ಇಸ್ಲಾಮಾಬಾದ್, ಪಾಕಿಸ್ತಾನ: ಪಾಕಿಸ್ತಾನದಲ್ಲಿ ಆರ್ಥಿಕ ಬಿಕ್ಕಟ್ಟು ಮತ್ತಷ್ಟು ಹೆಚ್ಚಾಗುತ್ತಿದೆ. ಪಾಕಿಸ್ತಾನದಲ್ಲಿ ಹಣದುಬ್ಬರವು ಅದರ ಎಲ್ಲಾ ದಾಖಲೆಗಳನ್ನು ಮುರಿದಿದೆ. ಈ ಹಣದುಬ್ಬರ ದರವು ಈಗ ಮೇ ತಿಂಗಳಲ್ಲಿ ಶೇಕಡಾ 38 ಕ್ಕೆ ತಲುಪಿದೆ. ಇದು ಪಾಕಿಸ್ತಾನದ ಸ್ವಾತಂತ್ರ್ಯದ ನಂತರ ಅತಿ ಹೆಚ್ಚು.
1957 ರಿಂದ ಪಾಕಿಸ್ತಾನದಲ್ಲಿ ಹಣದುಬ್ಬರದ ಅಂಕಿ - ಅಂಶಗಳನ್ನು ಇರಿಸಲಾಗಿದೆ. ಕಳೆದ ತಿಂಗಳು ಪಾಕಿಸ್ತಾನದಲ್ಲಿ ಹಣದುಬ್ಬರ ದರ ಶೇ.36.4 ರಷ್ಟಿತ್ತು. ಆಹಾರ ಧಾನ್ಯಗಳ ಬೆಲೆಯಲ್ಲಿ ಭಾರಿ ಏರಿಕೆ ಆಗಿರುವುದರಿಂದ ಹಣದುಬ್ಬರ ದರ ಏರಿಕೆಯಾಗಿದೆ ಎಂದು ಹೇಳಲಾಗುತ್ತಿದೆ. ಆದರೆ ಈಗ ಪಾಕಿಸ್ತಾನಕ್ಕೆ ಅಂತಾರಾಷ್ಟ್ರೀಯ ಹಣಕಾಸು ನಿಧಿಯಿಂದ ಸಾಲ ಪಡೆಯುವ ಮಾರ್ಗ ಮುಚ್ಚಿದಂತಾಗಿದೆ.
ಹೌದು, IMF ಕೂಡ ಶೆಹಬಾಜ್ ಷರೀಫ್ ಅವರ ಸಾಲದ ಮನವಿಯನ್ನು ತಿರಸ್ಕರಿಸಿದೆ. ಮತ್ತೊಮ್ಮೆ ಐಎಂಎಫ್‌ಗೆ ಮನವಿ ಮಾಡುವುದನ್ನು ಬಿಟ್ಟು ಪಾಕಿಸ್ತಾನಕ್ಕೆ ಬೇರೆ ದಾರಿಯಿಲ್ಲ ಎಂದು ತಜ್ಞರು ಹೇಳಿದ್ದಾರೆ. ಕಳೆದ ವರ್ಷ ಪಾಕಿಸ್ತಾನದಲ್ಲಿ ಹಣದುಬ್ಬರ ದರವು ಮೇ ತಿಂಗಳಲ್ಲಿ 13.76 ಪ್ರತಿಶತದಷ್ಟಿತ್ತು. ಆದರೆ, ಈಗ ಅದು ಗರಿಷ್ಠ ಮಟ್ಟವನ್ನು ತಲುಪಿದೆ. ಹಣದುಬ್ಬರವನ್ನು ನಿಯಂತ್ರಿಸಬಹುದು ಮತ್ತು ಐಎಂಎಫ್‌ನಿಂದ ಸಾಲ ಪಡೆಯುತ್ತಾರೆ ಎಂಬ ಭರವಸೆಯೊಂದಿಗೆ ಪಾಕಿಸ್ತಾನದ ಶಹಬಾಜ್ ಸರ್ಕಾರ ಹೊಸ ಹಣಕಾಸು ಸಚಿವ ಇಶಾಕ್ ದಾರ್ ಅವರನ್ನು ಕರೆತಂದಿದೆ. ಆದರೆ ಅವರು ಸಂಪೂರ್ಣ ವಿಫಲರಾಗಿದ್ದಾರೆ ಎಂದು ಸಾಬೀತುಪಡಿಸಿದ್ದಾರೆ.
ಹಣದುಬ್ಬರದಲ್ಲಿ ಪಾಕಿಸ್ತಾನವು ಲಂಕಾವನ್ನು ಹಿಂದಿಕ್ಕಿದೆ. ಜಿನ್ನಾ ಅವರ ಕನಸಿನ ಪಾಕಿಸ್ತಾನ ಈಗ ಏಷ್ಯಾದ ಅತ್ಯಂತ ಹಣದುಬ್ಬರ ದೇಶವಾಗಿ ಮಾರ್ಪಟ್ಟಿದೆ. ಇಲ್ಲಿಯವರೆಗೆ ಶ್ರೀಲಂಕಾ ಅತ್ಯಧಿಕ ಹಣದುಬ್ಬರವನ್ನು ಹೊಂದಿತ್ತು. ಆದರೆ, ಪಾಕಿಸ್ತಾನವು ಅದನ್ನು ಹಿಂದಿಕ್ಕಿ ಬಿಟ್ಟಿದೆ. ಪಾಕಿಸ್ತಾನದಲ್ಲಿ ಹಣದುಬ್ಬರ ನಿರಂತರವಾಗಿ ಹೆಚ್ಚುತ್ತಿದ್ದು, ಶ್ರೀಲಂಕಾದಲ್ಲಿ ಹಣದುಬ್ಬರವು ಕಳೆದ 8 ತಿಂಗಳಿನಿಂದ ವೇಗವಾಗಿ ಇಳಿಯುತ್ತಿದೆ. ಶ್ರೀಲಂಕಾದಲ್ಲಿ ಹಣದುಬ್ಬರ ದರವು ಮೇ ತಿಂಗಳಲ್ಲಿ 25.2 ರಷ್ಟು ಇತ್ತು, ಏಪ್ರಿಲ್‌ನಲ್ಲಿ 35.3 ಶೇಕಡಾಕ್ಕೆ ಹೋಲಿಸಿದರೆ. ಏತನ್ಮಧ್ಯೆ, IMF ನಿಂದ ಸಾಲದ ಮಾರ್ಗವನ್ನು ಮುಚ್ಚಿದ ನಂತರ ಶ್ರೀಲಂಕಾದಂತೆ ಪಾಕಿಸ್ತಾನದ ಡೀಫಾಲ್ಟ್ ಅಪಾಯವು ಈಗ ದೊಡ್ಡದಾಗಿದೆ.
