ಪವರ್ಸ್ಟಾರ್ ಪುನೀತ್ ರಾಜ್ಕುಮಾರ್ ಜೊತೆ 'ನಿನ್ನಿಂದಲೆ' ಸಿನಿಮಾದಲ್ಲಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದ ಬಹುಭಾಷಾ ನಟಿ ಎರಿಕಾ ಫರ್ನಾಂಡಿಸ್ ಇಂದು ತಮ್ಮ ಹುಟ್ಟು ಹಬ್ಬದ ಸಂಭ್ರಮದಲ್ಲಿದ್ದಾರೆ. ಕನ್ನಡ ಸೇರಿದಂತೆ ತಮಿಳು, ತೆಲುಗು ಮತ್ತು ಹಿಂದಿ ಚಲನಚಿತ್ರಗಳಲ್ಲಿ ನಟಿಸುವ ಮೂಲಕ ಅಪಾರ ತಮ್ಮದೇಯಾದ ಅಭಿಮಾನಿ ಬಳಗವನ್ನು ಕಟ್ಟಿಕೊಂಡಿದ್ದಾರೆ.
ರೂಪದರ್ಶಿಯೂ ಆಗಿರುವ ಎರಿಕಾ ಹಿಂದಿ ಸೇರಿದಂತೆ ಹಲವು ಧಾರವಾಹಿಯಲ್ಲಿ ಬಣ್ಣ ಹಚ್ಚಿದ್ದಾರೆ. ಎರಿಕಾ ಮೂಲತಃ ಜನಿಸಿದ್ದು ಕರ್ನಾಟಕದ ಕಡಲೂರು ಮಂಗಳೂರಿನಲ್ಲಾದರೂ ಬೆಳದದ್ದು ಮಾತ್ರ ಮುಂಬೈನಲ್ಲಿ. ತಂದೆ ರಾಲ್ಫ್ ಫರ್ನಾಂಡಿಸ್, ತಾಯಿ ಲವಿನ ಅವರ ಮಾರ್ಗದರ್ಶನದಂತೆ ಮುಂಬೈನಲ್ಲಿ ಶಿಕ್ಷಣವನ್ನು ಪೂರ್ಣಗೊಳಿಸಿದ ಎರಿಕಾ, ನಂತರ ಮಾಡೆಲಿಂಗ್ಗೆ ಕಾಲಿಟ್ಟರು. 2011ರಲ್ಲಿ ಮಿಸ್ ಮಹಾರಾಷ್ಟ್ರ ಪ್ರಶಸ್ತಿಗೆ ಭಾಜನರಾದರು. ಬಳಿಕ ಎರಿಕಾ ಬಂದ ಅವಕಾಶಗಳನ್ನು ಅಚ್ಚುಕಟ್ಟಾಗಿ ನಿಭಾಯಿಸುವ ಮೂಲಕ ಬಣ್ಣದ ಲೋಕದಲ್ಲಿ ಗುರುತಿಸಿಕೊಂಡರು.
ಮಕ್ಕಳೊಂದಿಗೆ ಇಂದಿನ ತಮ್ಮ ಹುಟ್ಟು ಹಬ್ಬ ಆಚರಿಸಿಕೊಂಡ ಎರಿಕಾ, ಅವರಿಗೆ ಸಿಹಿ ತಿನಿಸುಗಳನ್ನು ನೀಡಿ ಖುಷಿ ಹಂಚಿಕೊಂಡರು. ಅಲ್ಲದೇ ಈ ಬಗ್ಗೆ ಟ್ವೀಟ್ ಮಾಡಿ ಹುಟ್ಟು ಹಬ್ಬಕ್ಕೆ ಶುಭಾಶಯ ಕೋರಿದವರಿಗೆ ಧನ್ಯವಾದ ಅರ್ಪಿಸಿದ್ದಾರೆ.
ಜೊತೆ ಜೊತೆಯಲಿ ಧಾರಾವಾಹಿಯ ರಾಜನಂದಿನಿಯಾಗಿ ಕನ್ನಡ ಕಿರುತೆರೆಯಲ್ಲಿ ಸೆಕೆಂಡ್ ಇನ್ನಿಂಗ್ಸ್ ಶುರು ಮಾಡಲಿದ್ದಾರೆ ಎಂಬ ಸುದ್ದಿ ಕೇಳಿ ಬಂದಿತ್ತು. ಆದರೆ, ಅದು ನಿಜವಾದ ಸುದ್ದಿಯಲ್ಲ, ಬದಲಿಗೆ ಅದು ರೂಮರ್ ಎಂಬುದನ್ನು ಸ್ವತಃ ಜೊತೆ ಜೊತೆಯಲಿ ಧಾರಾವಾಹಿಯ ನಿರ್ದೇಶಕ ಆರೂರು ಜಗದೀಶ್ ಹೇಳಿದ್ದಾರೆ.
