ಗುಪ್ತವಾಗಿ ಮೈಕ್ರೊಫೋನ್​ ಡೇಟಾ ಕದಿಯುತ್ತಿದೆಯಾ ವಾಟ್ಸ್​ಆ್ಯಪ್? ತನಿಖೆ ನಡೆಸುತ್ತೇವೆ ಎಂದ ಕೇಂದ್ರ

ವಾಟ್ಸ್​ಆ್ಯಪ್ ಗ್ರಾಹಕರಿಗೆ ತಿಳಿಯದಂತೆ ಅವರ ಸ್ಮಾರ್ಟ್​ಪೋನ್​ಗಳ ಮೈಕ್ರೊಫೋನ್​ ಅನ್ನು ಸಕ್ರಿಯಗೊಳಿಸಿ ಮಾಹಿತಿ ಕದಿಯುತ್ತಿದೆ ಎಂದು ಆರೋಪಿಸಲಾಗಿದೆ. ಈ ಆರೋಪಗಳ ಬಗ್ಗೆ ತನಿಖೆ ನಡೆಸುವುದಾಗಿ ಕೇಂದ್ರ ಸರ್ಕಾರ ಭರವಸೆ ನೀಡಿದೆ.

ನವದೆಹಲಿ: ಫೋನ್ ಬಳಕೆಯಲ್ಲಿಲ್ಲದಿರುವಾಗಲೂ ಅದರ ಮೈಕ್ರೊಫೋನ್​ ಅನ್ನು ವಾಟ್ಸ್​ಆ್ಯಪ್ ಗುಪ್ತವಾಗಿ ಬಳಸುತ್ತಿದೆ ಎಂಬ ಆರೋಪಗಳ ಬಗ್ಗೆ ಪ್ರತಿಕ್ರಿಯಿಸಿರುವ ಕೇಂದ್ರ ಸರ್ಕಾರ, ಖಾಸಗಿತನದ ನಿಯಮಗಳು ಉಲ್ಲಂಘನೆಯಾಗಿರುವ ಬಗ್ಗೆ ತನಿಖೆ ನಡೆಸುವುದಾಗಿ ಹೇಳಿದೆ. ಈ ಕುರಿತು ಟ್ವೀಟ್ ಮಾಡಿರುವ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಖಾತೆ ರಾಜ್ಯ ಸಚಿವ ರಾಜೀವ್ ಚಂದ್ರಶೇಖರ್, ಸರ್ಕಾರವು ಉಲ್ಲಂಘನೆಯನ್ನು ಪರಿಶೀಲಿಸಲಿದೆ ಎಂದು ಹೇಳಿದ್ದಾರೆ. ಪ್ರಸ್ತುತ ಹೊಸ ಡಿಜಿಟಲ್ ವೈಯಕ್ತಿಕ ಡೇಟಾ ಸಂರಕ್ಷಣಾ ಮಸೂದೆಯನ್ನು ಸರ್ಕಾರ ಸಿದ್ಧಪಡಿಸುತ್ತಿರುವುದು ಗಮನಾರ್ಹ.

