ಲಂಡನ್ (ಯುಕೆ) : 2019 ರಲ್ಲಿ ಡೋರಿಯನ್ ಚಂಡಮಾರುತದಿಂದ ಉಂಟಾದ ವಿನಾಶದ ಕಾರಣದಿಂದ ಅಳಿವಿನಂಚಿನಲ್ಲಿರುವ ಬಹಾಮಾ ವಾರ್ಬ್ಲರ್ ಪಕ್ಷಿಯು ಕೇವಲ ಒಂದು ದ್ವೀಪದಲ್ಲಿ ಬದುಕುಳಿದಿರಬಹುದು ಎಂದು ಪೂರ್ವ ಆಂಗ್ಲಿಯಾ ವಿಶ್ವವಿದ್ಯಾಲಯದ ಸಂಶೋಧಕರು ಹೇಳಿದ್ದಾರೆ. ಚಂಡಮಾರುತ ಅಪ್ಪಳಿಸುವ ಮೊದಲು ಗ್ರ್ಯಾಂಡ್ ಬಹಾಮಾದಲ್ಲಿ ಪಕ್ಷಿಗಳ ಆವಾಸ ಸ್ಥಾನಗಳು ಮತ್ತು ಅರಣ್ಯ ಪರಿಸರ ಹೇಗಿತ್ತು ಎಂಬುದರ ಬಗ್ಗೆ ಹೊಸ ಅಧ್ಯಯನ ಕೆಲ ಮಾಹಿತಿಗಳನ್ನು ನೀಡಿದೆ. ಆದರೆ ಡೋರಿಯನ್ ಚಂಡಮಾರುತದಿಂದ ಗ್ರ್ಯಾಂಡ್ ಬಹಾಮಾದಲ್ಲಿ ಪಕ್ಷಿಗಳ ಆವಾಸಸ್ಥಾನ ನಾಶವಾದ ನಂತರ ವಾರ್ಬ್ಲರ್ ಈಗ ನೆರೆಯ ಅಬಾಕೊ ದ್ವೀಪದಲ್ಲಿ ಮಾತ್ರ ಬದುಕುಳಿಯಬಹುದು ಎಂದು ಸಂಶೋಧಕರ ತಂಡ ಹೇಳಿದೆ.
ಈ ಹಿಂದೆ ವಿನಾಶವಾಗಿದೆ ಎಂದು ಭಾವಿಸಲಾದ, ಅಳಿವಿನಂಚಿನಲ್ಲಿರುವ ಬಹಾಮಾ ನುಥಾಚ್ ಹೆಸರಿನ ಜೀವಂತ ಪಕ್ಷಿಯನ್ನು ಕೊನೆಯ ಬಾರಿಗೆ ಪತ್ತೆ ಮಾಡಿದ್ದ ಸಂಶೋಧಕರ ತಂಡ ಈ ಸಂಶೋಧನೆ ಮಾಡಿರುವುದು ಗಮನಾರ್ಹ. ಯುಎಇಯ ಮಾಸ್ಟರ್ಸ್ ಇನ್ ಅಪ್ಲೈಡ್ ಎಕಾಲಜಿ ಮತ್ತು ಕನ್ಸರ್ವೇಶನ್ ವಿಷಯದಲ್ಲಿ ಅಧ್ಯಯನ ಮಾಡುತ್ತಿರುವ ಇಬ್ಬರು ವಿದ್ಯಾರ್ಥಿಗಳಾದ ಡೇವಿಡ್ ಪಿರೇರಾ ಮತ್ತು ಮ್ಯಾಥ್ಯೂ ಗಾರ್ಡನರ್ ಎಂಬ ವಿದ್ಯಾರ್ಥಿಗಳು ಇದರ ಫೀಲ್ಡ್ ವರ್ಕ್ ಮಾಡಿದ್ದಾರೆ. ಬಹಾಮಾ ವಾರ್ಬ್ಲರ್ ಮತ್ತು ಬಹಾಮಾ ನುಥಾಚ್‌ಗಾಗಿ ದ್ವೀಪದಲ್ಲಿ ಮೂರು ತಿಂಗಳ ಕಾಲ ಸಮೀಕ್ಷೆ ನಡೆಸಿದ್ದಾರೆ.
ಈ ಸಂಶೋಧನೆಯ ಬಗ್ಗೆ ಮಾತನಾಡಿದ ಯುಎಇ ಜೈವಿಕ ವಿಜ್ಞಾನಗಳ ಶಾಲೆಯ ವಿದ್ಯಾರ್ಥಿಗಳ ಮೇಲ್ವಿಚಾರಕಿ ಪ್ರೊ ಡಯಾನಾ ಬೆಲ್, ಬಹಾಮಾಸ್ನ ಅರ್ಧಕ್ಕಿಂತ ಹೆಚ್ಚು ಸ್ಥಳೀಯ ಪಕ್ಷಿಗಳು ಜಾಗತಿಕ ಅಳಿವಿನ ಅಪಾಯದಲ್ಲಿವೆ ಎಂದು ನಿರ್ಣಯಿಸಲಾಗಿದ್ದರೂ, ಈ ಪರಿಸ್ಥಿತಿಯ ಸುಧಾರಣೆಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಯಾವುದೇ ಪ್ರಯತ್ನಗಳು ನಡೆದಿಲ್ಲ ಎಂದರು. ಬಹಾಮಾ ವಾರ್ಬ್ಲರ್ ಇದು ಸ್ವಲ್ಪ ಬೂದು ಮತ್ತು ಹಳದಿ ವರ್ಣದ ಹಕ್ಕಿಯಾಗಿದ್ದು, ಉದ್ದನೆಯ ಕೊಕ್ಕು ಹೊಂದಿರುತ್ತದೆ. ಇದು ಬಹಾಮಾಸ್ನ ಗ್ರ್ಯಾಂಡ್ ಬಹಾಮಾ ಮತ್ತು ಅಬಾಕೊ ದ್ವೀಪಗಳಲ್ಲಿ ಮಾತ್ರ ಕಂಡುಬರುತ್ತದೆ.
