ರಾಂಚಿ: ಜಾರ್ಖಂಡ್ನ ರಾಂಚಿ ರೈಲ್ವೆ ನಿಲ್ದಾಣದಲ್ಲಿ 14 ಬಾಲಕಿಯರನ್ನು ರೈಲ್ವೆ ಸಂರಕ್ಷಣಾ ಪಡೆ (ಆರ್‌ಪಿಎಫ್) ರಕ್ಷಿಸಿದ್ದು, ಓರ್ವ ಮಹಿಳೆಯನ್ನು ಬಂಧಿಸಿದೆ.
ಅಪ್ರಾಪ್ತೆಯರನ್ನು ಜಾರ್ಖಂಡ್ನ ಲತೇಹರ್‌ನಿಂದ ಹೈದರಾಬಾದ್‌ಗೆ ರೈಲಿನಲ್ಲಿ ಸಾಗಿಸಲಾಗುತ್ತಿತ್ತು. ರಾಂಚಿ ನಿಲ್ದಾಣದ ಪ್ರವೇಶದ್ವಾರದಲ್ಲಿ ಬಾಲಕಿಯರ ಗುಂಪನ್ನು ಗಮನಿಸಿರುವ ಆರ್‌ಪಿಎಫ್ ತಂಡವು ಎಚ್ಚೆತ್ತುಕೊಂಡಿದೆ. ಈ ಗುಂಪಿನಲ್ಲಿದ್ದ ಹುಡುಗಿಯೊಬ್ಬಳ ಬಳಿ ಆರ್‌ಪಿಎಫ್‌ನ ಮಹಿಳಾ ಸಿಬ್ಬಂದಿ ಎಲ್ಲಿಗೆ ಹೋಗುತ್ತಿದ್ದೀರಾ ಎಂದು ಕೇಳಿದಾಗ ಆಕೆ ಉತ್ತರಿಸಲಿಲ್ಲ.
ಈ ಮಾಹಿತಿಯನ್ನು ಸಂಬಂಧಪಟ್ಟ ಅಧಿಕಾರಿಗಳಿಗೆ ರವಾನಿಸಿದ ಆರ್‌ಪಿಎಫ್ ತಂಡ ಬಾಲಕಿಯರನ್ನು ರಕ್ಷಿಸಿ ವಿಚಾರಣೆಗೊಳಪಡಿಸಿದೆ. ಈ ವೇಳೆ, ಮೀನಾ ದೇವಿ ಎಂಬ ಮಹಿಳೆ ಅವರನ್ನು ಹೊಲಿಗೆ ತರಬೇತಿಗೆಂದು ಸುಳ್ಳು ಹೇಳಿ ಕರೆದೊಯ್ಯುತ್ತಿದ್ದಾರೆ ಎಂಬ ವಿಚಾರ ತಿಳಿದು ಬಂದಿದೆ.
ಈ ಬಗ್ಗೆ ಮೀನಾ ದೇವಿಯನ್ನು ವಿಚಾರಿಸಿದರೆ, ಆಕೆಗೆ ಯಾವುದೇ ಸಂಸ್ಥೆಯ ಹೆಸರನ್ನು ಉಲ್ಲೇಖಿಸಲು ಅಥವಾ ಯಾವುದೇ ಕಾನೂನು ದಾಖಲೆಗಳನ್ನು ಸಲ್ಲಿಸಲು ಸಾಧ್ಯವಾಗಲಿಲ್ಲ. ಹೀಗಾಗಿ ಮೀನಾ ದೇವಿಯನ್ನು ಬಂಧಿಸಿದ ಪೊಲೀಸರು ಮಾನವ ಕಳ್ಳಸಾಗಣೆ ಹಿಂದಿನ ಜಾಲವನ್ನು ಪತ್ತೆ ಹಚ್ಚುತ್ತಿದ್ದಾರೆ.
