ಲಕ್ಷಾಂತರ ಬದುಕುಗಳನ್ನು ಕಟ್ಟಿದ ಗಿರೀಶ್​ ಭಾರದ್ವಾಜ್​ ಕುರಿತು ಬಯೋಪಿಕ್​

ದೇಶಾದ್ಯಂತ ಸುಮಾರು 139 ತೂಗು ಸೇತುವೆಗಳನ್ನು ಕಟ್ಟುವ ಮೂಲಕ 'ಬ್ರಿಡ್ಜ್​ ಮ್ಯಾನ್​ ಆಫ್​​​​​​​​​​​​​​​​​​​​ ಇಂಡಿಯಾ' ಎಂದೇ ಬಿರುದು ಪಡೆದ ಗಿರೀಶ್ ಭಾರಧ್ವಾಜ್ ಜೀವನ ಈಗ ಸಿನಿಮಾವಾಗಿ ತಯಾರಾಗುತ್ತಿದೆ. ಇತ್ತೀಚೆಗೆ ಸಿನಿಮಾ ಪೋಸ್ಟರ್ ಬಿಡುಗಡೆಯಾಗಿದ್ದು ಕೆಲವೇ ದಿನಗಳಲ್ಲಿ ಚಿತ್ರೀಕರಣ ಆರಂಭವಾಗಲಿದೆ.

'ದಿ ಬ್ರಿಡ್ಜ್​ ಮ್ಯಾನ್​ ಆಫ್​​​​​​​​​​​​​​​​​​​​ ಇಂಡಿಯಾ' ಎಂದೇ ಬಿರುದು ಪಡೆದಿರುವ ಹೆಮ್ಮೆಯ ಕನ್ನಡಿಗ ಗಿರೀಶ್​ ಭಾರದ್ವಾಜ್ ಅವರ ಬಗ್ಗೆ ಕೇಳಿರಬಹುದು. ದೇಶಾದ್ಯಂತ 240ಕ್ಕೂ ಹೆಚ್ಚು ಹಳ್ಳಿಗಳಿಗೆ ಸಂಪರ್ಕ ಕಲ್ಪಿಸಿ, ಮೂರು ಲಕ್ಷಕ್ಕೂ ಹೆಚ್ಚು ಜನರ ಕನಸು, ಬದುಕು ಮತ್ತು ಭಾವನೆಗಳಿಗೆ ತೂಗುಸೇತುವೆಗಳನ್ನು ನಿರ್ಮಿಸುವುದರ ಮೂಲಕ ದೇಶಾದ್ಯಂತ 139 ತೂಗುಸೇತುವೆಗಳನ್ನು ಕಟ್ಟಿ ದಾಖಲೆ ನಿರ್ಮಿಸಿದ್ದಾರೆ.

ಈ ಹೆಮ್ಮೆಯ ಕನ್ನಡಿಗನ ಸಾಧನೆಯನ್ನು ಗುರುತಿಸಿ ಭಾರತ ಸರ್ಕಾರವು ಕೆಲವು ವರ್ಷಗಳ ಹಿಂದೆ ಪದ್ಮಶ್ರೀ ಪ್ರಶಸ್ತಿಯನ್ನು ನೀಡಿ ಗೌರವಿಸಿದೆ. ಈಗ ಈ ಗಿರೀಶ್​ ಭಾರದ್ವಾಜ್​ ಅವರ ಕುರಿತು ಒಂದು ಬಯೋಪಿಕ್​ ನಿರ್ಮಾಣವಾಗುತ್ತಿದೆ. ಕನ್ನಡ ಮತ್ತು ಹಿಂದಿ ಭಾಷೆಗಳಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರವನ್ನು ಸಂತೋಷ್​ ಕೊಡಂಕೇರಿ ನಿರ್ದೇಶಿಸುತ್ತಿದ್ದಾರೆ. ಬರೀ ನಿರ್ದೇಶನವಷ್ಟೇ ಅಲ್ಲ, ಚಿತ್ರಕ್ಕೆ ಕಥೆ ಮತ್ತು ಚಿತ್ರಕಥೆಯನ್ನು ಅವರೇ ರಚಿಸಿದ್ದಾರೆ. ಚಿತ್ರಕ್ಕೆ 'ದಿ ಬ್ರಿಡ್ಜ್​ ಮ್ಯಾನ್'​ ಎಂದು ಹೆಸರಿಡಲಾಗಿದೆ. ಸದ್ಯಕ್ಕೆ ಈ ಚಿತ್ರಕ್ಕೆ ಪ್ರೀ-ಪ್ರೊಡಕ್ಷನ್​ ಕೆಲಸಗಳು ನಡೆಯುತ್ತಿದ್ದು, ಫೆಬ್ರವರಿಯಿಂದ ಚಿತ್ರೀಕರಣ ಪ್ರಾರಂಭವಾಗಲಿದೆ. ಗಿರೀಶ್​ ಭಾರದ್ವಾಜ್ ಅವರ ಪಾತ್ರಕ್ಕೆ ಸೂಕ್ತ ಕಲಾವಿದರ ಹುಡುಕಾಟ ನಡೆದಿದ್ದು, ಸದ್ಯದಲ್ಲೇ ಅಂತಿಮಗೊಳಿಸಲಾಗುತ್ತದೆ ಎಂದು ಚಿತ್ರತಂಡ ಮಾಹಿತಿ ನೀಡಿದೆ. ಇತ್ತೀಚೆಗೆ ಚಿತ್ರದ ಮೊದಲ ಪೋಸ್ಟರ್​ ಬಿಡುಗಡೆಯಾಗಿದ್ದು, ಚಿತ್ರಕ್ಕೆ ವಿನಯ್​ ಶರ್ಮ ಎನ್ನುವವರು ಸಂಗೀತ ಸಂಯೋಜಿಸುತ್ತಿದ್ದಾರೆ.