ಆದರೆ ಇದನ್ನು ಈಗ ಅಳಿವಿನಂಚಿನಲ್ಲಿರುವ ಪ್ರಭೇದ ಎಂದು ವರ್ಗೀಕರಿಸಲಾಗಿದೆ. ಇದರ ಆವಾಸಸ್ಥಾನವಾದ ಪೈನ್ ಅರಣ್ಯ ಪ್ರದೇಶವು ನಗರಾಭಿವೃದ್ಧಿ, ಮಾನವ ಪ್ರೇರಿತ ಬೆಂಕಿ, ಬೇಟೆ ಮತ್ತು ಹೆಚ್ಚಿದ ಪ್ರಬಲ ಚಂಡಮಾರುತಗಳ ಆವರ್ತನದಿಂದ ಹಾಳಾಗುತ್ತಿರುವುದರಿಂದ ಈ ಪಕ್ಷಿ ಪ್ರಭೇದವು ಅಳಿವಿನಂಚಿಗೆ ಬಂದಿದೆ. ಹೀಗಾಗಿ ಸಂಶೋಧನಾ ತಂಡವು ಪಕ್ಷಿಗಳ ಸದ್ಯದ ಸಂರಕ್ಷಣಾ ಸ್ಥಿತಿಯನ್ನು ನಿರ್ಣಯಿಸಲು ಮತ್ತು 2016 ರಲ್ಲಿ ವರ್ಗ 4 ಚಂಡಮಾರುತವು (ಮ್ಯಾಥ್ಯೂ) ದ್ವೀಪಕ್ಕೆ ಅಪ್ಪಳಿಸಿದ ನಂತರ ಅವುಗಳ ಆವಾಸಸ್ಥಾನದ ಅವಶ್ಯಕತೆಗಳನ್ನು ನಿರ್ಧರಿಸಲು ಬಯಸಿದೆ.
ಸಮೀಕ್ಷೆ ನಡೆಸಲಾದ 464 ಪಾಯಿಂಟ್‌ಗಳ ಪೈಕಿ 209 ಪಾಯಿಂಟ್ಗಳಲ್ಲಿ ಒಟ್ಟು 327 ವಾರ್ಬ್ಲರ್ಗಳು ಇರುವುದು ಪತ್ತೆಯಾಗಿದೆ. ಶೇ 71 ರಷ್ಟು ಪಕ್ಷಿಗಳು ದ್ವೀಪದ ಮಧ್ಯಭಾಗದಲ್ಲಿರುವ ಕಾಡುಗಳಲ್ಲಿ ಮತ್ತು ಶೇ 29 ರಷ್ಟು ಪಕ್ಷಗಳು ಪೂರ್ವ ಭಾಗದಲ್ಲಿವೆ. ಕಡಿಮೆ ಮುಳ್ಳುಗಳಿರುವ ಹಳೆಯ ಮರಗಳು ಮತ್ತು ಕೆಲ ಸುಟ್ಟ ಮರಗಳಿರುವ ತಾಣಗಳಲ್ಲಿ ವಾರ್ಬ್ಲರ್ಗಳು ಹೆಚ್ಚಾಗಿ ಕಂಡುಬರುತ್ತವೆ. ಬೆಂಕಿಯ ಮಧ್ಯೆಯೂ ಈ ಮರಗಳು ಬದುಕುಳಿಯಬಲ್ಲವಾದ್ದರಿಂದ ಈ ಪಕ್ಷಿಗಳು ಇಂಥ ಮರಗಳಲ್ಲಿ ವಾಸಿಸಲು ಇಷ್ಟಪಡುತ್ತವೆ. ಅಲ್ಲದೆ ಪಕ್ಷಿಗಳ ಆಹಾರವಾದ ಕೀಟಗಳು ಈ ಮರಗಳಲ್ಲಿ ಹೆಚ್ಚಾಗಿರುತ್ತವೆ ಎಂದು ಡೇವಿಡ್ ಪೆರೇರಾ ಹೇಳಿದರು.
ಇದನ್ನೂ ಓದಿ: ದರೋಜಿ ಕರಡಿಧಾಮ ಪರಿಸರದಲ್ಲಿ ಅಪರೂಪದ 'ಸೈಬೀರಿಯನ್ ರೂಬಿಥ್ರೋಟ್' ಪಕ್ಷಿ ಪ್ರತ್ಯಕ್ಷ
