ಬೆಂಗಳೂರು: ಮಾನವನಂತೆಯೇ ಪ್ರತಿಕ್ರಿಯೆ ನೀಡುವ ಜನರೇಟಿವ್ ಎಐ ಚಾಟ್ಬಾಟ್ ಚಾಟ್ ಜಿಪಿಟಿ ಆರಂಭವಾದ ನಂತರ ಆ್ಯಪಲ್ ಕೂಡ ಇದೇ ರೀತಿಯ ಆರ್ಟಿಫಿಶಿಯಲ್ ತಂತ್ರಜ್ಞಾನವನ್ನು ತಯಾರಿಸಲಿದೆ ಎಂಬ ಬಗ್ಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ಚರ್ಚೆಗಳು ಜೋರಾಗಿದ್ದವು. ಸದ್ಯ ಆ್ಯಪಲ್ ಸಿಇಓ ಟಿಮ್ ಕುಕ್ ಸ್ವತಃ ಈ ಬಗ್ಗೆ ಮಾತನಾಡಿದ್ದಾರೆ. ಜೆನ್ ಎಐ ತಂತ್ರಜ್ಞಾನದ ಅಭಿವೃದ್ಧಿಗಾಗಿ ಆ್ಯಪಲ್ ಕಳೆದ ಹಲವಾರು ವರ್ಷಗಳಿಂದ ಕೆಲಸ ಮಾಡುತ್ತಿದೆ ಮತ್ತು ಇದನ್ನು ಮುಂದುವರಿಸಲಿದೆ ಎಂದು ಆಗಸ್ಟ್ನಲ್ಲಿ ಕುಕ್ ಹೇಳಿದ್ದಾರೆ.
ಇತ್ತೀಚೆಗೆ ಹೂಡಿಕೆದಾರರೊಂದಿಗೆ ನಡೆದ ಸಭೆಯಲ್ಲಿ ಆ್ಯಪಲ್ ನಿಜವಾಗಿಯೂ ಜನರೇಟಿವ್ ಎಐ ತಂತ್ರಜ್ಞಾನದ ಅಭಿವೃದ್ಧಿಗಾಗಿ ಕೆಲಸ ಮಾಡುತ್ತಿದೆ ಮತ್ತು ಕಂಪನಿಯು ಈ ತಂತ್ರಜ್ಞಾನವನ್ನು ಜವಾಬ್ದಾರಿಯುತವಾಗಿರುವಂತೆ ತಯಾರಿಸಲಿದೆ ಎಂದು ಕುಕ್ ಹೇಳಿದ್ದಾರೆ.
"ಜನರೇಟಿವ್ ಎಐ ವಿಷಯದಲ್ಲಿ ನಿಸ್ಸಂಶಯವಾಗಿ ನಾವು ಕೆಲಸ ಮಾಡುತ್ತಿದ್ದೇವೆ. ಆದರೆ ಅದು ಹೇಗಿರಲಿದೆ ಎಂಬ ಬಗ್ಗೆ ಈಗಲೇ ಹೆಚ್ಚಿನ ವಿಷಯ ಬಹಿರಂಗಪಡಿಸಲಾರೆ. ನಾವು ಆ ರೀತಿ ಮಾಹಿತಿಗಳನ್ನು ಬಹಿರಂಗಪಡಿಸುವುದಿಲ್ಲ ಎಂಬುದು ಬಹುಶಃ ನಿಮಗೆಲ್ಲ ತಿಳಿದೇ ಇದೆ. ಆದರೆ ನಾವು ಈ ವಿಚಾರದಲ್ಲಿ ಕೆಲಸ ಮಾಡುತ್ತಿದ್ದೇವೆ ಎಂಬುದು ಮಾತ್ರ ಖಚಿತ. ಕಾಲಾಂತರದಲ್ಲಿ ನೀವು ಉತ್ಪನ್ನಗಳ ಪ್ರಗತಿಯನ್ನು ಕಾಣುವಿರಿ" ಎಂದು ಟಿಮ್ ಕುಕ್ ಹೇಳಿದರು.
