ಜಾಜ್ಪುರ್: ಗೋವಾದಲ್ಲಿ ನಡೆದ ರಾಷ್ಟ್ರೀಯ ವಿಜ್ಞಾನ ಮೇಳ ಇಂಡಿಯಾ ಇಂಟರ್ನ್ಯಾಷನಲ್ ಇನ್ನೋವೇಶನ್ ಮತ್ತು ಆವಿಷ್ಕಾರಗಳ ಎಕ್ಸ್ಪೋದಲ್ಲಿ ಜಾಜ್ಪುರದ ವಿದ್ಯಾರ್ಥಿಯೊಬ್ಬ ಪ್ರದರ್ಶಿಸಿದ ಆವಿಷ್ಕಾರ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ. 12 ನೇ ತರಗತಿಯಲ್ಲಿ ಓದುತ್ತಿರುವ ಒಡಿಯಾ ವಿದ್ಯಾರ್ಥಿ ಜ್ಞಾನ ರಂಜನ್ ಮಿಶ್ರಾ ವೈ-ಫೈ ಪರ್ಯಾಯವಾದ ಹೊಸ ತಂತ್ರಜ್ಞಾನವೊಂದನ್ನು ಪ್ರಸ್ತುತಪಡಿಸಿ ರಾಷ್ಟ್ರೀಯ ವಿಜ್ಞಾನ ಮೇಳದಲ್ಲಿ 5 ಚಿನ್ನದ ಪದಕಗಳನ್ನು ಗೆದ್ದಿದ್ದಾನೆ. ಪ್ರಾಜೆಕ್ಟ್ ಸ್ಪರ್ಧೆ ಮತ್ತು ಸಂಶೋಧನೆಗಾಗಿ ಆತ ಈ ಪದಕಗಳನ್ನು ಪಡೆದಿದ್ದಾನೆ.
ವಿದ್ಯಾರ್ಥಿಯ ಸಾಧನೆಯನ್ನು ಕುಟುಂಬಸ್ಥರು, ಗ್ರಾಮಸ್ಥರು ಮತ್ತು ಶಾಲಾ ಶಿಕ್ಷಕರು ಶ್ಲಾಘಿಸಿದ್ದಾರೆ. ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಕೂಡ ವಿದ್ಯಾರ್ಥಿಯ ಬುದ್ಧಿವಂತಿಕೆಯನ್ನು ಶ್ಲಾಘಿಸಿದ್ದಾರೆ. ಇಂದಿನ ಇಂಟರ್ನೆಟ್ ಯುಗದಲ್ಲಿ ವೈಫೈ ಬಳಕೆ ಹೆಚ್ಚಾಗಿದೆ. ಆದರೆ, ಜಾಜ್ಪುರದ ಒಡಿಯಾ ವಿದ್ಯಾರ್ಥಿ ಜ್ಞಾನ ರಂಜನ್ ವೈ-ಫೈ ಬದಲು ಲೈ-ಫೈ ತಂತ್ರಜ್ಞಾನವನ್ನು ಕಂಡುಹಿಡಿದಿದ್ದಾರೆ. ವೈ-ಫೈ ಅನ್ನು ವ್ಯಾಪಕವಾಗಿ ಬಳಸುವುದರಿಂದ ದೇಹದ ಮೇಲೆ ವೆಬ್ ವಿಕಿರಣದ ಪ್ರತಿಕೂಲ ಪರಿಣಾಮಗಳು ಉಂಟಾಗುತ್ತವೆ. ಇದರಿಂದ ಜನರನ್ನು ರಕ್ಷಿಸಲು ಲೈ-ಫೈ ಸಹಾಯಕವಾಗಲಿದೆ. ಇದು ಮಾನವರ ಮೇಲೆ ಯಾವುದೇ ವಿಕಿರಣ ಪರಿಣಾಮ ಬೀರುವುದಿಲ್ಲ. ಲೈ-ಫೈ (ಲೈಟ್ ಫಿಡೆಲಿಟಿ) ಎಂಬುದು ದ್ವಿಮುಖ ವೈರ್ಲೆಸ್ ವ್ಯವಸ್ಥೆಯಾಗಿದ್ದು, ಇದು ಎಲ್ಇಡಿ ಅಥವಾ ಇನ್ಫ್ರಾರೆಡ್ ಬೆಳಕಿನ ಮೂಲಕ ಡೇಟಾ ರವಾನಿಸುತ್ತದೆ.
