ಮುಂಬೈ: ಯುವ ನಟ ಸುಶಾಂತ್ ಸಿಂಗ್ ರಜಪೂತ್ ಆತ್ಮಹತ್ಯೆ ಬಳಿಕ ಮುಂಬೈ ಪೊಲೀಸರು ಅನೇಕರ ವಿಚಾರಣೆ ನಡೆಸುತ್ತಿದ್ದಾರೆ. ಇದೀಗ ಕಾಸ್ಟಿಂಗ್ ನಿರ್ದೇಶಕ ಶಾನೋ ಶರ್ಮಾ ಅವರನ್ನು ವಿಚಾರಣೆಗೊಳಪಡಿಸಲಾಗಿದೆ.
ಯಶ್ ರಾಜ್ ಫಿಲ್ಮಂ ಸಂಸ್ಥೆಯಲ್ಲಿ ಕಾಸ್ಟಿಂಗ್ ಡೈರೆಕ್ಟರ್ ಆಗಿರುವ ಶಾನೋ ಅವರನ್ನು ಇಲ್ಲಿನ ಬಾಂದ್ರಾ ಪೊಲೀಸ್ ಠಾಣೆಯಲ್ಲಿ ವಿಚಾರಣೆಗೊಳಪಡಿಸಲಾಗಿದೆ. ಇದಕ್ಕೂ ಮುನ್ನ ಪೊಲೀಸರು ಸುಶಾಂತ್ ಕುಟುಂಬಸ್ಥರು ಅಂದರೆ ತಂದೆ, ಸಹೋದರಿ, ಸ್ನೇಹಿತರು, ಗರ್ಲ್ಫ್ರೆಂಡ್ ಎನ್ನಲಾಗಿದ್ದ ರಿಯಾ ಚಕ್ರಬೊರ್ತಿ ಹಾಗೂ ಸುಶಾಂತ್ ನಟಿಸಬೇಕಿದ್ದ ದಿಲ್ ಬೆಚಾರ ಸಿನಿಮಾದ ನಿರ್ದೇಶಕ ಮುಖೇಶ್ ಛಾಬ್ರಾ ಸೇರಿ ಒಟ್ಟು 23 ಮಂದಿಯನ್ನು ವಿಚಾರಣೆ ನಡೆಸಿದ್ದಾರೆ.
ಮುಂಬೈ ಪೊಲೀಸರ ತನಿಖೆಯ ನಡುವೆಯೂ ಸುಶಾಂತ್ ಸಾವಿನ ಕುರಿತಾಗಿ ಬಾಲಿವುಡ್ ನಟ ಶೇಖರ್ ಸುಮನ್ #justiceforSushantforum ಎಂಬ ಅಭಿಯಾನವನ್ನೇ ಆರಂಭಿಸಿದ್ದರು. ಅಲ್ಲದೆ ಪ್ರಕರಣವನ್ನು ಸಿಬಿಐಗೆ ವಹಿಸಬೇಕೆಂದು ಆಗ್ರಹಿಸಿ ಟ್ವಿಟರ್ನಲ್ಲಿ ದೊಡ್ಡ ಕ್ಯಾಂಪೇನ್ ನಡೆಸಿದ್ದರು.
ಈ ನಡುವೆ ಸುಶಾಂತ್ ಮರಣೋತ್ತರ ವರದಿಯಲ್ಲಿಯೂ ಆತ್ಮಹತ್ಯೆಯಿಂದಲೇ ಸಾವು ಸಂಭವಿಸಿದೆ ಎಂದು ತಿಳಿಸಲಾಗಿದೆ. ಈ ವರದಿಯಲ್ಲಿ ಸಾವಿಗೂ ಮುನ್ನ ಅವರು ಯಾವುದೇ ಕಷ್ಟ ಪಟ್ಟಂತೆ ಕಂಡು ಬಂದಿಲ್ಲ. ಉಗುರುಗಳಲ್ಲಿಯೂ ಏನೂ ಪತ್ತೆಯಾಗಿಲ್ಲ ಎಂದು ಸ್ಪಷ್ಟವಾಗಿ ತಿಳಿಸಿದೆ.
ಸುಶಾಂತ್ ಈಗಾಗಲೇ ಯಶ್ ರಾಜ್ ಫಿಲ್ಮಂ ಬ್ಯಾನರ್ನಲ್ಲಿ ಎರಡು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಮೂರನೇ ಸಿನಿಮಾ ‘ಪಾನಿ’ಯಲ್ಲಿ ನಟಿಸಬೇಕಿತ್ತು. ಆದರೆ, ವೈಆರ್ಎಫ್ ಸಂಸ್ಥೆ ಈ ಪ್ರಾಜೆಕ್ಟ್ನಿಂದ ಹಿಂದೆ ಸರಿದಿತ್ತು ಎನ್ನಲಾಗಿದೆ.
