ನವದೆಹಲಿ: ನೀವು ಬರ್ಗರ್, ಪಿಜ್ಜಾ ರೀತಿಯ ಖಾದ್ಯ ಪ್ರಿಯರಾ? ಇವುಗಳನ್ನು ನೀವು ಪೇಪರ್ ಬ್ಯಾಗ್ ಹಾಗೂ ಪೇಪರ್ ಬಾಕ್ಸ್ಗಳಲ್ಲಿ ತಿನ್ನುತ್ತೀರಾ? ನಿಮ್ಮ ಉತ್ತರ ಹೌದು ಎಂದಾದರೆ ಇನ್ನು ಮುಂದೆ ಈ ವಿಷಯದಲ್ಲಿ ಕೊಂಚ ಹುಷಾರಾಗಿರಿ. ಈ ಖಾದ್ಯಗಳನ್ನು ಇಟ್ಟು ಕೊಡುವ ಪೇಪರ್ ಬ್ಯಾಗ್‌ಗಳು ಮತ್ತು ಕಾಂಪೋಸ್ಟೇಬಲ್ ಪೇಪರ್ ಬೌಲ್‌ಗಳು ಎಂದಿಗೂ ನಾಶವಾಗದ ಹೆಚ್ಚಿನ ಪ್ರಮಾಣದ ಶಾಶ್ವತ ಕೆಮಿಕಲ್ಗಳು (forever chemicals) ಹೊಂದಿರಬಹುದು. ಇಂಥ ಶಾಶ್ವತ ಕೆಮಿಕಲ್ಗಳು ಮಾನವನ ಆರೋಗ್ಯ ಮತ್ತು ಪರಿಸರ ಎರಡಕ್ಕೂ ಹಾನಿಕಾರಕ ಎಂದು ಅಂತಾರಾಷ್ಟ್ರೀಯ ಸಂಶೋಧಕರ ತಂಡದ ನೇತೃತ್ವದಲ್ಲಿ ನಡೆದ ಅಧ್ಯಯನದಲ್ಲಿ ತಿಳಿದು ಬಂದಿದೆ.
ಏಕ ಬಳಕೆಯ ಪ್ಲಾಸ್ಟಿಕ್ ನಿಷೇಧದ ನಂತರ ಪೇಪರ್ ಬ್ಯಾಗ್‌ಗಳು ಮತ್ತು ಕಾಂಪೋಸ್ಟೆಬಲ್ ಆಹಾರದ ಕಂಟೇನರ್‌ಗಳು ಇವಕ್ಕೆ ಪರ್ಯಾಯವಾಗಿ ಬಳಕೆಗೆ ಬಂದಿವೆ. ಪ್ಲಾಸ್ಟಿಕ್‌ಗೆ ಪರ್ಯಾಯವಾಗಿ ಎಸೆಗ್ರೀನ್ ಎಂಬ ವಸ್ತುವನ್ನು ಇತ್ತೀಚೆಗೆ ಬಳಸಲಾಗುತ್ತಿದೆ. ಈ ಎಸೆಗ್ರೀನ್ ವಸ್ತುಗಳು ಪರ್ಫ್ಲುಯೋ ಆಕ್ಟೇನ್ ಸಲ್ಫೇಟ್ ಅಥವಾ PFOS ಎಂಬ ರಾಸಾಯನಿಕವನ್ನು ಒಳಗೊಂಡಿರುತ್ತವೆ. ಇದು ಪರ್- ಮತ್ತು ಪಾಲಿಫ್ಲೋರೊಆಲ್ಕೈಲ್ ಪದಾರ್ಥಗಳು ಅಥವಾ PFAS ಎಂದು ಕರೆಯಲ್ಪಡುವ ಮಾನವ ನಿರ್ಮಿತ ರಾಸಾಯನಿಕಗಳ ವರ್ಗಗಳಲ್ಲಿ ಒಂದಾಗಿದೆ. PFAS ಅನ್ನು ಸಾಮಾನ್ಯವಾಗಿ ಕಾಗದವನ್ನು ಗ್ರೀಸ್ ಅಥವಾ ಎಣ್ಣೆಯ ರೆಸಿಸ್ಟೆಂಟ್ ಮಾಡಲು ಬಳಸಲಾಗುತ್ತದೆ. ಹೀಗಾಗಿ ಅವುಗಳನ್ನು ಅನೇಕ ಫಾಸ್ಟ್ ಫುಡ್ ಕಂಟೇನರ್‌ಗಳು ಮತ್ತು ಹೊದಿಕೆಗಳಲ್ಲಿ ಬಳಸಲಾಗುತ್ತದೆ.
