ಚಂದನವನದ ಸಿನಿ ಟಾಕೀಸ್ನಲ್ಲಿ ಸದ್ಯದಲ್ಲೇ ಮಹತ್ತರವಾದ ಪ್ರಸಂಗವೊಂದನ್ನು ಕಣ್ತುಂಬಿಕೊಳ್ಳುವ ಅವಕಾಶ ಒದಗಿಬರಲಿದೆ. ಚಿತ್ರಸಂತೆಯಲ್ಲಿ ಬಾಲಿವುಡ್ ಹಾಗೂ ಸ್ಯಾಂಡಲ್ವುಡ್ ಎರಡೂ ಸಂಗಮವಾಗಲಿದ್ದು ಇದಕ್ಕೆ ದೊಡ್ಡ ತಾರಾ ಬಳಗವೇ ಸಾಕ್ಷಿಯಾಗಲಿದೆ. ಭಜರಂಗಿ ಭಾಯಿಜಾನ್ ಸಲ್ಮಾನ್ ಖಾನ್ ನಟನೆಯ ದಬಾಂಗ್ 3 ಸಿನಿಮಾದಲ್ಲಿ ಸ್ಯಾಂಡಲ್ವುಡ್ನ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಮುಖ್ಯಪಾತ್ರವೊಂದಕ್ಕೆ ಬಣ್ಣ ಹಚ್ಚಿದ್ದು ತಮಗೆಲ್ಲ ತಿಳಿದಿರುವ ಸಂಗತಿಯಾದರೂ ಇದಕ್ಕಿಂತ ಖುಷಿ ಕೊಡುವ ಮತ್ತೊಂದು ಸುದ್ದಿ ಸದ್ದು ಮಾಡುತ್ತಿದೆ.
ಅದೆನಪ್ಪಾ ಅಂದ್ರೆ ದಬಾಂಗ್ 3 ಸಿನಿಮಾ ಕನ್ನಡದ ಸೇರಿದಂತೆ ಒಟ್ಟು ನಾಲ್ಕು ಭಾಷೆಯಲ್ಲಿ ಬಿಡುಗಡೆಯಾಗಲಿದ್ದು ಇದಕ್ಕಾಗಿ ನಟ ಸಲ್ಮಾನ್ ಖಾನ್ ಕನ್ನಡ ಕಲಿಯುತ್ತಿದ್ದಾರಂತೆ. ಕನ್ನಡಕ್ಕೆ ಡಬ್ ಆಗಲಿರುವ ಈ ಸಿನಿಮಾದಲ್ಲಿ ಮಾಸ್ ಹಾಗೂ ಕ್ಲಾಸ್ ಡೈಲಾಗ್ ಹೇಳಲಿರುವ ಭಾಯಿಜಾನ್ಗೆ ಸುದೀಪ್ ಸಾಥ್ ನೀಡಿದ್ದಾರೆ ಅನ್ನೋ ಸುದ್ದಿ ಇದೀಗ ಗುಟ್ಟಾಗಿ ಉಳಿದಿಲ್ಲ.
ಇನ್ನು ಮತ್ತೊಬ್ಬ ಕನ್ನಡಿಗ ಪ್ರಭುದೇವ್ ದಬಾಂಗ್ 3 ಸಿನಿಮಾಗೆ ನಿರ್ದೇಶನ ನೀಡಿದ್ದು ಚಿತ್ರ ಡಿಸೆಂಬರ್ 20 ರಂದು ಬಿಡುಗಡೆಯಾಗಲಿದೆ. ಚಿತ್ರದಲ್ಲಿ ಪವರ್ಫುಲ್ ಡೈಲಾಗ್ಗಳಿದ್ದು ಸಲ್ಲು ಭಾಯ್ ಕನ್ನಡ ಭಾಷೆಯನ್ನು ಹೇಗೆ ಉಚ್ಚಾರಣೆ ಮಾಡಿದ್ದಾರೆ ಅನ್ನೋದು ಚಿತ್ರ ತೆರೆಗೆ ಬಂದ ಬಳಿಕವೇ ಗೊತ್ತಾಗಲಿದೆ.
