ಬಿಗ್ಬಾಸ್ ಖ್ಯಾತಿಯ ಭುವನ್ ಪೊನ್ನಣ್ಣ ಅಭಿನಯದ 'ರಾಂಧವ' ಭರ್ಜರಿ 25 ದಿನಗಳನ್ನು ಪೂರೈಸಿದೆ. ಬೆಂಗಳೂರಿನಲ್ಲೇ ಸುಮಾರು 6 ಚಿತ್ರಮಂದಿರಗಳಲ್ಲಿ 'ರಾಂಧವ' ಚಿತ್ರ ಯಶಸ್ವಿಯಾಗಿ 25 ದಿನಗಳನ್ನು ಪೂರೈಸಿದ್ದು ಚಿತ್ರತಂಡ ಪುಲ್ ಖುಷ್ ಆಗಿದೆ. ಅಲ್ಲದೆ ಇಂದು ಭುವನ್ ತಮ್ಮ ಅಭಿಮಾನಿಗಳ ಜೊತೆ ಕೇಕ್ ಕಟ್ ಮಾಡಿ ಸಂಭ್ರಮಿಸಿದರು.
ತುಮಕೂರು, ರಾಮನಗರ, ಮಂಡ್ಯ ಹಾಗೂ ಹಾಸನದಿಂದ ಬಂದಿದ್ದ ಭುವನ್ ಅಭಿಮಾನಿಗಳು ಭುವನ್ಗೆ ಜೈಕಾರ ಹಾಕುವ ಮೂಲಕ 'ರಾಂಧವ' ಸಿನಿಮಾ ನೂರು ದಿನಗಳನ್ನು ಪೂರೈಸಲಿ, ಭುವನ್ ಮುಂದಿನ ದಿನಗಳಲ್ಲಿ ಒಳ್ಳೆಯ ಚಿತ್ರಗಳನ್ನು ಮಾಡಲಿ ನಾವು ಸದಾ ಅವರ ಬೆನ್ನಿಗೆ ಇರುತ್ತೇವೆ ಎಂದು ಹೇಳಿ ಚಿತ್ರತಂಡಕ್ಕೆ ಶುಭ ಹಾರೈಸಿದರು. ಇನ್ನು ತಮ್ಮ ಸಿನಿಮಾ 25 ದಿನಗಳನ್ನು ಪೂರೈಸಿರುವುದಕ್ಕೆ ಸಂತೋಷ ವ್ಯಕ್ತಪಡಿಸಿದ ಭುವನ್, ರಾಂಧವ-2 ಸಿನಿಮಾ ಮಾಡುವುದಾಗಿ ಹೇಳಿದರು. ತಮಿಳಿನ ಒಂದು ಚಿತ್ರದಲ್ಲಿ ನಟಿಸುತ್ತಿದ್ದು ಆದಷ್ಟು ಬೇಗ ಕನ್ನಡದಲ್ಲಿ ಹೊಸ ಚಿತ್ರವನ್ನು ಅನೌನ್ಸ್ ಮಾಡುವುದಾಗಿ ತಿಳಿಸಿದರು. ಇನ್ನು ನಿರ್ದೇಶಕ ಸುನಿಲ್ ಆಚಾರ್ಯ ಮಾತನಾಡಿ, ನಮ್ಮ ಸಿನಿಮಾದೊಂದಿಗೆ 'ಸಾಹೋ' ಅಂತಹ ದೊಡ್ಡ ಸಿನಿಮಾ ಬಂದರೂ ಕನ್ನಡಿಗರು 'ರಾಂಧವ' ಸಿನಿಮಾವನ್ನು ಕೈ ಬಿಡಲಿಲ್ಲ. ರಾಜ್ಯಾದ್ಯಂತ ಸುಮಾರು 20 ಕ್ಕೂ ಹೆಚ್ಚಿನ ಚಿತ್ರಮಂದಿರಗಳಲ್ಲಿ ನಮ್ಮ ಸಿನಿಮಾ ಒಳ್ಳೆ ಕಲೆಕ್ಷನ್ ಮಾಡುತ್ತಾ ಪ್ರದರ್ಶನವಾಗುತ್ತಿದೆ. ಅಲ್ಲದೆ ಭುವನ್ ಹೇಳಿದಂತೆ ರಾಂಧವ-2 ಸಿನಿಮಾ ಮಾಡಲು ಈಗಾಗಲೇ ಪ್ಲ್ಯಾನ್ ಮಾಡಿದ್ದೇವೆ. ಸ್ಕ್ರಿಪ್ಟ್ ವರ್ಕ್ ಎಲ್ಲಾ ಮುಗಿಸಿ ಶೀಘ್ರದಲ್ಲೇ ರಾಂಧವ-2 ಅನೌನ್ಸ್ ಮಾಡುವುದಾಗಿ ಸುನಿಲ್ ತಿಳಿಸಿದರು.