ಇದು ಒಪ್ಪಿಕೊಳ್ಳಲಾಗದ ಖಾಸಗಿತನ ಮತ್ತು ಗೌಪ್ಯತೆಯ ಉಲ್ಲಂಘನೆಯಾಗಿದೆ. ನಾವು ಇದನ್ನು ತಕ್ಷಣವೇ ಪರಿಶೀಲಿಸುತ್ತೇವೆ ಮತ್ತು ಹೊಸ ಡಿಜಿಟಲ್ ಪರ್ಸನಲ್ ಡೇಟಾ ಪ್ರೊಟೆಕ್ಷನ್ ಬಿಲ್ ಸಿದ್ಧವಾಗುತ್ತಿರುವ ಮಧ್ಯೆ ಯಾವುದೇ ಗೌಪ್ಯತೆಯ ಉಲ್ಲಂಘನೆಯ ಕುರಿತು ಕ್ರಮ ಕೈಗೊಳ್ಳುತ್ತೇವೆ ಎಂದು ಚಂದ್ರಶೇಖರ್ ಟ್ವೀಟ್‌ನಲ್ಲಿ ತಿಳಿಸಿದ್ದಾರೆ. ಚಂದ್ರಶೇಖರ್ ಅವರ ಟ್ವೀಟ್‌ಗೆ ಪ್ರತಿಕ್ರಿಯೆಯನ್ನು ಕೋರಿ ಕಳುಹಿಸಲಾದ ಮೇಲ್‌ಗೆ ವಾಟ್ಸ್​ಆ್ಯಪ್ ಇಂಡಿಯಾ ತಕ್ಷಣವೇ ಪ್ರತಿಕ್ರಿಯಿಸಲಿಲ್ಲ.

ಟ್ವಿಟರ್ ಕಂಪನಿಯಲ್ಲಿ ಕೆಲಸ ಮಾಡುವ ಎಂಜಿನಿಯರ್ ಒಬ್ಬರು ತನ್ನ ಫೋನ್‌ನ ಸ್ಕ್ರೀನ್‌ಶಾಟ್‌ಗಳನ್ನು ಹಂಚಿಕೊಂಡಿದ್ದಾರೆ. ತಾವು ನಿದ್ರಿಸುತ್ತಿರುವಾಗಲೂ ವಾಟ್ಸ್​ಆ್ಯಪ್ ಅವರ ಫೋನ್​ನ ಮೈಕ್ರೊಫೋನ್ ಅನ್ನು ಹಲವಾರು ಬಾರಿ ಸಕ್ರಿಯಗೊಳಿಸಿರುವುದನ್ನು ತೋರಿಸುವ ಸ್ಕ್ರೀನ್ ಶಾಟ್ ಇದಾಗಿದೆ. ಟ್ವಿಟರ್ ಎಂಜಿನಿಯರ್ ಹಂಚಿಕೊಂಡ ಸ್ಕ್ರೀನ್​ಶಾಟ್​ಗೆ ಇನ್ನೂ ಹಲವಾರು ಬಳಕೆದಾರರು ಪ್ರತಿಕ್ರಿಯೆ ನೀಡಿದ್ದಾರೆ. ಟೆಸ್ಲಾ ಮತ್ತು ಟ್ವಿಟರ್ ಮುಖ್ಯಸ್ಥ ಎಲೋನ್ ಮಸ್ಕ್ ಕೂಡ ಇದಕ್ಕೆ ಪ್ರತಿಕ್ರಿಯಿಸಿದ್ದು, ವಾಟ್ಸ್​​ಆ್ಯಪ್​ನ ಈ ಕ್ರಮ ವಿಲಕ್ಷಣಕಾರಿಯಾಗಿದೆ ಎಂದಿದ್ದಾರೆ.

