ನಿನ್ನೆಯಷ್ಟೇ ವಿಜಯ್ ಪ್ರಸಾದ್ ನಿರ್ದೇಶಿಸುತ್ತಿರುವ 'ಪರಿಮಳ ಲಾಡ್ಜ್' ಸಿನಿಮಾ ಸೆಟ್ಟೇರಿದೆ. ಇನ್ನು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಕೂಡಾ ಚಿತ್ರದ ಟೀಸರ್ ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭ ಕೋರಿದ್ದಾರೆ. ಬ್ಯೂಟಿಫುಲ್ ಮನಸ್ಸುಗಳು ನಿರ್ಮಾಪಕ ಪ್ರಸನ್ನ ಪರಿಮಳ ಲಾಡ್ಜ್ ಸಿನಿಮಾವನ್ನು ನಿರ್ಮಿಸುತ್ತಿದ್ದಾರೆ.
ಈ ಚಿತ್ರದ ಟೀಸರ್ ಸದ್ಯಕ್ಕೆ, ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಬರೋಬ್ಬರಿ ಐದು ಲಕ್ಷ ಜನ ಒಂದೇ ದಿನದಲ್ಲಿ ಈ ಟೀಸರ್ ನೋಡಿದ್ದಾರೆ. ಚಿತ್ರದ ಟೀಸರ್ ಆರಂಭದ ಟೈಟಲ್ ಕಾರ್ಡಿನಲ್ಲಿ 'ಲಾಡ್ಜ್ನಲ್ಲಿ ಸಲಿಂಗಕಾಮಿಗಳು' ಎಂಬ ಹೆಡ್ಲೈನ್ ಕೆಳಗೆ ನೀನಾಸಂ ಸತೀಶ್ ಹಾಗೂ ಯೋಗೇಶ್ (ಲೂಸ್ ಮಾದ) ಎಂದು ಬರೆಯಲಾಗಿದೆ. ಇದು ಟ್ರೋಲ್ ಪೇಜ್ ಹಾಗೂ ಸೋಷಿಯಲ್ ಮೀಡಿಯಾದಲ್ಲಿ ಚರ್ಚೆಗೆ ಕಾರಣವಾಗಿದೆ. ಹಾಗಾದ್ರೆ ಈ ಚಿತ್ರದಲ್ಲಿ ನೀನಾಸಂ ಸತೀಶ್ ಹಾಗೂ ಲೂಸ್ ಮಾದ ಯೋಗೇಶ್ ಸಲಿಂಗಕಾಮಿಗಳಾಗಿ ಈ ಚಿತ್ರದಲ್ಲಿ ಅಭಿನಯಿಸುತ್ತಿದ್ದಾರಾ ಎಂಬ ಅನುಮಾನ ಹುಟ್ಟಿದೆ. ಇನ್ನು ಕೆಲವರಂತೂ ಇಲ್ಲಸಲ್ಲದ ಕಮೆಂಟ್ ಕೂಡಾ ಮಾಡುತ್ತಿದ್ದಾರೆ.
ಇದನ್ನು ಗಮನಿಸಿರುವ ನೀನಾಸಂ ಸತೀಶ್ 'ನಾವು ಖಂಡಿತ ಸಲಿಂಗಕಾಮಿಗಳಲ್ಲ, ಚಿತ್ರದ ಟೈಟಲ್ ಕಾರ್ಡ್ ವಿಭಿನ್ನವಾಗಿ ಬರಲಿ ಎಂದು ನಿರ್ದೇಶಕ ವಿಜಯ್ ಪ್ರಸಾದ್ ಈ ರೀತಿ ಬಳಸಿಕೊಂಡಿದ್ದಾರೆ. ಸಿನಿಮಾದಲ್ಲಿ ಅಂಥಾದ್ದು ಏನೂ ಇಲ್ಲ. ಚಿತ್ರದಲ್ಲಿ ಯಾವುದೇ ವಲ್ಗಾರಿಟಿ ಕೂಡಾ ಇಲ್ಲ. ಕಮೆಂಟ್ ನೋಡಿ ನನಗೆ ನಿಜಕ್ಕೂ ಶಾಕ್ ಆಗಿದೆ. ಹೀಗೆಲ್ಲಾ ಮಾಡಬೇಡಿ, ವಿಜಯ್ ಪ್ರಸಾದ್ ಒಂದೊಳ್ಳೆ ಸಿನಿಮಾ ಮಾಡಲು ಹೊರಟಿದ್ದಾರೆ ಎಂದು ಸೆಲ್ಫಿ ವಿಡಿಯೋ ಮೂಲಕ ಜನರಿಗೆ ಮನವಿ ಮಾಡಿದ್ದಾರೆ.
