ಲಂಡನ್ : ಧೂಮಪಾನವನ್ನು ತ್ಯಜಿಸುವುದು ಕೆಲವೊಮ್ಮೆ ತುಂಬಾ ಕಷ್ಟಕರವಾಗುತ್ತದೆ. ಅದಕ್ಕಾಗಿ ಹಲವಾರು ರೀತಿಯ ವಿಧಾನಗಳನ್ನು ಅನುಸರಿಸಬೇಕಾಗುತ್ತದೆ. ಆದರೆ, ಈಗ ಬ್ರಿಟಿಷ್ ಸಂಶೋಧಕರು ಧೂಮಪಾನ ತ್ಯಜಿಸುವ ಆರ್ಟಿಫೀಶಿಯಲ್ ಇಂಟೆಲಿಜೆನ್ಸ್ ಆಧರಿತ ಆ್ಯಪ್ ಒಂದನ್ನು ಅಭಿವೃದ್ಧಿ ಪಡಿಸಿದ್ದಾರೆ. ನೀವು ಯಾವಾಗ ಮತ್ತು ಎಂಥ ಸಂದರ್ಭಗಳಲ್ಲಿ ಧೂಮಪಾನ ಮಾಡಲು ಉತ್ತೇಜಿತರಾಗುತ್ತೀರಿ ಎಂಬುದನ್ನು ಗ್ರಹಿಸುವ ಆ್ಯಪ್, ಧೂಮಪಾನ ತ್ಯಜಿಸಲು ನಿಮಗೆ ಗೈಡ್ ಮಾಡುತ್ತದೆ.
ಕ್ವಿಟ್ ಸೆನ್ಸ್ (Quit Sense) ಹೆಸರಿನ ಈ ಆ್ಯಪ್ ಅನ್ನು ಈಸ್ಟ್ ಆಂಗ್ಲಿಯಾ ವಿಶ್ವವಿದ್ಯಾಲಯದ ಸಂಶೋಧಕರು ಆ್ಯಪ್ ಅನ್ನು ತಯಾರಿಸಿದ್ದಾರೆ. ಇದು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಆಧರಿತ ವಿಶ್ವದ ಮೊದಲ ಧೂಮಪಾನ ತ್ಯಜಿಸಲು ಸಹಾಯ ಮಾಡುವ ಆ್ಯಪ್ ಆಗಿದೆ. ಧೂಮಪಾನಿಯೊಬ್ಬ ತಾನು ಸಾಮಾನ್ಯವಾಗಿ ಧೂಮಪಾನ ಮಾಡುವ ಸ್ಥಳಕ್ಕೆ ಹೋದ ತಕ್ಷಣ ಆ್ಯಪ್ ಅದನ್ನು ಗ್ರಹಿಸುತ್ತದೆ. ನಂತರ ಆ ಸ್ಥಳದಲ್ಲಿ ಧೂಮಪಾನ ಮಾಡುವಂತೆ ಉತ್ತೇಜಿತರಾಗದಂತೆ ಬಳಕೆದಾರನಿಗೆ ಆ್ಯಪ್ ಗೈಡ್ ಮಾಡುತ್ತದೆ. ಪ್ರಚೋದಕ ಸಂದರ್ಭಗಳನ್ನು ನಿರ್ವಹಿಸಲು ಜನರಿಗೆ ಸಹಾಯ ಮಾಡುವ ಮೂಲಕ ಹೊಸ ಅಪ್ಲಿಕೇಶನ್, ಆದಷ್ಟೂ ಹೆಚ್ಚು ಧೂಮಪಾನಿಗಳು ಧೂಮಪಾನ ತ್ಯಜಿಸಲು ಸಹಾಯ ಮಾಡುತ್ತದೆ ಎಂದು ಸಂಶೋಧನಾ ತಂಡದ ಸದಸ್ಯರು ಆಶಾಭಾವನೆ ವ್ಯಕ್ತಪಡಿಸಿದ್ದಾರೆ.
