ಸ್ಯಾನ್ ಫ್ರಾನ್ಸಿಸ್ಕೊ : ವಿಡಿಯೋ ಗೇಮ್ ಗ್ರಾಫಿಕ್ಸ್ ತಂತ್ರಜ್ಞಾನದಲ್ಲಿ ಬಳಸಲ್ಪಡುವ ಸಿಲಿಕಾನ್ ಚಿಪ್ ಈಗ ತಂತ್ರಜ್ಞಾನ ವಲಯದಲ್ಲಿ ಅತಿ ಹೆಚ್ಚು ಚರ್ಚೆಗೊಳಗಾಗಿರುವ ವಿಷಯವಾಗಿದೆ. ಇದೊಂದು ಕೃತಕ ಬುದ್ಧಿಮತ್ತೆ (ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್) ಚಿಪ್ ಆಗಿದ್ದು, ಚಾಟ್‌ಜಿಪಿಟಿಯಂತಹ ಎಐ ವ್ಯವಸ್ಥೆಗಳನ್ನು ವೇಗವಾಗಿ ಮತ್ತು ಅಗ್ಗವಾಗಿ ನಿರ್ಮಿಸಲು ವಿಶೇಷವಾಗಿ ಇದನ್ನು ವಿನ್ಯಾಸಗೊಳಿಸಲಾಗಿದೆ.
ಇಂಥ ಚಿಪ್ಗಳು ಈಗ ಇದ್ದಕ್ಕಿದ್ದಂತೆ ಎಲ್ಲಿಲ್ಲದ ಪ್ರಾಮುಖ್ಯತೆ ಪಡೆದುಕೊಂಡಿವೆ. ಬರುವ ದಿನಗಳಲ್ಲಿ ಇವು ತಂತ್ರಜ್ಞಾನ ವಲಯಯದಲ್ಲಿ ಮಹತ್ತರ ಬದಲಾವಣೆ ತರಲಿವೆ ಹಾಗೂ ಆ ಮೂಲಕ ಜಗತ್ತನ್ನೇ ಬದಲಾಯಿಸಲಿವೆ ಎನ್ನುತ್ತಾರೆ ತಂತ್ರಜ್ಞರು. ಎಐ ಚಿಪ್ಗಳನ್ನು ತಯಾರಿಸುವ ಪ್ರಮುಖ ಕಂಪನಿ ಎನ್ವಿಡಿಯಾ (Nvidia) ಷೇರುಗಳು ಕಳೆದ ಗುರುವಾರ ಶೇಕಡಾ 25 ರಷ್ಟು ಏರಿಕೆಯಾಗಿವೆ. ಕಂಪನಿ ತನ್ನ ಆದಾಯದಲ್ಲಿ ಭಾರಿ ಏರಿಕೆಯಾಗಲಿದೆ ಎಂಬ ಮುನ್ಸೂಚನೆ ನೀಡಿದ ನಂತರ ಈ ಬೆಳವಣಿಗೆ ನಡೆದಿದೆ. ಮಂಗಳವಾರದ ಹೊತ್ತಿಗೆ ಕಂಪನಿಯ ಒಟ್ಟು ಸಂಪತ್ತಿನ ಮೌಲ್ಯ 1 ಟ್ರಿಲಿಯನ್ ಡಾಲರ್ ಆಗಿದ್ದು ಗಮನಾರ್ಹ.
