ಬಳ್ಳಾರಿಯಲ್ಲಿ ಮನೆ ಮೇಲ್ಛಾವಣಿ ಕುಸಿದು ದಂಪತಿ ಸಾವು: ಮಗ ಪ್ರಾಣಾಯದಿಂದ ಪಾರು

ಬಳ್ಳಾರಿ: ಮನೆ ಗೋಡೆ, ಮೇಲ್ಛಾವಣಿ ಕುಸಿದು ದಂಪತಿ ಮೃತಪಟ್ಟಿರುವ ಘಟನೆ ನಗರದ ಕೌಲ್​​ ಬಜಾರ ವ್ಯಾಪ್ತಿಯ ಕಡಪ ಬೀದಿಯಲ್ಲಿ ನಡೆದಿದೆ.  

ಅದೃಷ್ಟವಶಾತ್​ ಅವಘಡದಲ್ಲಿ ದಂಪತಿ 12 ವರ್ಷದ ಮಗ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಕೊಲ್ಲಣ್ಣ (45), ಸಾವಿತ್ರಮ್ಮ (40) ಮೃತ ದಂಪತಿ.  

ಆಟೋ ಚಾಲಕನಾಗಿದ್ದ ಕೊಲ್ಲಣ್ಣ ತನ್ನ ಕುಟುಂಬದೊಂದಿಗೆ ಮಣ್ಣಿನ ಮನೆಯಲ್ಲಿ ವಾಸಿಸುತ್ತಿದ್ದರು. ಇತ್ತೀಚೆಗೆ ಸುರಿದ ಮಳೆಗೆ ಮನೆಯ ಗೋಡೆ ಶಿಥಿಲಗೊಂಡಿತ್ತು. ಹೀಗಾಗಿ ಈ ದುರಂತ ಸಂಭವಿಸಿದೆ ಎಂದು ಹೇಳಲಾಗ್ತಿದೆ.

ಘಟನೆ ಬಗ್ಗೆ ಮೃತ ದಂಪತಿಯ ಮಗ ಸಂತೋಷ ಕುಮಾರ್ ಮಾತನಾಡಿ, ಜೋರಾಗಿ ಗಾಳಿ ಬೀಸಿದ ಪರಿಣಾಮ ಮನೆ ಗೋಡಿ ಕುಸಿದು ಬಿದ್ದು ಈ ಅನಾಹುತ ಜರುಗಿರುವುದಾಗಿ ತಿಳಿಸಿದ್ದಾನೆ.  

ಮೃತ ದಂಪತಿಯ ಸಂಬಂಧಿಕ ಮಂಜುನಾಥ್​ ಮಾತನಾಡಿ, ಕಳೆದ ಮೂರ್ನಾಲ್ಕು ದಿನಗಳಿಂದ ಮಳೆ ಬಿದ್ದ ಪರಿಣಾಮ, ಮಣ್ಣಿನ ಮನೆ ಕುಸಿದಿದೆ. ಘಟನೆಯಲ್ಲಿ ತನ್ನ ಪೋಷಕರನ್ನು ಕಳೆದುಕೊಂಡಿರುವ ಹುಡುಗನಿಗೆ ಸರ್ಕಾರ ಅಥವಾ ಜನಪ್ರತಿನಿಧಿಗಳು ವಸತಿ ಹಾಗೂ ವಿದ್ಯಾಭ್ಯಾಸಕ್ಕೆ ಅನುಕೂಲ ಮಾಡಿಕೊಡುವಂತೆ ಮನವಿ ಮಾಡಿದರು.