ಈ ಹಿಂದೆ ಕೋವಿಡ್ ಸಮಯದಲ್ಲಿ ಜ್ಞಾನ ರಂಜನ್ ನವೋದಯ ಸೆಂಟ್ರಲ್ ಶಾಲೆಯಲ್ಲಿ 9 ನೇ ತರಗತಿಯಲ್ಲಿ ಓದುತ್ತಿದ್ದ. ಲಾಕ್ಡೌನ್ನಿಂದಾಗಿ ಆತನಿಗೆ ಶಾಲೆಗೆ ಹೋಗಲು ಸಾಧ್ಯವಾಗಲಿಲ್ಲ. ಆಗ ಮನೆಯಲ್ಲಿ ಕುಳಿತು ಕೆಲ ಹಳೆಯ ಸ್ಕ್ರ್ಯಾಪ್ ವಸ್ತುಗಳನ್ನು ಬಳಸಿಕೊಂಡು ಲೈ-ಫೈ ಬಗ್ಗೆ ಸಂಶೋಧನೆ ಪ್ರಾರಂಭಿಸಿದ್ದ ಜ್ಞಾನ ರಂಜನ್.
ಎರಡು ವರ್ಷಗಳ ಕಾಲ ನಿರಂತರವಾಗಿ ಮನೆಯಲ್ಲಿಯೇ ಸಂಶೋಧನೆ ಮಾಡಿದ ನಂತರ ಆತ ಲೈ-ಫೈ ತಂತ್ರಜ್ಞಾನ ಆವಿಷ್ಕರಿಸಿದ್ದಾನೆ. ಮುಂದಿನ ದಿನಗಳಲ್ಲಿ ಸೌರಶಕ್ತಿ ಚಾಲಿತ ಲೈ-ಫೈ ಅನ್ನು ಆವಿಷ್ಕರಿಸಲು ಆತ ತನ್ನ ಸಂಶೋಧನೆ ಮುಂದುವರಿಸಿದ್ದಾನೆ. ಈಗಾಗಲೇ ಈ ವಿದ್ಯಾರ್ಥಿಯು 150 ದೇಶಗಳ ವಿದ್ಯಾರ್ಥಿಗಳನ್ನು ಒಳಗೊಂಡ ಅಂತಾರಾಷ್ಟ್ರೀಯ ಸಂಘವನ್ನು ಮುನ್ನಡೆಸುತ್ತಿದ್ದಾನೆ.
"ಇಂದಿನ ತಂತ್ರಜ್ಞಾನವು ನಾಳೆಯ ಭವಿಷ್ಯವಾಗಿದೆ. ನಾನು ಈ ಬಗ್ಗೆ 4 ವರ್ಷಗಳಿಂದ ಸಂಶೋಧನೆ ನಡೆಸಿದ್ದೇನೆ. ಪ್ರಸ್ತುತ ಲೈ-ಫೈ ಎಂಬ ಸುಧಾರಿತ ತಂತ್ರಜ್ಞಾನದ ಬಗ್ಗೆ ಸಂಶೋಧನೆ ಮಾಡುತ್ತಿದ್ದೇನೆ. ಗೋವಾದಲ್ಲಿ ನಡೆದ ರಾಷ್ಟ್ರೀಯ ವಿಜ್ಞಾನ ಮೇಳದಲ್ಲಿ ಭಾಗವಹಿಸಿ 5 ಚಿನ್ನದ ಪದಕಗಳನ್ನು ಗೆದ್ದಿದ್ದೇನೆ. ನಾನು ಈ ತಂತ್ರಜ್ಞಾನಕ್ಕಾಗಿ ಬೆಳಕನ್ನು ಬಳಸುತ್ತಿದ್ದೇನೆ." ಎಂದು ಜ್ಞಾನ ರಂಜನ್ ಮಿಶ್ರಾ ಹೇಳಿದರು. ಜ್ಞಾನ ರಂಜನ್ ಜಾಜ್ಪುರದ ಕೋರಿ ಬ್ಲಾಕ್ನ ಮನಕೊಯಿಲಿಯ ನವೋದಯ ಶಾಲೆಯಲ್ಲಿ 12 ನೇ ತರಗತಿಯಲ್ಲಿ ಓದುತ್ತಿದ್ದಾನೆ. ತಂದೆ ಪ್ರಾಥಮಿಕ ಶಾಲಾ ಶಿಕ್ಷಕ ಮತ್ತು ತಾಯಿ ಗೃಹಿಣಿ.
ಇದನ್ನೂ ಓದಿ : ಇನ್ಸ್ಟಾಗ್ರಾಮ್ ರೀಲ್ಸ್ ಡೌನ್ಲೋಡ್ ಮಾಡುವುದು ಹೇಗೆ? ಇಲ್ಲಿದೆ ಮಾಹಿತಿ
