ನವದೆಹಲಿ: ಭಾರತದ ದೂರಸಂಪರ್ಕ ಕ್ಷೇತ್ರದ ಪ್ರಮುಖ ಕಂಪನಿ ರಿಲಯನ್ಸ್ ಜಿಯೋ ಇನ್ಫೋಕಾಮ್ ಲಿಮಿಟೆಡ್, ದೇಶದ ಮೊದಲ ಉಪಗ್ರಹ ಆಧಾರಿತ ಗಿಗಾಬಿಟ್ ಬ್ರಾಡ್ಬ್ಯಾಂಡ್ ಸೇವೆ ಜಿಯೋಸ್ಪೇಸ್ ಫೈಬರ್ ಅನ್ನು ಅನಾವರಣಗೊಳಿಸಿದೆ. ದೇಶದ ದೂರದ ಪ್ರದೇಶಗಳನ್ನು ಹೈಸ್ಪೀಡ್ ಇಂಟರ್ನೆಟ್ನೊಂದಿಗೆ ಸಂಪರ್ಕಿಸುವತ್ತ ಇದೊಂದು ದೊಡ್ಡ ಹೆಜ್ಜೆಯಾಗಿದೆ.
ರಿಲಯನ್ಸ್ ಜಿಯೋ ನೀಡಿರುವ ಮಾಧ್ಯಮ ಪ್ರಕಟಣೆಯ ಪ್ರಕಾರ, ಈವರೆಗೂ ಇಂಟರ್ನೆಟ್ ಸೌಲಭ್ಯವನ್ನು ತಲುಪಿಸಲಾಗದ ದೂರದ ಪ್ರದೇಶಗಳಿಗೂ ಹೈಸ್ಪೀಡ್ ಬ್ರಾಡ್ಬ್ಯಾಂಡ್ ಸೇವೆಗಳನ್ನು ವಿಸ್ತರಿಸಲು ರಿಲಯನ್ಸ್ ಜಿಯೋ ಪ್ರಯತ್ನಿಸುತ್ತಿದೆ ಎಂದು ಹೇಳಿದೆ. ಶುಕ್ರವಾರ ನವದೆಹಲಿಯಲ್ಲಿ ಆರಂಭವಾದ ಇಂಡಿಯಾ ಮೊಬೈಲ್ ಕಾಂಗ್ರೆಸ್ ಸಮಾವೇಶದಲ್ಲಿ ಈ ತಂತ್ರಜ್ಞಾನವನ್ನು ಪ್ರದರ್ಶಿಸಲಾಯಿತು. ಜಿಯೋಸ್ಪೇಸ್ ಫೈಬರ್ ಶೀಘ್ರದಲ್ಲೇ ಭಾರತದಾದ್ಯಂತ ಸ್ಪರ್ಧಾತ್ಮಕ ಬೆಲೆಯಲ್ಲಿ ಲಭ್ಯವಾಗಲಿದೆ.
ರಿಲಯನ್ಸ್ ಜಿಯೋ ಈಗಾಗಲೇ 450 ದಶಲಕ್ಷಕ್ಕೂ ಹೆಚ್ಚು ಭಾರತೀಯ ಗ್ರಾಹಕರಿಗೆ ಹೈಸ್ಪೀಡ್ ಬ್ರಾಡ್ಬ್ಯಾಂಡ್ ಸೌಲಭ್ಯಗಳನ್ನು ನೀಡುತ್ತಿದೆ ಮತ್ತು ಈಗ ಜಿಯೋಸ್ಪೇಸ್ ಫೈಬರ್ ಆರಂಭದೊಂದಿಗೆ ಪ್ರತಿ ಮನೆಗೂ ಡಿಜಿಟಲ್ ಸಂಪರ್ಕ ಕಲ್ಪಿಸುವ ಗುರಿಯನ್ನು ಹೊಂದಿದೆ. ಈ ಉಪಗ್ರಹ ಆಧರಿತ ಸೇವೆಯು, ಜಿಯೋಫೈಬರ್ ಮತ್ತು ಜಿಯೋಏರ್ಫೈಬರ್ನ ಅಸ್ತಿತ್ವದಲ್ಲಿರುವ ಸಂಪರ್ಕಗಳೊಂದಿಗೆ ಸೇರಿಸಲ್ಪಟ್ಟಿದೆ. ಗ್ರಾಹಕರು ಮತ್ತು ಉದ್ಯಮ ಸಂಸ್ಥೆಗಳು ವಿಶ್ವಾಸಾರ್ಹ, ವಿಳಂಬವಿಲ್ಲದ, ಹೈಸ್ಪೀಡ್ ಇಂಟರ್ನೆಟ್ ಸೌಲಭ್ಯ ಪಡೆಯಬಹುದು ಮತ್ತು ಮನರಂಜನೆಗಾಗಿ ಇದನ್ನು ಬಳಸಬಹುದು ಎಂದು ಕಂಪನಿ ತಿಳಿಸಿದೆ.