ಜನರು ಧೂಮಪಾನ ಮಾಡುವ ಸ್ಥಳಗಳಲ್ಲಿ ಸಮಯ ಕಳೆಯುವ ಕಾರಣದಿಂದ ಅವರು ಮತ್ತೆ ಮತ್ತೆ ಧೂಮಪಾನ ಮಾಡುವಂತೆ ಪ್ರಚೋದನೆಗೆ ಒಳಗಾಗುತ್ತಾರೆ. ಹೀಗಾಗಿ ಧೂಮಪಾನ ತೊರೆಯುವ ಅವರ ಪ್ರಯತ್ನಗಳು ವಿಫಲಗೊಳ್ಳುತ್ತವೆ ಎಂದು ನಮಗೆ ತಿಳಿದಿದೆ. ಪಬ್‌ನಲ್ಲಿ ಇರುವಾಗ ಅಥವಾ ಕೆಲಸದಲ್ಲಿರುವಾಗ ಹೀಗೆ ಯಾವುದೇ ಸ್ಥಳವಾಗಿರಬಹುದು, ಅಲ್ಲಿ ಅವರಿಗೆ ಧೂಮಪಾನ ಮಾಡುವ ಪ್ರಚೋದನೆ ಉಂಟಾಗಬಹುದು. ಸದ್ಯದ ಪರಿಸ್ಥಿತಿಯಲ್ಲಿ ಔಷಧಗಳನ್ನು ಬಳಸುವುದನ್ನು ಹೊರತುಪಡಿಸಿ, ಧೂಮಪಾನ ಬಿಡಿಸಲು ಬೇರಾವುದೇ ಮಾರ್ಗಗಳಿಲ್ಲ ಎಂದು ಯುಎಇ ಯ ಸ್ಕೂಲ್ ಆಫ್ ಹೆಲ್ತ್ ಸೈನ್ಸಸ್‌ನ ಪ್ರಮುಖ ಸಂಶೋಧಕ ಪ್ರೊಫೆಲಿಕ್ಸ್ ನಾಟನ್ ಹೇಳಿದ್ದಾರೆ.
ಕ್ವಿಟ್ ಸೆನ್ಸ್ ಎನ್ನುವುದು AI ಆಧರಿತ ಸ್ಮಾರ್ಟ್‌ಫೋನ್ ಅಪ್ಲಿಕೇಶನ್ ಆಗಿದ್ದು, ಇದು ನೈಜ ಸಮಯದಲ್ಲಿ ಧೂಮಪಾನ ಮಾಡುವ ಪ್ರಚೋದನೆಗಳನ್ನು ನಿರ್ವಹಿಸಲು ಬಳಕೆದಾರರಿಗೆ ಸಹಾಯ ಮಾಡುತ್ತದೆ. ಇದಕ್ಕಾಗಿ ಬಳಕೆದಾರರಿಗೆ ಯಾವಾಗ ಮತ್ತು ಯಾವ ಸಂದೇಶಗಳನ್ನು ತೋರಿಸಬೇಕು ಎಂಬುದನ್ನು ನಿರ್ಧರಿಸಲು ಹಿಂದಿನ ಧೂಮಪಾನ ಘಟನೆಗಳ ಸಮಯ, ಸ್ಥಳಗಳು ಮತ್ತು ಪ್ರಚೋದನೆಗಳ ಬಗ್ಗೆ ಆ್ಯಪ್ ತಾನಾಗಿಯೇ ಕಲಿತುಕೊಳ್ಳುತ್ತದೆ ಎಂದು ಡಾ. ಕ್ಲೋಯ್ ಸೀಗೆಲೆ ಹೇಳಿದರು. ಡಾ. ಕ್ಲೋಯ್ ಸೀಗೆಲೆ ಇವರು ಆ್ಯಪ್ ತಯಾರಿಸಿದ ತಂಡದ ಸದಸ್ಯರಾಗಿದ್ದಾರೆ.
