Luna-25: 47 ವರ್ಷದ ಬಳಿಕ ಚಂದ್ರನಲ್ಲಿಗೆ ಹಾರಿದ ರಷ್ಯಾ ನೌಕೆ; ಚಂದ್ರಯಾನ-3 ಜೊತೆಗೇ ಇಳಿಯಬಹುದು ಲ್ಯಾಂಡರ್!

Luna-25: ದಶಕಗಳ ಬಳಿಕ ರಷ್ಯಾ ಮತ್ತೊಮ್ಮೆ ಚಂದ್ರನ ಮೇಲೆ ನೌಕೆ ಇಳಿಸಲು ಮುಂದಾಗಿದೆ. ರಷ್ಯಾದ ಲೂನಾ -25 ಬಾಹ್ಯಾಕಾಶ ನೌಕೆಯು ಶುಕ್ರವಾರ ಸೋಯುಜ್ ರಾಕೆಟ್ ಮೂಲಕ ಚಂದ್ರನತ್ತ ಹಾರಿದೆ.

ಮಾಸ್ಕೋ : 47 ವರ್ಷಗಳ ಬಳಿಕ ರಷ್ಯಾ ತನ್ನ ಲೂನಾ-25 ಲ್ಯಾಂಡರ್ ಮಿಷನ್ ಮೂಲಕ ಮತ್ತೆ ಚಂದ್ರನತ್ತ ಮುಖ ಮಾಡಿದೆ. ರಷ್ಯಾದ ವೊಸ್ಟೊಚ್ನಿ ಉಡಾವಣಾ ಕೇಂದ್ರದಿಂದ ಲೂನಾ -25 ಬಾಹ್ಯಾಕಾಶ ನೌಕೆಯು ಮಾಸ್ಕೋ ಸಮಯ ಶುಕ್ರವಾರ ಮುಂಜಾನೆ 2:10 ಕ್ಕೆ (ಐಎಸ್​ಟಿ ಕಾಲಮಾನ ಬೆಳಗ್ಗೆ 4:40) ಸೋಯುಜ್ -2.1 ಬಿ ರಾಕೆಟ್ ಮೂಲಕ ನಭಕ್ಕೆ ಹಾರಿದೆ.

ಈ ಹಿಂದೆ ಇದ್ದ ಸೋವಿಯತ್ ಒಕ್ಕೂಟದ ಅವಧಿಯಲ್ಲಿ ರಷ್ಯಾದ ಕೊನೆಯ ಚಂದ್ರಯಾನ ಲೂನಾ -24 ಅನ್ನು 1976 ರಲ್ಲಿ ಉಡಾವಣೆ ಮಾಡಲಾಗಿತ್ತು. ಇದು ಸುಮಾರು 170 ಗ್ರಾಂ ಚಂದ್ರನ ಮಾದರಿಗಳನ್ನು ಸಂಗ್ರಹಿಸಿ ಯಶಸ್ವಿಯಾಗಿ ಭೂಮಿಗೆ ತಲುಪಿಸಿತ್ತು.

ಪ್ರಸ್ತುತ ರಷ್ಯಾ ಹಾರಿಸಿದ ಲೂನಾ -25 ನೌಕೆ ಆಗಸ್ಟ್ 16 ರಂದು ಚಂದ್ರನ ಕಕ್ಷೆಯನ್ನು ತಲುಪುವ ನಿರೀಕ್ಷೆಯಿದೆ. ಚಂದ್ರನ ಬೋಗುಸ್ಲಾವ್​ಸ್ಕಿ (Boguslawsky crater) ಕುಳಿಯ ಪ್ರದೇಶವನ್ನು ಸ್ಪರ್ಶಿಸುವ ಮೊದಲು ಲೂನಾ ಬಾಹ್ಯಾಕಾಶ ನೌಕೆಯು ಚಂದ್ರನ ಮೇಲ್ಮೈಯಿಂದ ಸುಮಾರು 100 ಕಿಮೀ ಎತ್ತರದಲ್ಲಿ ಮೂರರಿಂದ ಏಳು ದಿನಗಳವರೆಗೆ ಸುತ್ತಲಿದೆ. ಮ್ಯಾಂಜಿನಸ್ ಮತ್ತು ಪೆಂಟ್ಲ್ಯಾಂಡ್-ಎ ಕುಳಿಗಳನ್ನು ಪರ್ಯಾಯ ಲ್ಯಾಂಡಿಂಗ್ ತಾಣಗಳಾಗಿ ಗುರುತಿಸಲಾಗಿದೆ.

