ಗೋಲ್ಡನ್ ಸ್ಟಾರ್ ಗಣೇಶ್ ವೃತ್ತಿ ಜೀವನದಲ್ಲಿ ಒಂದು ಸಂಕಷ್ಟದ ದಿನ ಎದುರಿಸಿದ್ದಾರೆ. ಆಗಸ್ಟ್ 27, 2018 ರಂದು ಅವರ ತಂದೆ ರಾಮಕೃಷ್ಣ (84) ಕಾಲವಾದಾಗ ಒಂದು ಸಂದಿಗ್ಧ ಪರಿಸ್ಥಿತಿ ಗಣೇಶ್ ಅವರಿಗೆ ಎದುರಾಗಿತ್ತು. ಅಂದು ಸಾವಿನ ಸುದ್ದಿ ಗಣೇಶ್ಗೆ ತಲುಪಿದಾಗ ಅವರು ಗಿಮಿಕ್ ಚಿತ್ರದ ಸೆಟ್ಲ್ಲಿದ್ದರು. ಅಂದು ಎಲ್ಲ ಕಲಾವಿದರು ಒಂದು ದೀರ್ಘವಾದ ಹಾಸ್ಯಮಯ ಸನ್ನಿವೇಶ ಚಿತ್ರೀಕರಣಕ್ಕೆ ಅಣಿಯಾಗಿದ್ದರು. ಗಣೇಶ್ ಅವರ ತಂದೆ ಸಾವನ್ನಪ್ಪಿರುವುದನ್ನು ನಿರ್ದೇಶಕ ನಾಗಣ್ಣ ಅವರಿಗೆ ತಿಳಿಸಿರಲಿಲ್ಲ. ಅಲ್ಲಿ ಇದ್ದವರಲ್ಲಿ ನಿರ್ಮಾಪಕ ದೀಪಕ್ ಸ್ವಾಮಿ ಹಾಗೂ ನಟ ರವಿಶಂಕರ್ ಗೌಡ ಅವರಿಗೆ ಮಾತ್ರ ಈ ವಿಚಾರ ಗೊತ್ತಿತ್ತು.
ಅದು ಗಣೇಶ್ ಪ್ರೀತಿಸಿದ (ಮೋನಿಕಾ ಸಿಂಗ್) ಹುಡುಗಿಯ ಹೆಣ್ಣು ಕೇಳಲು ಹೋಗುವ ಹಾಸ್ಯ ಸನ್ನಿವೇಶ. ಹೆಣ್ಣಿನ ತಂದೆ ಶೋಭರಾಜ್ ಪಟಪಟನೆ ಪ್ರಶ್ನೆ ಕೇಳುವುದಕ್ಕೆ ಗಣೇಶ್ ಉತ್ತರ ನೀಡಬೇಕಾಗಿತ್ತು. ಅದು ಪ್ರೇಕ್ಷಕರಿಗೆ ಖುಷಿ ಕೊಡುವ ಸನ್ನಿವೇಶ ಅಂತ ಗಣೇಶ್ ಅವರಿಗೆ ಗೊತ್ತಿತ್ತು. ಆದರೆ, ಅದನ್ನು ಅವರು ಬಹಳ ಭಾರವಾದ ಮನಸ್ಸಿನಿಂದ ಮಾಡಬೇಕಾಯಿತು. ಅಪ್ಪನ ಸಾವಿನ ದುಃಖದ ನಡುವೆಯೂ 5 ರಿಂದ 10 ಪೇಜ್ ಸಂಭಾಷಣೆ ಒಪ್ಪಿಸುತ್ತಿದ್ದ ಗಣೇಶ್ ಅವರಿಗೆ ಕೆಲವು ಸಾಲುಗಳನ್ನು ಹೇಳಲು ಕಷ್ಟವಾಗಿತ್ತು.
ಇನ್ನು ಗಣೇಶ್ ಹಾಗೂ ಅವರ ತಂದೆ ಒಳ್ಳೆಯ ಸ್ನೇಹಿತರಂತೆ ಇದ್ದರು. ಹೋಗೋ-ಬಾರೋ ಅವರ ಮಾತಿನ ಶೈಲಿಯಾಗಿತ್ತು. ಗಣೇಶ್ ಅವರ ಸಿನಿಮಾಗಳು ಬಿಡುಗಡೆ ಆದಾಗ ಮಗನಿಗೆ ಫೋನ್ ಮಾಡುತ್ತಿದ್ದರಂತೆ. ಗಣೇಶ್ ಅವರ ಕೆಲವು ಸಿನಿಮಾಗಳನ್ನು ಅವರ ತಂದೆ ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಜೀವನಕ್ಕೆ ಬೇಕಾದ ಎಲ್ಲ ಸೌಕರ್ಯ ಗಣೇಶ್ ಒದಗಿಸಿಕೊಟ್ಟಿದ್ದರು. ಆಗೊಮ್ಮೆ ಈಗೊಮ್ಮೆ ಜೊತೆ ಊಟ ಮಾಡುವಾಗ ಎನ್ ಬೇಕು ರಾಮಕೃಷ್ಣ ಅಂತ ಗಣೇಶ್ ಕೇಳಿದರೆ ಏನಾದ್ರೂ ಮೆತ್ತಗೆ ಇರೋದ್ ತರ್ಸಪ್ಪ ಅಂತ ಹೇಳ್ತಿದ್ದರಂತೆ.
ಅಪ್ಪನ ಜತೆಗಿನ ಒಡನಾಟ ಮೆಲುಕು ಹಾಕಿರುವ ಗಣೇಶ್, ನಾನು ಸಹ 19ನೇ ವಯಸ್ಸಿನಲ್ಲಿ 40 ರೂಪಾಯಿ ಇಟ್ಟುಕೊಂಡು ಬೆಂಗಳೂರಿಗೆ ಬಂದವನು. ಅಪ್ಪ ಚಿಕ್ಕ ವಯಸ್ಸಿನಲ್ಲಿ ಹೊಡೆಯುತ್ತಾ ಇದ್ದರು. ಅವರಿಗೆ ತಿಳಿಯದೆ ಅವರ ಸ್ಕೂಟರ್ ಓಡಿಸುತ್ತಿದ್ದಿದ್ದು, ಬಡತನ....ಹೀಗೆ ಅನೇಕ ನೆನಪುಗನ್ನು ಗಣೇಶ್ ಹಂಚಿಕೊಂಡರು.