ಪಾಕಿಸ್ತಾನಕ್ಕೆ ಸಾಲ ನೀಡಲು ಐಎಂಎಫ್ ಇನ್ನೂ ಸಿದ್ಧವಾಗಿಲ್ಲ ಎಂದು ಪಾಕಿಸ್ತಾನದ ಹಣಕಾಸು ರಾಜ್ಯ ಸಚಿವ ಆಯೇಷಾ ಗೌಸ್ ಪಾಶಾ ಗುರುವಾರ ಹೇಳಿದ್ದಾರೆ. ಈ ಬಗ್ಗೆ ಹಣಕಾಸು ಖಾತೆಯ ರಾಜ್ಯ ಸಚಿವೆ ಡಾ ಆಯೇಷಾ ಗೌಸ್ ಪಾಷಾ ಮಾತನಾಡಿ, 6 ಶತಕೋಟಿ ಡಾಲರ್ ಹೆಚ್ಚುವರಿ ಸಾಲವನ್ನು ಪಡೆಯುವ ಅಗತ್ಯವನ್ನು ಕಡಿಮೆ ಮಾಡುವ ಪಾಕಿಸ್ತಾನದ ಮನವಿಯನ್ನು ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ನಿರಾಕರಿಸಿದೆ. ನಾವು IMF ಗೆ ಮತ್ತೆ ಸಾಲ ನೀಡುವಂತೆ ಮನವಿ ಮಾಡುವುದು ಬಿಟ್ರೆ ನಮಗೆ ಬೇರೆ ದಾರಿ ಇಲ್ಲ. ಐಎಂಎಫ್ ಕಾರ್ಯಕ್ರಮ ಬಿಟ್ಟರೆ ನಮ್ಮ ಸರ್ಕಾರ ಯಾವುದೇ ಪ್ಲಾನ್ ಬಿ ಹೊಂದಿಲ್ಲ ಎಂದರು.
ಅವರ ನಿರಂತರ ಮನವಿಯ ನಂತರವೂ ಐಎಂಎಫ್ ಸಾಲ ನೀಡಲು ಸಿದ್ಧವಾಗುತ್ತಿಲ್ಲ ಎಂದು ಅವರು ಒಪ್ಪಿಕೊಂಡರು. ಸೌದಿ ಅರೇಬಿಯಾ ಮತ್ತು ಯುಎಇ ಪಾಕಿಸ್ತಾನಕ್ಕೆ $3 ಬಿಲಿಯನ್ ಭರವಸೆ ನೀಡಿವೆ. ಆದರೆ, ಹಲವು ದಿನಗಳ ನಂತರವೂ ಅವರ ಹಣವನ್ನು ಸ್ವೀಕರಿಸಿಲ್ಲ. ಇದರಿಂದ ಪಾಕಿಸ್ತಾನದ ಆರ್ಥಿಕ ಸಂಕಷ್ಟ ಹೆಚ್ಚುತ್ತಿದೆ. ಈಗ ಸಾಲಕ್ಕಾಗಿ ಪಾಕಿಸ್ತಾನ ಐಎಂಎಫ್‌ಗೆ ಮತ್ತೊಮ್ಮೆ ಮನವಿ ಮಾಡಿಕೊಳ್ಳುತ್ತಾ ಎಂಬುದು ಕಾದು ನೋಡಬೇಕಾಗಿದೆ. ಪಾಕಿಸ್ತಾನ ಸರ್ಕಾರಕ್ಕೆ ಕಳೆದ ನಾಲ್ಕು ವರ್ಷಗಳಲ್ಲಿ ಒಟ್ಟಾರೆ USD 6.5 ಬಿಲಿಯನ್ ಪಾರುಗಾಣಿಕಾ ಪ್ಯಾಕೇಜ್‌ನಲ್ಲಿ IMF ಈಗಾಗಲೇ USD 3.9 ಶತಕೋಟಿಯನ್ನು ಪಾವತಿಸಿದೆ.
ಇನ್ನು ಐಎಂಎಫ್ ಕೂಡಾ ಪಾಕ್ಗೆ ಸಾಲ ನೀಡಲು ಷರತ್ತೊಂದು ಹಾಕಿದೆ. ನಿಮ್ಮ ದೇಶದಲ್ಲಿ ಹರಡಿರುವ ಅಸ್ಥಿರತೆಯನ್ನು ಹೋಗಲಾಡಿಸಿದಾಗ ಮಾತ್ರ ನಾವು ಸಾಲ ನೀಡುತ್ತೇವೆ ಎಂದು ಐಎಂಎಫ್ ಹೇಳಿದೆ.