ತಂಡವು ಸಾಮಾಜಿಕ ಮಾಧ್ಯಮದ ಮೂಲಕ ನೇಮಕಗೊಂಡ 209 ಧೂಮಪಾನಿಗಳನ್ನು ಒಳಗೊಂಡ ಯಾದೃಚ್ಛಿಕ ನಿಯಂತ್ರಿತ ಪ್ರಯೋಗ (randomised controlled trial) ವನ್ನು ನಡೆಸಿತು. ಅವರಿಗೆ ನಿಗದಿಪಡಿಸಿದ ಚಿಕಿತ್ಸೆಯನ್ನು ಪಡೆಯಲು ಟೆಕ್ಸ್ಟ್ ಮೆಸೇಜ್ ಮೂಲಕ ಲಿಂಕ್‌ಗಳನ್ನು ಕಳುಹಿಸಲಾಯಿತು. ಪ್ರಯೋಗದಲ್ಲಿ ಭಾಗವಹಿಸಿದ ಎಲ್ಲರಿಗೆ NHS ಆನ್‌ಲೈನ್ ಸ್ಮೋಕಿಂಗ್ ಸ್ಮೋಕಿಂಗ್ ಸಪೋರ್ಟ್ ಲಿಂಕ್ ಕಳುಹಿಸಲಾಯಿತು. ಆದರೆ ಇದರಲ್ಲಿ ಅರ್ಧದಷ್ಟು ಜನರಿಗೆ ಮಾತ್ರ ಕ್ವಿಟ್ ಸೆನ್ಸ್ ಅಪ್ಲಿಕೇಶನ್ ಅನ್ನು ಕಳುಹಿಸಲಾಯಿತು.
ಆರು ತಿಂಗಳ ನಂತರ ಎಲ್ಲರಿಗೂ ಆನ್‌ಲೈನ್‌ನಲ್ಲಿ ಅನುಸರಣಾ ಕ್ರಮಗಳನ್ನು ಪೂರ್ಣಗೊಳಿಸಲು ಕೇಳಲಾಯಿತು ಮತ್ತು ಧೂಮಪಾನವನ್ನು ತ್ಯಜಿಸಿದ್ದೇವೆ ಎಂದು ಹೇಳಿದವರಿಗೆ ಅವರ ಇಂದ್ರಿಯ ನಿಗ್ರಹವನ್ನು ಪರಿಶೀಲಿಸಲು ಲಾಲಾರಸದ ಮಾದರಿಯನ್ನು ಮೇಲ್ ಮಾಡುವಂತೆ ಕೇಳಲಾಯಿತು. ಕೇವಲ ಆನ್‌ಲೈನ್ NHS ಸಪೋರ್ಟ್ ಪಡೆದವರಿಗೆ ಹೋಲಿಸಿದರೆ, ಆರು ತಿಂಗಳ ನಂತರ ಅಪ್ಲಿಕೇಶನ್ ಅನ್ನು ಬಳಸಿದವರು ನಾಲ್ಕು ಪಟ್ಟು ಹೆಚ್ಚು ಹೆಚ್ಚು ಧೂಮಪಾನವನ್ನು ತ್ಯಜಿಸಿದ್ದಾರೆ ಎಂದು ಅಧ್ಯಯನದಲ್ಲಿ ಕಂಡು ಬಂದಿದೆ. ಸಂಶೋಧನಾ ವರದಿಯು ನಿಕೋಟಿನ್ ಆ್ಯಂಡ್ ಟೊಬ್ಯಾಕೊ ರಿಸರ್ಚ್ ಜರ್ನಲ್ನಲ್ಲಿ ಪ್ರಕಟವಾಗಿವೆ.
ಇದನ್ನೂ ಓದಿ : 150 ಹೊಸ ಚಾಟ್ಬಾಟ್ ಬಿಡುಗಡೆ: ಬಳಕೆದಾರರ ಖರೀದಿ ವೆಚ್ಚ 4 ಸಾವಿರ ಪಟ್ಟು ಏರಿಕೆ!