ಶಾಶ್ವತ ರಾಸಾಯನಿಕಗಳು ಎಂದರೇನು?: ಈ ರಾಸಾಯನಿಕಗಳನ್ನು ಶಾಶ್ವತ ರಾಸಾಯನಿಕಗಳು ಎಂದೂ ಕರೆಯುತ್ತಾರೆ. ಅವು ಬಹಳ ನಿಧಾನವಾಗಿ ಒಡೆಯುತ್ತವೆ ಮತ್ತು ಯಕೃತ್ತು ಸೇರಿದಂತೆ ಪರಿಸರ ಮತ್ತು ಮಾನವ ಅಂಗಾಂಶಗಳಲ್ಲಿ ಸಂಗ್ರಹಗೊಳ್ಳುತ್ತವೆ. ಇದೇ ಕಾರಣಕ್ಕೆ ಅವನ್ನು ಶಾಶ್ವತ ರಾಸಾಯನಿಕಗಳು ಎಂದು ಕರೆಯಲಾಗುತ್ತದೆ. ಕೆನಡಾ, ಅಮೆರಿಕ ಮತ್ತು ಸ್ವಿಟ್ಜರ್‌ಲ್ಯಾಂಡ್‌ನ ಸಂಶೋಧಕರು ಟೊರೊಂಟೊದಲ್ಲಿ ಫೆಬ್ರವರಿ ಮತ್ತು ಮಾರ್ಚ್ 2020 ರ ನಡುವೆ ಸಂಗ್ರಹಿಸಲಾದ 42 ರೀತಿಯ ಪೇಪರ್ ಆಹಾರ ಪ್ಯಾಕೇಜಿಂಗ್‌ಗಳನ್ನು ಪರೀಕ್ಷಿಸಿದ್ದಾರೆ. ಇದರಲ್ಲಿ ಕಾಂಪೋಸ್ಟೇಬಲ್ ಪೇಪರ್ ಬೌಲ್‌ಗಳು, ಸ್ಯಾಂಡ್‌ವಿಚ್ ಮತ್ತು ಬರ್ಗರ್ ರ‍್ಯಾಪರ್‌ಗಳು, ಪಾಪ್‌ಕಾರ್ನ್ ಸರ್ವಿಂಗ್ ಬ್ಯಾಗ್‌ಗಳು ಮತ್ತು ಡೋನಟ್ಸ್‌ನಂತಹ ಸಿಹಿತಿಂಡಿಗಳ ಚೀಲಗಳು ಸೇರಿವೆ.
45ರಷ್ಟು ಪ್ರತಿಶತ ಫ್ಲೋರಿನ್: ತಂಡವು ಪೇಪರ್ ಫುಡ್ ಪ್ಯಾಕೇಜಿಂಗ್ ಪ್ಯಾಕೇಜಿಂಗ್ನಲ್ಲಿ ಫ್ಲೋರಿನ್ ಏನಾದರೂ ಇದೆಯಾ ಎಂಬುದನ್ನು ಪರೀಕ್ಷಿಸಿತು. ಫ್ಲೋರಿನ್ ಇದು PFAS ನಲ್ಲಿ ಪ್ರಮುಖ ಅಂಶವಾಗಿದೆ. 45 ಪ್ರತಿಶತದಷ್ಟು ಮಾದರಿಗಳು ಫ್ಲೋರಿನ್ ಅನ್ನು ಒಳಗೊಂಡಿರುವುದು ಕಂಡು ಬಂದಿತು. ಹೀಗಾಗಿ ಇವೆಲ್ಲವೂ PFAS ಅನ್ನು ಸಹ ಒಳಗೊಂಡಿವೆ ಎಂಬುದನ್ನು ಸೂಚಿಸುತ್ತದೆ. ಎನ್ವಿರಾನ್ಮೆಂಟಲ್ ಸೈನ್ಸ್ ಅಂಡ್ ಟೆಕ್ನಾಲಜಿ ಲೆಟರ್ಸ್ ಜರ್ನಲ್‌ನಲ್ಲಿ ಪ್ರಕಟವಾದ ಫಲಿತಾಂಶ ಪ್ರಕಾರ - ಬರ್ಗರ್‌ಗಳು, ಪೇಸ್ಟ್ರಿಗಳು ಮತ್ತು ಡೋನಟ್‌ಗಳಂತಹ ಎಣ್ಣೆಯುಕ್ತ ವಸ್ತುಗಳನ್ನು ಬಳಸುವ ಪೇಪರ್ ಬ್ಯಾಗ್‌ಗಳಲ್ಲಿ ಮತ್ತು ಕಾಂಪೋಸ್ಟೇಬಲ್ ಪೇಪರ್ ಬೌಲ್ಗಳಲ್ಲಿ ಹೆಚ್ಚಿನ ಮಟ್ಟದ ಫ್ಲೋರಿನ್ ಮತ್ತು ಪಿಎಫ್‌ಎಎಸ್ ಕಂಡು ಬಂದಿದೆ.
