ಮುಂಬೈ : ಬಾಲಿವುಡ್ ಹಿರಿಯ ನಟ ಬಿಗ್-ಬಿ ಅಮಿತಾಭ್ ಬಚ್ಚನ್ ತನ್ನ ಕಣ್ಣುಗಳು ಮಂಜಾಗುತ್ತಿದ್ದು, ಕೆಲವೇ ದಿನಗಳಲ್ಲಿ ತಾನು ಕುರುಡಾಗಬಹುದು ಎಂದಿದ್ದಾರೆ. ನಿಧಾನವಾಗಿ ತನ್ನ ಕಣ್ಣಿನ ದೃಷ್ಟಿ ಮಂಜಾಗುತ್ತಿರುವ ಬಗ್ಗೆ ಅಮಿತಾಭ್ ಸ್ವತಃ ಹೇಳಿಕೊಂಡಿದ್ದಾರೆ.
"ನೋಟ ಮಂಜಾಗುತ್ತಿದೆ, ಆಕೃತಿಗಳು ಅಸ್ಪಷ್ಟವಾಗಿ ಕಾಣುತ್ತಿವೆ.. ಈಗ ಕೆಲವು ದಿನಗಳಿಂದ ಎಲ್ಲವೂ ಎರಡೆರಡಾಗಿ ಕಾಣುತ್ತಿವೆ. ಇನ್ನೇನು ಕೆಲ ದಿನಗಳಲ್ಲಿ ನಾನು ಪೂರ್ಣ ಕುರುಡಾಗಲಿದ್ದೇನೆ ಎಂಬುದು ತಿಳಿಯುತ್ತಿದೆ. ಈಗಾಗಲೇ ಇರುವ ನೂರಾರು ಆರೋಗ್ಯ ಸಮಸ್ಯೆಗಳ ಮಧ್ಯೆ ಇದೊಂದು ಶುರುವಾಗಿದೆ..." ಎಂದು ಬಚ್ಚನ್ ಅತ್ಯಂತ ನೋವಿನಿಂದ ತಮ್ಮ ಬ್ಲಾಗ್ನಲ್ಲಿ ಬರೆದುಕೊಂಡಿದ್ದಾರೆ.
ತಾವು ಚಿಕ್ಕವರಿದ್ದಾಗ ಕಣ್ಣಲ್ಲಿ ಏನಾದರೂ ಬಿದ್ದು ನೋವಾದಾಗ, ತಾಯಿ ತನ್ನ ಸೆರಗಿನ ಅಂಚನ್ನು ಬಾಯಿಂದ ಬಿಸಿ ಮಾಡಿ ಕಣ್ಣಿಗೊತ್ತಿ ನೋವು ಕಡಿಮೆ ಮಾಡುತ್ತಿದ್ದುದನ್ನು ನೆನಪಿಸಿಕೊಂಡು ಭಾವುಕರಾಗಿ ಬ್ಲಾಗ್ನಲ್ಲಿ ಬರೆದಿದ್ದಾರೆ.
"ವೈದ್ಯರು ಹೇಳಿದಂತೆ ಪ್ರತಿಗಂಟೆಗೊಮ್ಮೆ ಐ ಡ್ರಾಪ್ಸ್ ಹಾಕಿಕೊಳ್ಳುತ್ತಿರುವೆ. ಕಣ್ಣು ಪೂರ್ಣ ಕುರುಡಾಗಲ್ಲ, ಕಂಪ್ಯೂಟರ್ ಮುಂದೆ ಹೆಚ್ಚು ಸಮಯ ಕಳೆದ ಕಾರಣದಿಂದ ಹೀಗಾಗಿದೆ. ಕಣ್ಣುಗಳಿಗೆ ಆಯಾಸವಾಗಿದೆ, ಸರಿಯಾಗುತ್ತೆ ಎಂದು ವೈದ್ಯರು ಭರವಸೆ ನೀಡುತ್ತಿದ್ದಾರೆ.." ಎಂದು ಬಚ್ಚನ್ ಹೇಳಿದ್ದಾರೆ.