ಈಗಾಗಲೇ ಭಾರತದ ನಾಲ್ಕು ಅತ್ಯಂತ ದುರ್ಗಮ ಸ್ಥಳಗಳಾದ ಗುಜರಾತ್ನ ಗಿರ್, ಛತ್ತೀಸಗಢದ ಕೊರ್ಬಾ, ಒಡಿಶಾದ ನಬರಂಗ್ ಪುರ್ ಮತ್ತು ಅಸ್ಸಾಂನ ಒಎನ್ಜಿಸಿ - ಜೋರ್ಹಾಟ್ ಪ್ರದೇಶಗಳಲ್ಲಿ ಜಿಯೋಸ್ಪೇಸ್ ಫೈಬರ್ ಮೂಲಕ ಹೈಸ್ಪೀಡ್ ಇಂಟರ್ನೆಟ್ ಸೌಲಭ್ಯ ಆರಂಭಿಸಲಾಗಿದೆ.
ರಿಲಯನ್ಸ್ ಜಿಯೋ ಇನ್ಫೋಕಾಮ್ ಲಿಮಿಟೆಡ್ನ ಅಧ್ಯಕ್ಷ ಆಕಾಶ್ ಅಂಬಾನಿ ಮಾತನಾಡಿ, "ಜಿಯೋ ಭಾರತದ ಲಕ್ಷಾಂತರ ಮನೆಗಳು ಮತ್ತು ವ್ಯವಹಾರಗಳಿಗೆ ಮೊದಲ ಬಾರಿಗೆ ಬ್ರಾಡ್ಬ್ಯಾಂಡ್ ಇಂಟರ್ನೆಟ್ ಸೌಲಭ್ಯ ಪಡೆಯಲು ಅನುವು ಮಾಡಿಕೊಟ್ಟಿದೆ. ಜಿಯೋಸ್ಪೇಸ್ ಫೈಬರ್ನೊಂದಿಗೆ ಇನ್ನೂ ಲಕ್ಷಾಂತರ ಜನರನ್ನು ನಾವು ಸಂಪರ್ಕಿಸಲಿದ್ದೇವೆ" ಎಂದರು.
ರಿಲಯನ್ಸ್ ಜಿಯೋದ ಜಿಯೋಸ್ಪೇಸ್ ಫೈಬರ್ ಭಾರತದ ಡಿಜಿಟಲ್ ತಂತ್ರಜ್ಞಾನದ ವಲಯದಲ್ಲಿ ಒಂದು ಪ್ರಮುಖ ಹೆಜ್ಜೆಯಾಗಿ ಗುರುತಿಸಲ್ಪಡುತ್ತಿದೆ. ನಿಜವಾದ ಡಿಜಿಟಲ್ ಇಂಡಿಯಾದ ದೃಷ್ಟಿಕೋನದೊಂದಿಗೆ ಹೊಂದಿಕೊಳ್ಳುಔ ಈ ತಂತ್ರಜ್ಞಾನ ದೇಶದ ಅತ್ಯಂತ ದುರ್ಗಮ ಭಾಗಗಳಿಗೂ ಹೈಸ್ಪೀಡ್ ಬ್ರಾಡ್ಬ್ಯಾಂಡ್ ಸೌಲಭ್ಯವನ್ನು ವಿಸ್ತರಿಸುವ ಭರವಸೆ ನೀಡುತ್ತದೆ.
ಇದನ್ನೂ ಓದಿ : ಇನ್ನು ಈ ಫೋನ್ಗಳಲ್ಲಿ ಕೆಲಸ ಮಾಡಲ್ಲ ವಾಟ್ಸ್ಆ್ಯಪ್! ನಿಮ್ಮದು ಯಾವ ವರ್ಷನ್ ನೋಡಿಕೊಳ್ಳಿ..