ಇಂಥ ಕಾಗದವನ್ನು ತಯಾರಿಸುವಾಗ, ಅದು ಸಾಕಷ್ಟು ಬಲಯುತವಾಗಿರಲು ಮತ್ತು ನೀರು ಅಥವಾ ದ್ರಾವಣಗಳ ಸಂಪರ್ಕಕ್ಕೆ ಬಂದಾಗ ಹರಿದು ಹೋಗದಂತಿರಲು ಅದರ ಕಚ್ಚಾ ತಿರುಳನ್ನು ಸಾಕಷ್ಟು PFAS ನೊಂದಿಗೆ ಬೆರೆಸಬೇಕಾಗುತ್ತದೆ ಎಂದು ಸಂಶೋಧಕರು ಹೇಳಿದ್ದಾರೆ.
ಕಾಂಪೋಸ್ಟಬಲ್ ಬೌಲ್‌ಗಳಂತಹ ಆಹಾರ ಪ್ಯಾಕೇಜಿಂಗ್ನಲ್ಲಿ PFAS ಬಳಕೆಯು ಏಕ ಬಳಕೆಯ ಪ್ಲಾಸ್ಟಿಕ್ ಆಹಾರ ಪ್ಯಾಕೇಜಿಂಗ್‌ನ ವಿಷಾದನೀಯ ಪರ್ಯಾಯವನ್ನು ಪ್ರತಿನಿಧಿಸುತ್ತದೆ ಎಂದು ಅಧ್ಯಯನವು ತೋರಿಸಿದೆ. ಪಿಎಫ್‌ಎಎಸ್ ಆಹಾರವನ್ನು ಹೊಂದಿರುವ ಪ್ಯಾಕೇಜಿಂಗ್‌ನಿಂದ ಆಹಾರಕ್ಕೆ ಪ್ರವೇಶಿಸುತ್ತದೆ ಎಂದು ಸಂಶೋಧಕರು ಹೇಳಿದ್ದಾರೆ. ಪೇಪರ್ ಬ್ಯಾಗ್ ಮತ್ತು ಕಾಂಪೋಸ್ಟೇಬಲ್ ಬೌಲ್ ಮಾದರಿಗಳು ದಂಶಕಗಳಿಗೆ ವಿಷಕಾರಿಯಾಗಿರುವ ಮತ್ತೊಂದು PFAS ಇರುವಿಕೆಯನ್ನು ತೋರಿಸಿದೆ. ಹಿಂದಿನ ಅಧ್ಯಯನಗಳ ಪ್ರಕಾರ PFAS ಇದು ಮಾನವರು ಮತ್ತು ಪ್ರಾಣಿಗಳಲ್ಲಿ ಕ್ಯಾನ್ಸರ್, ರೋಗ ನಿರೋಧಕ ಶಕ್ತಿ ಕುಂಠಿತವಾಗುವುದು, ಜೀರ್ಣಶಕ್ತಿಯಲ್ಲಿ ಬದಲಾವಣೆ ಮತ್ತು ಬೊಜ್ಜು ಬರುವಿಕೆ ಹೀಗೆ ವಿವಿಧ ಆರೋಗ್ಯ ಸಮಸ್ಯೆಗಳನ್ನು ಉಂಟುಮಾಡಬಹುದು ಎಂದು ತಿಳಿದು ಬಂದಿದೆ.
ಇದನ್ನೂ ಓದಿ : ಇಡ್ಲಿಗಾಗಿ 6 ಲಕ್ಷ ರೂ. ಖರ್ಚು: ಈತ ತರಿಸಿಕೊಂಡಿದ್ದು 8 ಸಾವಿರ ಪ್ಲೇಟ್ ಇಡ್ಲಿ!
