ಮನಾಲಿ: ಬಾಲಿವುಡ್ ನಟಿ ಕಂಗನಾ ರನೌತ್ಗೆ ಕೇಂದ್ರ ಸರ್ಕಾರ ‘Y’ ಪ್ಲಸ್ ಲೆವೆಲ್ ಭದ್ರತೆ ನೀಡಿದ ಬಳಿಕ ಇಂದು ಪೊಲೀಸರ ತಂಡ ಹಿಮಾಚಲ ಪ್ರದೇಶದ ಮನಾಲಿಯಲ್ಲಿರುವ ನಟಿಯ ಮನೆ ತಲುಪಿದೆ.
ಜೀವ ಬೆದರಿಕೆ ಎದುರಿಸುತ್ತಿರುವ ಕಂಗನಾಗೆ ಸಂಪೂರ್ಣ ಭದ್ರತೆ ಒದಗಿಸುವುದಾಗಿ ಹಿಮಾಚಲ ಪ್ರದೇಶ ಸರ್ಕಾರ ಭರವಸೆ ನೀಡಿದ ಬೆನ್ನಲ್ಲೇ ನಿನ್ನೆ ಕೇಂದ್ರ ಸರ್ಕಾರ ‘Y’ ಪ್ಲಸ್ ಲೆವೆಲ್ ಭದ್ರತೆ ನೀಡಲು ಒಪ್ಪಿಗೆ ನೀಡಿತ್ತು.
ನಟ ಸುಶಾಂತ್ ಸಿಂಗ್ ರಜಪೂತ್ ಸಾವಿನ ವಿಚಾರ, ಡ್ರಗ್ಸ್ ಹಾಗೂ ಮೂವಿ ಮಾಫಿಯಾ ವಿರುದ್ಧ ದನಿ ಎತ್ತಿರುವ ನಟಿ ಕಂಗನಾ ರನೌತ್ಗೆ ಜೀವ ಬೆದರಿಕೆ ಆರೋಪ ಕೇಳಿ ಬಂದಿತ್ತು. ನಾನು ಮನಾಲಿಯಿಂದ ಮುಂಬೈಗೆ ಹಿಂದಿರುಗದಂತೆ ಶಿವಸೇನೆ ನಾಯಕ ಸಂಜಯ್ ರಾವತ್ ಬಹಿರಂಗವಾಗಿ ಬೆದರಿಕೆ ಹಾಕಿದ್ದಾರೆ ಎಂದು ಕಂಗನಾ ಟ್ವೀಟ್ ಮಾಡಿದ್ದರು.
ನಟಿಯ ತಂದೆಯ ಮನವಿ ಮೇರೆಗೆ ಹಿಮಾಚಲ ಪ್ರದೇಶ ಮುಖ್ಯಮಂತ್ರಿ ಜೈ ರಾಮ್ ಠಾಕೂರ್ ಸಂಪೂರ್ಣ ಭದ್ರತೆ ಒದಗಿಸುವುದಾಗಿ ತಿಳಿಸಿತ್ತು. ಇನ್ನು ಕೇಂದ್ರ ಸರ್ಕಾರ ಕೂಡ ‘Y’ ಪ್ಲಸ್ ಲೆವೆಲ್ ಭದ್ರತೆ ನೀಡಿದ್ದಕ್ಕೆ ಗೃಹ ಸಚಿವ ಅಮಿತ್ ಶಾಗೆ ಕಂಗನಾ ಕೃತಜ್ಞತೆ ತಿಳಿಸಿದ್ದರು. ಇದೀಗ ‘Y’ ಪ್ಲಸ್ ಲೆವೆಲ್ ಭದ್ರತೆ ನೀಡಲು ಪೊಲೀಸರ ತಂಡ ಮನಾಲಿಯಲ್ಲಿರುವ ನಟಿಯ ಮನೆ ತಲುಪಿದೆ.
‘Y’ ಪ್ಲಸ್ ಲೆವೆಲ್ ಭದ್ರತೆಯಲ್ಲಿ ಒಬ್ಬರು ಅಥವಾ ಇಬ್ಬರು ಕಮಾಂಡೋಗಳು, ಪೊಲೀಸರು ಸೇರಿದಂತೆ 11 ಸಿಬ್ಬಂದಿ ಬೆದರಿಕೆಗೊಳಗಾದ ವ್ಯಕ್ತಿಗೆ ಭದ್ರತೆ ನೀಡಲಿದ್ದಾರೆ.
