ಕಾತರದಿಂದ ಕಾಯುತ್ತಿದ್ದ ಅನುಬಂಧ ಅವಾರ್ಡ್ಸ್ ಪ್ರೇಕ್ಷಕರನ್ನು ರಂಜಿಸಲು ಮರಳಿ ಬಂದಿದೆ. ಕೆಲವು ವಾರಗಳ ಹಿಂದೆಯಷ್ಟೇ ನಡೆದಿದ್ದ ಈ ಕಾರ್ಯಕ್ರಮ ಈ ವಾರಾಂತ್ಯಕ್ಕೆ ಪ್ರೇಕ್ಷಕರಿಗೆ ಮನರಂಜನೆಯ ಮಹಾಪೂರವನ್ನು ಹರಿಸಲಿದೆ. ಈ ಬಾರಿ ಕಳೆದ ಕಾರ್ಯಕ್ರಮಗಳಿಗಿಂತ ವಿಭಿನ್ನವಾಗಿರಲಿದ್ದು, 15 ,16,17 ರಂದು ಮೂರು ದಿನಗಳ ಕಾಲ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಲಿದೆ.
ಸತತ ಏಳು ವರ್ಷಗಳಿಂದ ಪ್ರಸಾರವಾಗುತ್ತಿರುವ ಅನುಬಂಧ ಕಾರ್ಯಕ್ರಮದಲ್ಲಿ ವಾಹಿನಿ ಯುವನಟ ಹಾಗೂ ಶೋಗಳಿಗೆ ಪ್ರಶಸ್ತಿ ನೀಡುತ್ತಿದೆ. ಇದರ ಹೊರತಾಗಿ ವಾಹಿನಿಯು ಕೇವಲ ಕಲಾವಿದರಿಗೆ ಮಾತ್ರ ಅವಕಾಶ ನೀಡುವುದಲ್ಲದೇ ತಾಂತ್ರಿಕ ವರ್ಗದವರಿಗೂ ಮನ್ನಣೆ ನೀಡಲು ಮುಂದಾಗಿದೆ.
ಜನ ಮೆಚ್ಚಿದ ನಾಯಕ , ಜನ ಮೆಚ್ಚಿದ ನಾಯಕಿ,ಜನ ಮೆಚ್ಚಿದ ಸಂಸಾರ, ಸ್ಟೈಲ್ ಐಕಾನ್, ಯೂತ್ ಐಕಾನ್ ಪ್ರಶಸ್ತಿಗಳು ಜನರ ವೋಟಿಂಗ್ ಮೇಲೆ ಅವಲಂಬಿತವಾಗಿವೆ. ಕನ್ನಡ ಚಿತ್ರರಂಗದ ಅಭಿನಯ ಚಕ್ರವರ್ತಿ ಸುದೀಪ್ ಮೊದಲ ಬಾರಿಗೆ ಅನುಬಂಧ ಪ್ರಶಸ್ತಿಯ ಭಾಗವಾಗಿರಲಿದ್ದಾರೆ. ಇವರಲ್ಲದೇ ದೊಡ್ಡಣ್ಣ, ಪ್ರಿಯಾಂಕ ಉಪೇಂದ್ರ, ಹಂಸಲೇಖ , ಡಾರ್ಲಿಂಗ್ ಕೃಷ್ಣ, ಮಿಲನಾ ನಾಗರಾಜ್ ಸೇರಿದಂತೆ ಮುಂತಾದ ಸಿನಿರಂಗದ ಕಲಾವಿದರು ಪಾಲ್ಗೊಳ್ಳಲಿದ್ದಾರೆ.
ಈ ಬಾರಿ ಅನುಬಂಧ ಅವಾರ್ಡ್ಸ್ ವಿಶೇಷವಾಗಿರಲಿದ್ದು ನಟಿಯರಾದ ರಚಿತಾ ರಾಮ್ ಹಾಗೂ ಹರಿಪ್ರಿಯಾ ಶೋ ನಿರೂಪಣೆ ಮಾಡಲಿದ್ದಾರೆ. ತೆರೆಯ ಮೇಲೆ ರಂಜಿಸಿರುವ ಈ ನಾಯಕಿಯರು ಈಗ ನಿರೂಪಕಿಯಾಗಿಯೂ ಗಮನ ಸೆಳೆಯಲಿದ್ದಾರೆ. ಇವರ ಹೊರತಾಗಿ ಸೃಜನ್ ಲೋಕೇಶ್ , ಅಕುಲ್ ಬಾಲಾಜಿ , ಶೈನ್ ಶೆಟ್ಟಿ ಕೂಡಾ ನಿರೂಪಕರಾಗಿ ಕಾಣಿಸಿಕೊಳ್ಳಲಿದ್ದಾರೆ.