ಲೂನಾ -25 ಸುರಕ್ಷಿತವಾಗಿ ಇಳಿದ ನಂತರ ಚಂದ್ರನ ಮೇಲ್ಮೈಯಲ್ಲಿ ಕನಿಷ್ಠ ಒಂದು ಭೂಮಿಯ ವರ್ಷದಷ್ಟು ಕಾಲ ಕೆಲಸ ಮಾಡುವ ಗುರಿಯನ್ನು ಹೊಂದಿದೆ. ಸಾಫ್ಟ್ ಲ್ಯಾಂಡಿಂಗ್ ತಂತ್ರಜ್ಞಾನವನ್ನು ಮತ್ತಷ್ಟು ಸುಧಾರಿಸುವುದು ಇದರ ಪ್ರಮುಖ ಗುರಿಯಾಗಿದೆ. ಈ ಮಿಷನ್ ಯಶಸ್ವಿಯಾದರೆ ಚಂದ್ರನ ದಕ್ಷಿಣ ಧ್ರುವದ ಬಳಿ ಇಳಿದ ಮೊದಲ ಬಾಹ್ಯಾಕಾಶ ನೌಕೆ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಲಿದೆ.

"ಸರಳವಾಗಿ ಹೇಳುವುದಾದರೆ ಈವರೆಗೆ ಯಾರೂ ಇಳಿಯದ ಪ್ರದೇಶದಲ್ಲಿ ಇಳಿಯುವುದು ಲೂನಾ -25 ನ ಅತ್ಯಂತ ಪ್ರಮುಖ ಕಾರ್ಯವಾಗಿದೆ" ಎಂದು ರಷ್ಯಾದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ (ಐಕೆಐ ಸಂಕ್ಷಿಪ್ತ ರೂಪದಿಂದ ಕರೆಯಲಾಗುತ್ತದೆ) ಮಿಷನ್​ನ ಮುಖ್ಯ ವಿಜ್ಞಾನಿ ಮ್ಯಾಕ್ಸಿಮ್ ಲಿಟ್ವಾಕ್ ಐಕೆಐ ವೆಬ್​ಸೈಟ್​​ನಲ್ಲಿ ಬರೆದಿದ್ದಾರೆ.

"ಈಗ ಎಲ್ಲರೂ ಚಂದ್ರನ ಧ್ರುವ ಪ್ರದೇಶಗಳನ್ನು ಗುರಿಯಾಗಿಸಿಕೊಂಡಿದ್ದಾರೆ; ಈ ಪ್ರದೇಶವು ವೈಜ್ಞಾನಿಕ ಸಮುದಾಯದ ಪ್ರತಿಯೊಬ್ಬರಿಗೂ ಕುತೂಹಲಕಾರಿಯಾಗಿದೆ" ಎಂದು ಲಿಟ್ವಾಕ್ ಹೇಳಿದರು. "ಲೂನಾ -25 ಲ್ಯಾಂಡಿಂಗ್ ಪ್ರದೇಶದ ಮಣ್ಣಿನಲ್ಲಿ ಮಂಜುಗಡ್ಡೆಯ ಚಿಹ್ನೆಗಳಿವೆ; ಕಕ್ಷೆಯ ದತ್ತಾಂಶದಿಂದ ಇದನ್ನು ನೋಡಬಹುದು. ನಾವು ಈ ಮೊದಲು ಇಳಿದಿದ್ದ ಸಮಭಾಜಕ ವೃತ್ತದ ಪ್ರದೇಶಗಳಲ್ಲಿ ವಾತಾವರಣ ಹೀಗಿರಲಿಲ್ಲ" ಎಂದು ಅವರು ತಿಳಿಸಿದರು.

ಕುತೂಹಲಕಾರಿ ಸಂಗತಿಯೆಂದರೆ ಜುಲೈ 14 ರಂದು ಉಡಾವಣೆಗೊಂಡು ಆಗಸ್ಟ್ 6 ರಂದು ಚಂದ್ರನ ಕಕ್ಷೆಗೆ ತಲುಪಿದ ಭಾರತದ ಚಂದ್ರಯಾನ 3 ಶೋಧಕದಂತೆಯೇ ಲೂನಾ -25 ಅದೇ ಸಮಯದಲ್ಲಿ ಮತ್ತು ಅದೇ ಸಾಮಾನ್ಯ ಪ್ರದೇಶದಲ್ಲಿ ಇಳಿಯಲಿದೆ. ಯುಎಸ್ ಬಾಹ್ಯಾಕಾಶ ಸಂಸ್ಥೆ ನಾಸಾ ತನ್ನ ಆರ್ಟೆಮಿಸ್ ಕಾರ್ಯಕ್ರಮದ ಮೂಲಕ 2020 ರ ಅಂತ್ಯದ ವೇಳೆಗೆ ಚಂದ್ರನ ದಕ್ಷಿಣ ಧ್ರುವದ ಬಳಿ ಒಂದು ಅಥವಾ ನೆಲೆಗಳನ್ನು ಸ್ಥಾಪಿಸಲು ಯೋಜಿಸಿದೆ.

ಇದನ್ನೂ ಓದಿ : Twitter ಕಚೇರಿಯಲ್ಲಿನ ಲೋಗೊ, ನೇಮ್​ಬೋರ್ಡ್​ ಹರಾಜಿಗಿಟ್ಟ ಮಸ್ಕ್!