ಚಿತ್ರಕೂಟ (ಉತ್ತರ ಪ್ರದೇಶ): ಸ್ಥಳೀಯ ಕಾಂಗ್ರೆಸ್ ಮುಖಂಡ ಹಾಗೂ ಅವರ ಸೋದರಳಿಯನನ್ನು ನೆರೆ ಮನೆಯ ವ್ಯಕ್ತಿಯೇ ಗುಂಡಿಕ್ಕಿ ಹತ್ಯೆಗೈದಿರುವ ಘಟನೆ ಉತ್ತರ ಪ್ರದೇಶದ ಚಿತ್ರಕೂಟದಲ್ಲಿ ನಡೆದಿದೆ.
ಪ್ರಸಿದ್ಧಪುರ್ ಗ್ರಾಮದ ನಿವಾಸಿಯಾಗಿರುವ ಜಿಲ್ಲಾ ಕಾಂಗ್ರೆಸ್ನ ಮಾಜಿ ಅಧ್ಯಕ್ಷ ಅಶೋಕ್ ಪಟೇಲ್ (55) ಮೃತ ಕೈ ನಾಯಕ.
ಅಶೋಕ್ ಪಟೇಲ್ ಅವರಿಗೆ ಆರೋಪಿ ಕಮಲೇಶ್ ಕುಮಾರ್ ಜೊತೆ ವೈಷಮ್ಯವಿತ್ತು. ಇದೇ ಕಾರಣದಿಂದ ಮಂಗಳವಾರ ರಾತ್ರಿ ಅಶೋಕ್ರ ಮನೆಗೆ ನುಗ್ಗಿದ ಕಮಲೇಶ್ ಅವರ ಮೇಲೆ ಗುಂಡು ಹಾರಿಸಿದ್ದಾನೆ. ಕೃತ್ಯವನ್ನು ತಡೆಯಲು ಬಂದ ಪಟೇಲ್ರ ಸೋದರಳಿಯ ಶುಭಂ (28)ಗೂ ಗುಂಡಿಕ್ಕಿ ಆರೋಪಿ ಹತ್ಯೆಗೈದಿದ್ದಾನೆ ಎಂಬ ಮಾಹಿತಿ ದೊರೆತಿದೆ.
ಓದಿ: ಹೊಟೇಲ್‌ನಲ್ಲಿ ಎರಡು ಗುಂಪುಗಳ ನಡುವೆ ಹೊಡೆದಾಟ: ಸಿಸಿಟಿವಿ ದೃಶ್ಯ
ಘಟನೆಯಿಂದ ಆಕ್ರೋಶಗೊಂಡ ಪಟೇಲ್ ಕುಟುಂಬಸ್ಥರು ಆರೋಪಿಯ ಮನೆಗೆ ಬೆಂಕಿ ಹಚ್ಚಿ ಸುಡಲೆತ್ನಿಸಿದ್ದಾರೆ. ಸ್ಥಳಕ್ಕೆ ದೌಡಾಯಿಸಿದ ಪೊಲೀಸರು ಪರಿಸ್ಥಿತಿಯನ್ನು ತಿಳಿಗೊಳಿಸಿದ್ದಾರೆ.
ಆರೋಪಿ ಕಮಲೇಶ್ ಕುಮಾರ್ ಪರಾರಿಯಾಗಿದ್ದು, ಆತನನ್ನು ಹುಡುಕಲು ತಂಡವೊಂದನ್ನು ರಚಿಸಲಾಗಿದೆ. ಗ್ರಾಮದಲ್ಲಿ ಅಹಿತಕರ ಘಟನೆ ನಡೆಯದಂತೆ ಪೊಲೀಸರನ್ನು ನಿಯೋಜನೆ ಮಾಡಲಾಗಿದೆ ಎಂದು ಪೊಲೀಸ್ ವರಿಷ್ಠಾಧಿಕಾರಿ ಅಂಕಿತ್ ಮಿಠ್ಠಲ್ ಹೇಳಿದ್ದಾರೆ.
