ಬೆಂಗಳೂರು: ಸ್ಯಾಂಡಲ್ವುಡ್ನಲ್ಲಿ ಸಂಚಲನ ಸೃಷ್ಟಿಸಿದ್ದ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಹೆಸರಲ್ಲಿ ವಂಚನೆ ಪ್ರಕರಣ ಇಂದು ಅನೇಕ ಬೆಳವಣಿಗೆಗೆ ಕಾರಣವಾಗಿತ್ತು. ದರ್ಶನ್ ಹಾಗೂ ನಿರ್ಮಾಪಕ ಉಮಾಪತಿ ಖಾಸಗಿ ಹೋಟೆಲ್‌ನಲ್ಲಿ ಭೇಟಿಯಾಗಿ ಚರ್ಚಿಸಿದ್ದು, ಇಷ್ಟು ದಿನದ ವಿವಾದಕ್ಕೆ ಪೂರ್ಣ ವಿರಾಮ ನೀಡುವ ಸುಳಿವು ಸಿಕ್ಕಿದೆ.
ದರ್ಶನ್ ಮಾಡಿರುವ ಆರೋಪಗಳಿಗೆ ಈಗಾಗಲೇ ಉಮಾಪತಿ ಸ್ಪಷ್ಟನೆ ನೀಡಿದ್ದಾರೆ. ಇಂದು ಮಧ್ಯಾಹ್ನದ ಹೊತ್ತಿಗೆ, ನಿರ್ದೇಶಕ ಹಾಗು ಸಾಹಿತಿ ವಿ.ನಾಗೇಂದ್ರ ಪ್ರಸಾದ್ ಹಾಗೂ ಸ್ನೇಹಿತ ನಾಗವರ್ಧನ್, ದರ್ಶನ್ ಹಾಗೂ ಉಮಾಪತಿಯವರನ್ನು ಭೇಟಿಯಾಗಿ ಈ ಹಿಂದೆ ಅರುಣಾ ಕುಮಾರಿ ತಮಗೂ ಮೋಸ ಮಾಡಿದ್ದಾರೆಂದು ದಾಖಲೆಗಳನ್ನು ತೋರಿಸಿದ್ದಾರೆ.
ಈ ಬೆಳವಣಿಗೆಗೆ ಬಳಿಕ ದರ್ಶನ್ ಹಾಗೂ ಉಮಾಪತಿ ಜನತಾ ಬಜಾರ್ ಬಳಿ ಇರೋ ಅಪಾರ್ಟ್‌ಮೆಂಟ್ ಒಂದರಲ್ಲಿ ಒಟ್ಟಿಗೆ ಮಾತುಕತೆ ನಡೆಸಿದ್ದಾರಂತೆ. ಮುಂದೆ ಈ ವಿಚಾರದಲ್ಲಿ ಯಾವುದೇ ಗೊಂದಲ ಬೇಡ ಎಂದು ತೀರ್ಮಾನಿಸಿಕೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಇನ್ನು ದರ್ಶನ್, ಹರ್ಷ, ರಾಕೇಶ್ ಶರ್ಮಾ, ರಾಕೇಶ್ ಪಾಪಣ್ಣ ನಡುವೆ ಇದ್ದ ಗೊಂದಲವೂ ಸಹ ಇತ್ಯರ್ಥವಾಗಿದೆ.
ಈ ಪ್ರಕರಣ ಇಲ್ಲಿಗೇ ಅಂತ್ಯ ಆಗಿದೆ. ನಾವೆಲ್ಲ ಸೇರಿ ಆರೋಪಿ ಅರುಣಾ ಕುಮಾರಿ ವಿರುದ್ಧ ಕಾನೂನು ಹೋರಾಟ ಮಾಡ್ತೇವೆ. ಯಾಕಂದ್ರೆ ಆ ಲೇಡಿಯನ್ನು ಹೀಗೇ ಬಿಟ್ರೆ ಬೇರೆಯವರಿಗೂ ಮೋಸ ಮಾಡ್ತಾಳೆ. ಅವಳಿಗೆ ಕಾನೂನು ಹೋರಾಟದ ಮೂಲಕವೇ ಪಾಠ ಕಲಿಸ್ತೀವಿ ಅಂತಾ ಇಬ್ಬರೂ ತೀರ್ಮಾನಿಸಿರುವ ಮಾಹಿತಿ ದೊರೆತಿದೆ.
