ಕುಷ್ಟಗಿ (ಕೊಪ್ಪಳ): ಕುಷ್ಟಗಿಯಲ್ಲಿ ಖೋಟಾನೋಟು ಹಾವಳಿ ಹೆಚ್ಚಾಗಿದ್ದು, ಸಾರ್ವಜನಿಕರು, ಕೂಲಿ ಕಾರ್ಮಿಕರು, ವ್ಯಾಪಾರಸ್ಥರು ಆತಂಕಗೊಂಡಿದ್ದಾರೆ.
ಕುಷ್ಟಗಿಯ ವ್ಯಕ್ತಿಯೊಬ್ಬರು ಕಳೆದ ವಾರ 500 ರೂ. ಮುಖಬೆಲೆಯ ನೋಟುಗಳನ್ನು ಸ್ಥಳೀಯವಾಗಿ ವ್ಯವಹರಿಸುವಾಗ ಅವರಿಗೆ ಈ ನಕಲಿ ನೋಟು ಕಂಡುಬಂದಿದೆ. 500 ರೂ. ಮುಖಬೆಲೆಯ ನೋಟು ಇದಾಗಿದ್ದು, ಇದರಲ್ಲಿ 8CS 051544 ಎಂಬ ಸಂಖ್ಯೆಗಳಿವೆ. ಸದರಿ ವ್ಯಕ್ತಿ ಹೊಸಪೇಟೆ ಔಷಧಿ ಅಂಗಡಿಯಲ್ಲಿ ನೀಡಿದಾಗ ಔಷಧಿ ಅಂಗಡಿಯಾತ ನಕಲಿ ಎಂದು ಪತ್ತೆ ಹಚ್ಚಿದ್ದು, ಈ ನೋಟು ಇಟ್ಟುಕೊಳ್ಳಬೇಡಿ ಹರಿದು ಹಾಕಿ ಎಂದು ಸಲಹೆ ನೀಡಿದ್ದಾನೆ.
ಈ ನಕಲಿ ನೋಟು 500 ರೂ. ನೋಟಿನ ತದ್ರೂಪವಾಗಿದ್ದು, ಜನ ಇಂತಹ ನೋಟುಗಳಿಂದ ಯಾಮಾರಿ ಕೈ ಸುಟ್ಟುಕೊಳ್ಳುವ ಬದಲಿಗೆ ಎಚ್ಚರಿಕೆಯಿಂದ ಇರಬೇಕಾಗಿದೆ. ಜೊತೆಗೆ ಪೊಲೀಸರು ನಕಲಿ ನೋಟಿನ ಹಾವಳಿಯನ್ನು ನಿಯಂತ್ರಿಸಬೇಕು ಎನ್ನುವ ಮಾತು ಕೇಳಿಬರುತ್ತಿದೆ.