ಎಐ ಚಿಪ್ಗಳೆಂದರೇನು: ಎಐ ಚಿಪ್ ಎಂದರೇನು ಎಂಬುದನ್ನು ಸ್ಪಷ್ಟವಾಗಿ ಸುಲಭವಾಗಿ ವ್ಯಾಖ್ಯಾನಿಸಲು ಸಾಧ್ಯವಿಲ್ಲ. ಆದಾಗ್ಯೂ ಎಐ ಕೆಲಸಗಳನ್ನು ಮಾಡುವ ಕಂಪ್ಯೂಟರ್ ಚಿಪ್ ಎಂದು ಇದನ್ನು ಕರೆಯಬಹುದು ಎನ್ನುತ್ತಾರೆ ಹಾನ್ನಾ ಡಾಹ್ಮೆನ್. ಇವರು ಸೆಂಟರ್ ಫಾರ್ ಸೆಕ್ಯೂರಿಟಿ ಆ್ಯಂಡ್ ಎಮರ್ಜಿಂಗ್ ಟೆಕ್ನಾಲಜಿ ಸಂಸ್ಥೆಯಲ್ಲಿ ರಿಸರ್ಚ್ ಅನಲಿಸ್ಟ್ ಆಗಿದ್ದಾರೆ. ಎಐ ಕೆಲಸಗಳನ್ನು ಮಾಡಲು ಸಾಧ್ಯವಾಗದ ಸಾಂಪ್ರದಾಯಿಕ ಕಂಪ್ಯೂಟರ್ಗಳಿಗೆ ಅಂಥ ಕೆಲಸಗಳನ್ನು ಹೇಗೆ ಮಾಡಬೇಕು ಎಂಬುದನ್ನು ಕಲಿಸಿಕೊಡುವ ಚಿಪ್ಗಳಾಗಿವೆ ಈ ಎಐ ಚಿಪ್ಗಳು.
ವಿಡಿಯೋ ಗೇಮ್ ಮೂಲ: ಕಂಪ್ಯೂಟೇಶನಲ್ ಗ್ರಾಫಿಕ್ಸ್ ವಲಯವನ್ನು ವಿಸ್ತರಿಸಲು ಮೂವರು ಉದ್ಯಮಿಗಳು 1993 ರಲ್ಲಿ ಎನ್ವಿಡಿಯಾವನ್ನು ಸ್ಥಾಪಿಸಿದರು. ಕೆಲವೇ ವರ್ಷಗಳಲ್ಲಿ, ಕಂಪನಿಯು ಗ್ರಾಫಿಕ್ಸ್ ಪ್ರೊಸೆಸಿಂಗ್ ಯುನಿಟ್ ಅಥವಾ ಜಿಪಿಯು ಎಂಬ ಹೊಸ ಚಿಪ್ ಅನ್ನು ಅಭಿವೃದ್ಧಿಪಡಿಸಿತು. ಇದು ಏಕಕಾಲದಲ್ಲಿ ಅನೇಕ ಸಂಕೀರ್ಣ ಗ್ರಾಫಿಕ್ಸ್ ಲೆಕ್ಕಾಚಾರಗಳನ್ನು ಮಾಡುವ ಮೂಲಕ ವೀಡಿಯೊ ಗೇಮ್‌ಗಳ ಅಭಿವೃದ್ಧಿ ಮತ್ತು ಆಟ ಎರಡನ್ನೂ ನಾಟಕೀಯವಾಗಿ ವೇಗಗೊಳಿಸಿತು.
