ಓಟಿಟಿಯಲ್ಲಿ ಸಿನಿಮಾ ನೋಡಲಿ ಅನ್ನೋದು ಮುಖೇಶ್​ ಅಂಬಾನಿ ಉದ್ದೇಶ: ನಟ ದರ್ಶನ್​ ಕಿಡಿ

ಕೊರೊನಾದಿಂದ ಚಿತ್ರರಂಗದ ಮೇಲೆ ಅವರಿಸಿರುವ ಕರಿ ಮೋಡ ಸರಿದಿಲ್ಲ. ಪ್ರೇಕ್ಷಕರು ಚಿತ್ರಮಂದಿರಗಳಲ್ಲಿ ಸಿನಿಮಾ ನೋಡಿ ಹತ್ತು ತಿಂಗಳು ಕಳೆಯುತ್ತಿದೆ. ಹೀಗಾಗಿ ಸಿನಿ ಪ್ರಿಯರು ಓಟಿಟಿ ಪ್ಲಾಟ್ ಫಾರಂನಲ್ಲಿ ಸಿನಿಮಾ ನೋಡುವ ಟ್ರೆಂಡ್ ಉದ್ಭವಿಸಿದೆ. ಇದಕ್ಕೆ ಮುಖೇಶ್ ಅಂಬಾನಿ ಕಾರಣ ಎಂದು ದರ್ಶನ್ ಕಿಡಿ ಕಾರಿದ್ದಾರೆ.

ಬೆಂಗಳೂರು: ಮುಖೇಶ್ ಅಂಬಾನಿ 5ಜಿ ಸೇವೆ ಆರಂಭಿಸಿದ್ದಾರೆ. ಹೀಗಾಗಿ ಓಟಿಟಿಯಲ್ಲಿ ಸಿನಿಮಾ ನೋಡಲಿ ಅನ್ನೋದು ಅವರ ಉದ್ದೇಶ. ಇದೊಂದು ದೊಡ್ಡ ಹಗರಣವೆಂದು ನಟ ಚಾಲೆಜಿಂಗ್​ ಸ್ಟಾರ್​ ದರ್ಶನ್ ಮುಖೇಶ್ ಅಂಬಾನಿ ವಿರುದ್ಧ ಕಿಡಿ ಕಾರಿದ್ದಾರೆ.

ನಿನ್ನೆ ದರ್ಶನ್​ ಫೇಸ್​ಬುಕ್​ ಲೈವ್​ ಬಂದ ವೇಳೆ ಓಟಿಟಿ ಬಗ್ಗೆ ಅಭಿಮಾನಿಯೊಬ್ಬರು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅವರು, ಅಂಬಾನಿ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ. ಸಿನಿಮಾವನ್ನು ಓಟಿಟಿ, ಟಿವಿಯಲ್ಲಿ ನೋಡಿದರೆ ಮಜಾ ಬರಲ್ಲ. ನಿರ್ಮಾಪಕರು ಎಲ್ಲಿಂದನೋ ದುಡ್ಡು ತರುತ್ತಾರೆ. ಜನರಿಗೆ ಮನರಂಜನೆ ನೀಡುವ ಉದ್ದೇಶದಿಂದ ನಾವೆಲ್ಲ ಜೀವನವನ್ನು ಪಣಕ್ಕಿಟ್ಟು ಸಿನಿಮಾ ಮಾಡುತ್ತೇವೆ.

ಶಾಲಾ-ಕಾಲೇಜುಗಳು ತೆರೆದಿವೆ. ಮದುವೆ ಮಂಟಪದಲ್ಲಿ ಸಾವಿರಾರು ಮಂದಿ ಸೇರುತ್ತಿದ್ದಾರೆ. ಮಾರುಕಟ್ಟೆಯಲ್ಲಿ ಜನ ಓಡಾಡಿಕೊಂಡಿದ್ದಾರೆ. ಆದರೆ ಚಿತ್ರಮಂದಿರಗಳನ್ನು ಮಾತ್ರ ತೆರೆಯುತ್ತಿಲ್ಲ. ಏಕೆಂದರೆ ಇದರ ಹಿಂದೆ 5ಜಿ ಉದ್ದೇಶವಿದೆ ಎಂದು ಮುಖೇಶ್ ಅಂಬಾನಿ ಬಗ್ಗೆ ನಟ ದರ್ಶನ್​ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.