ಈ ಬಗ್ಗೆ ಮಂಗಳವಾರ ವಾಟ್ಸ್​ಆ್ಯಪ್ ಟ್ವೀಟ್ ಮಾಡಿದ್ದು, ಸ್ಕ್ರೀನ್​ಶಾಟ್ ಪೋಸ್ಟ್​ ಮಾಡಿರುವ ಎಂಜಿನಿಯರ್ ಜೊತೆಗೆ ತಾನು ಸಂಪರ್ಕದಲ್ಲಿರುವುದಾಗಿ ಹೇಳಿದೆ. "ತಮ್ಮ ಪಿಕ್ಸೆಲ್​​ ಫೋನ್​​ನಲ್ಲಿ ವಾಟ್ಸ್​ಆ್ಯಪ್​ ಬಗ್ಗೆ ಸಮಸ್ಯೆ ಇರುವುದಾಗಿ ಹೇಳಿಕೊಂಡಿರುವ ಟ್ವಿಟರ್ ಎಂಜಿನಿಯರ್ ಜೊತೆಗೆ ನಾವು ಕಳೆದ 24 ಗಂಟೆಗಳಿಂದ ಸಂಪರ್ಕದಲ್ಲಿದ್ದೇವೆ. ಬಹುಶಃ ಇದು ಆ್ಯಂಡ್ರಾಯ್ಡ್​ನಲ್ಲಿನ ಒಂದು ಬಗ್ ಆಗಿರಬಹುದು ಮತ್ತು ಇದು ಪ್ರೈವಸಿ ಡ್ಯಾಶ್​ ಬೋರ್ಡ್​​ನಲ್ಲಿ ತಪ್ಪಾಗಿ ಮಾಹಿತಿ ತೋರಿಸುತ್ತಿರಬಹುದು. ಇದನ್ನು ತಕ್ಷಣವೇ ಪರಿಶೀಲಿಸಿ ಸರಿಪಡಿಸುವಂತೆ ನಾವು ಗೂಗಲ್​ಗೆ ಕೇಳಿಕೊಂಡಿದ್ದೇವೆ" ಎಂದು ವಾಟ್ಸ್​​ಆ್ಯಪ್ ಟ್ವೀಟ್ ಮಾಡಿದೆ. ವಾಟ್ಸ್​ಆ್ಯಪ್ ಫೋನಿನ ಮೈಕ್ರೊಪೋನ್​​ ಅನ್ನು ಹೇಗೆ ಬಳಕೆ ಮಾಡುತ್ತದೆ ಎಂಬ ವಿಚಾರದಲ್ಲಿ ಬಳಕೆದಾರರು ಸಂಪೂರ್ಣ ನಿಯಂತ್ರಣ ಹೊಂದಿದ್ದಾರೆ ಎಂದು ಅದು ತಿಳಿಸಿದೆ.

"ಒಂದು ಬಾರಿ ಅನುಮತಿ ಕೊಟ್ಟ ನಂತರ ಬಳಕೆದಾರನು ಕಾಲ್ ಮಾಡುವಾಗ ಅಥವಾ ವಾಯ್ಸ್​ ನೋಟ್ ರೆಕಾರ್ಡಿಂಗ್ ಮಾಡುವಾಗ ಅಥವಾ ವೀಡಿಯೊ ರೆಕಾರ್ಡ್​ ಮಾಡುವಾಗ ಮಾತ್ರ ವಾಟ್ಸ್​ಆ್ಯಪ್ ಮೈಕ್ರೊಫೋನ್​ ಅನ್ನು ಬಳಸುತ್ತದೆ. ಅಲ್ಲದೆ ಹೀಗೆ ಮಾಡುವಾಗಲೂ ವಾಟ್ಸ್​ಆ್ಯಪ್ ಈ ಸಂವಹನಗಳನ್ನು ಎಂಡ್ ಟು ಎಂಡ್ ಎನ್​ಕ್ರಿಪ್ಟ್​ ಮಾಡಲಾಗಿರುತ್ತದೆ. ಹೀಗಾಗಿ ವಾಟ್ಸ್​ಆ್ಯಪ್ ಅವುಗಳನ್ನು ಕೇಳಿಸಿಕೊಳ್ಳಲು ಸಾಧ್ಯವಿಲ್ಲ" ಎಂದು ವಾಟ್ಸ್​ಆ್ಯಪ್ ಮತ್ತೊಂದು ಟ್ವೀಟ್​ನಲ್ಲಿ ಹೇಳಿದೆ.

ಇದನ್ನೂ ಓದಿ : ಮೊಬೈಲ್ ನಂಬರ್ ಇಲ್ಲದೆ ಕಾಲಿಂಗ್: ಬರಲಿದೆ ಟ್ವಿಟರ್​ನ ಹೊಸ ವೈಶಿಷ್ಟ್ಯ