ಔಪಚಾರಿಕವಾಗಿ ಸಮಾನಾಂತರ ಸಂಸ್ಕರಣೆ (parallel processing) ಎಂದು ಕರೆಯಲ್ಪಡುವ ಆ ತಂತ್ರವು ಗೇಮಿಂಗ್ ಮತ್ತು ಎಐ ಎರಡರ ಅಭಿವೃದ್ಧಿಗೆ ಪ್ರಮುಖವಾಗಿದೆ. ಟೊರೊಂಟೊ ವಿಶ್ವವಿದ್ಯಾನಿಲಯದ ಇಬ್ಬರು ಪದವೀಧರ ವಿದ್ಯಾರ್ಥಿಗಳು ಪ್ರತಿಸ್ಪರ್ಧಿಗಳಿಗಿಂತ ಕಡಿಮೆ ದೋಷ ದರದಲ್ಲಿ ಫೋಟೋ ಚಿತ್ರಗಳನ್ನು ಗುರುತಿಸುವ ಮೂಲಕ ಇಮೇಜ್‌ನೆಟ್ ಎಂಬ ಪ್ರತಿಷ್ಠಿತ 2012 ಎಐ ಸ್ಪರ್ಧೆಯನ್ನು ಗೆಲ್ಲಲು GPU-ಆಧಾರಿತ ನರಮಂಡಲವನ್ನು ಬಳಸಿದರು. ಈ ಗೆಲುವು ಎಐ ಸಂಬಂಧಿತ ಸಮಾನಾಂತರ ಸಂಸ್ಕರಣೆಯಲ್ಲಿ ಆಸಕ್ತಿ ಮೂಡಲು ಕಾರಣವಾಯಿತು. ಇದು ಎನ್ವಿಡಿಯಾ ಮತ್ತು ಅದರ ಪ್ರತಿಸ್ಪರ್ಧಿಗಳಿಗೆ ಹೊಸ ವ್ಯಾಪಾರದ ಅವಕಾಶವನ್ನು ತೆರೆದಿದೆ.
ಆಧುನಿಕ AI ಚಿಪ್ಗಳು: ಹನ್ನೊಂದು ವರ್ಷಗಳ ನಂತರ ಎಐ ವ್ಯವಸ್ಥೆಗಳನ್ನು ನಿರ್ಮಿಸಲು ಮತ್ತು ನವೀಕರಿಸಲು ಎನ್ವಿಡಿಯಾ ಚಿಪ್‌ಗಳ ಪ್ರಮುಖ ಪೂರೈಕೆದಾರ ಕಂಪನಿಯಾಗಿ ಹೊರಹೊಮ್ಮಿದೆ. ಅದರ ಇತ್ತೀಚಿನ ಉತ್ಪನ್ನಗಳಲ್ಲಿ ಒಂದಾದ H100 GPU, 80 ಬಿಲಿಯನ್ ಟ್ರಾನ್ಸಿಸ್ಟರ್ಗಳನ್ನು ಒಳಗೊಂಡಿದೆ. ಇದು ಮ್ಯಾಕ್‌ಬುಕ್ ಪ್ರೊ ಲ್ಯಾಪ್‌ಟಾಪ್‌ ನಲ್ಲಿರುವ ಇತ್ತೀಚಿನ ಉನ್ನತ ಮಟ್ಟದ ಪ್ರೊಸೆಸರ್‌ಗಿಂತ ಸುಮಾರು 13 ಮಿಲಿಯನ್ ಹೆಚ್ಚು ಟ್ರಾನ್ಸಿಸ್ಟರ್ಗಳನ್ನು ಒಳಗೊಂಡಿದೆ. ಆದರೆ, ಈ ತಂತ್ರಜ್ಞಾನ ತುಂಬಾ ದುಬಾರಿ ಎಂಬುದರಲ್ಲಿ ಆಶ್ಚರ್ಯವೇನಿಲ್ಲ. ಒಂದು ಆನ್‌ಲೈನ್ ರಿಟೇಲ್ ಸ್ಟೋರ್ನಲ್ಲಿ H100 ಚಿಪ್ನ ಬೆಲೆ 30,000 ಡಾಲರ್ ಆಗಿದೆ.