ಆ್ಯಪಲ್ ಈಗಾಗಲೇ ಜನರೇಟಿವ್ ಎಐ ಕ್ಷೇತ್ರದ ಪ್ರತಿಭಾವಂತರನ್ನು ದೊಡ್ಡ ಸಂಖ್ಯೆಯಲ್ಲಿ ನೇಮಕ ಮಾಡಿಕೊಳ್ಳುತ್ತಿದೆ. ಆ್ಯಪಲ್‌ನ ಅಮೆರಿಕದ careers page ನೋಡಿದರೆ ಇದು ಸ್ಪಷ್ಟವಾಗುತ್ತದೆ.
ಭಾರತದತ್ತ ಆಪಲ್ ವಿಶೇಷ ಗಮನ: ಭಾರತವು ಆ್ಯಪಲ್ ನ ಪ್ರಮುಖ ಮಾರುಕಟ್ಟೆಯಾಗಲಿದೆ ಎಂದು ಟಿಮ್ ಕುಕ್ ಹೇಳಿದ್ದಾರೆ. ಭಾರತದ ವಿಶಾಲ ಮಾರುಕಟ್ಟೆಯಲ್ಲಿ ಆ್ಯಪಲ್ ಅತ್ಯಂತ ಸಣ್ಣ ಪಾಲು ಹೊಂದಿರುವುದರಿಂದ ಇಲ್ಲಿ ಬೆಳವಣಿಗೆಗೆ ಅಪಾರ ಅವಕಾಶಗಳಿವೆ ಎಂದು ಅವರು ಹೇಳಿದ್ದಾರೆ. ನಾವು ಈ ಬಾರಿ ಭಾರತದಲ್ಲಿ ಸಾರ್ವಕಾಲಿಕ ದಾಖಲೆಯ ಆದಾಯ ಹೊಂದಿದ್ದೇವೆ. ನಮ್ಮ ಕಂಪನಿ ಎರಡಂಕಿಗಳನ್ನು ಬೆಳವಣಿಗೆ ಹೊಂದಿದೆ. ಇದು ನಮಗೆ ನಂಬಲಾಗದಷ್ಟು ರೋಮಾಂಚನಕಾರಿ ಮಾರುಕಟ್ಟೆಯಾಗಿದೆ ಮತ್ತು ನಮ್ಮ ಪ್ರಮುಖ ಗಮನದ ದೇಶವಾಗಿದೆ ಎಂದು ಕುಕ್ ಗುರುವಾರ ನ್ಯೂಯಾರ್ಕ್ನಲ್ಲಿ ನಡೆದ ಆ್ಯಪಲ್‌ನ ನಾಲ್ಕನೇ ತ್ರೈಮಾಸಿಕ 2023 ಗಳಿಕೆಯ ಕಾನ್ಫರೆನ್ಸ್ ಸಭೆಯಲ್ಲಿ ಹೇಳಿದರು.
ಕಂಪನಿಯು ಮುಂಬೈ ಮತ್ತು ದೆಹಲಿಯಲ್ಲಿ ಎರಡು ರಿಟೇಲ್ ಸ್ಟೋರ್ಗಳನ್ನು ಆರಂಭಿಸಿದೆ ಮತ್ತು ಅವು ನಾವು ನಿರೀಕ್ಷಿಸಿದ್ದಕ್ಕಿಂತ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿವೆ ಎಂದು ಕುಕ್ ತಿಳಿಸಿದರು.
ಇದನ್ನೂ ಓದಿ: ವಾಟ್ಸ್ಆ್ಯಪ್ ಡಬಲ್ ಟ್ಯಾಪ್ ಫೀಚರ್; ವಿಡಿಯೊ ಫಾರ್ವರ್ಡ್-ರಿವೈಂಡ್ ಮಾಡುವುದಿನ್ನು ಸರಾಗ!
