ತಮ್ಮ ಕೊನೆಯ ಚಿತ್ರ ಯಾವುದಾಗಲಿದೆ ಎಂಬುದನ್ನು ರಿವೀಲ್ ಮಾಡುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ. ಮಹಾಭಾರತ ನನ್ನ ಕೊನೆಯ ಚಿತ್ರವಾಗಬಹುದು ಎಂದು ಗುರುವಾರ ನಡೆದ ಆರ್ಆರ್ಆರ್ ಚಿತ್ರದ ಮಾಧ್ಯಮಗೋಷ್ಟಿಯಲ್ಲಿ ಹೇಳಿದ್ದಾರೆ.
ಹಾಗೇ ನೋಡಿದ್ರೆ ರಾಜಮೌಳಿ ಬಾಹುಬಲಿ ನಂತರ ಮಹಾಭಾರತ ಚಿತ್ರ ಮಾಡಲಿದ್ದಾರೆ. ಇದರಲ್ಲಿ ಬಾಲಿವುಡ್ನ ಆಮೀರ್ ಖಾನ್, ಅಮಿತಾಭ್ ಬಚ್ಚನ್ ಸೇರಿದಂತೆ ಮಲ್ಟಿಸ್ಟಾರ್ಗಳು ನಟಿಸಲಿದ್ದಾರೆ. ಕರ್ನಾಟಕದ ಉದ್ಯಮಿವೋರ್ವ 1000 ಕೋಟಿ ಬಜೆಟ್ ಹೂಡಲಿದ್ದಾರೆ ಅನ್ನೋ ಮಾತು ಮುನ್ನೆಲೆಗೆ ಬಂದಿತ್ತು. ಆದರೆ, ಅಷ್ಟರಲ್ಲಾಗಲೇ ಆರ್ಆರ್ಆರ್ ಶೂಟಿಂಗ್ ಪ್ರಾರಂಭಿಸಿಬಿಟ್ರು ರಾಜಮೌಳಿ.
ನಿನ್ನೆ ಮಾಧ್ಯಮಗಳ ಪ್ರಶ್ನೆಗೆ ಮಹಾಭಾರತ ಚಿತ್ರದ ಕುರಿತು ಮಾತನಾಡಿದ ಅವರು, ಅದು ನನ್ನ ಡ್ರೀಮ್. ಇದನ್ನು ಸರಣಿ ರೂಪದಲ್ಲಿ ನಾನು ನಿರ್ದೇಶಿಸಬಹುದು. ಇದೇ ನನ್ನ ಕೊನೆಯ ಚಿತ್ರವಾಗಲೂಬಹುದು ಎಂದಿದ್ದಾರೆ.