ಎನ್ವಿಡಿಯಾ ಈ ಸಂಕೀರ್ಣ GPU ಚಿಪ್ಗಳನ್ನು ಸ್ವತಃ ನಿರ್ಮಿಸುವುದಿಲ್ಲ. ಇಂಥ ಚಿಪ್ಗಳನ್ನು ನಿರ್ಮಾಣ ಮಾಡಬೇಕಾದರೆ ತುಂಬಾ ದೊಡ್ಡ ಮೊತ್ತದ ಹೂಡಿಕೆ ಮಾಡಬೇಕಾಗುತ್ತದೆ. ಹೀಗಾಗಿ ಎನ್ವಿಡಿಯಾ ಚಿಪ್ಗಳಿಗಾಗಿ ತೈವಾನ್ ಸೆಮಿಕಂಡಕ್ಟರ್ ಮ್ಯಾನುಫ್ಯಾಕ್ಚರಿಂಗ್ ಕಂಪನಿ ಮತ್ತು ಕೊರಿಯಾದ ಸ್ಯಾಮ್‌ಸಂಗ್ ಎಲೆಕ್ಟ್ರಾನಿಕ್ಸ್‌ನಂತಹ ಏಷ್ಯನ್ ಚಿಪ್ ಫೌಂಡರಿಗಳನ್ನು ಅವಲಂಬಿಸಿದೆ.
ಕ್ಲೌಡ್ ಕಂಪ್ಯೂಟಿಂಗ್ ಸೇವೆ ಕಂಪನಿಗಳಾದ ಅಮೆಜಾನ್ ಮತ್ತು ಮೈಕ್ರೊಸಾಫ್ಟ್ ಇಂಥ ಎಐ ಚಿಪ್‌ಗಳ ಬಹುದೊಡ್ಡ ಗ್ರಾಹಕವಾಗಿವೆ. ತಮ್ಮ ಎಐ ಕಂಪ್ಯೂಟಿಂಗ್ ತಂತ್ರಜ್ಞಾನವನ್ನು ಬಾಡಿಗೆಗೆ ನೀಡುವ ಮೂಲಕ, ಇವು ಮೊದಲಿನಿಂದಲೂ ತಮ್ಮದೇ ಆದ ಎಐ ಸಿಸ್ಟಮ್‌ಗಳನ್ನು ನಿರ್ಮಿಸಲು ಸಾಧ್ಯವಾಗದ ಸಣ್ಣ ಕಂಪನಿಗಳು ಮತ್ತು ಗುಂಪುಗಳಿಗೆ ಕ್ಲೌಡ್-ಆಧಾರಿತ ಸಾಧನಗಳನ್ನು ಬಳಸಲು ಸಾಧ್ಯವಾಗುವಂತೆ ಮಾಡುತ್ತದೆ.
ಎನ್ವಿಡಿಯಾ ಅನಿವಾರ್ಯವಾಗಿ ಕಠಿಣ ಸ್ಪರ್ಧೆಯನ್ನು ಎದುರಿಸಲಿದೆ ಎಂದು ವಿಶ್ಲೇಷಕರು ಹೇಳುತ್ತಾರೆ. ಅಡ್ವಾನ್ಸಡ್ ಮೈಕ್ರೊ ಡಿವೈಸಸ್ ಎನ್ವಿಡಿಯಾಗೆ ಪ್ರಬ ಪ್ರತಿಸ್ಪರ್ಧಿಯಾಗಲಿದೆ. ಇದು ಈಗಾಗಲೇ ಕಂಪ್ಯೂಟರ್ ಗ್ರಾಫಿಕ್ಸ್ ಚಿಪ್ಗಳಿಗಾಗಿ ಮಾರುಕಟ್ಟೆಯಲ್ಲಿ ಎನ್ವಿಡಿಯಾಗೆ ಪೈಪೋಟಿ ನೀಡುತ್ತಿದೆ. AMD ಇತ್ತೀಚೆಗೆ ತನ್ನದೇ ಆದ AI ಚಿಪ್‌ಗಳ ಶ್ರೇಣಿಯನ್ನು ಹೆಚ್ಚಿಸಲು ಕ್ರಮಗಳನ್ನು ತೆಗೆದುಕೊಂಡಿದೆ.
ಇದನ್ನೂ ಓದಿ : ಎಲೋನ್ ಮಸ್ಕ್ ಮತ್ತೆ ವಿಶ್ವದ ನಂ.1 ಶ್ರೀಮಂತ ವ್ಯಕ್ತಿ
