ಟೆಹ್ರಾನ್(ಇರಾನ್): ಉಕ್ರೇನ್ ಮೇಲೆ ದಾಳಿ ಮುಂದುವರೆದ ಮಧ್ಯೆಯೇ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಇರಾನ್ ಪ್ರವಾಸ ಕೈಗೊಂಡಿದ್ದಾರೆ. ಇದು ಯುದ್ಧಾರಂಭವಾದ ಬಳಿಕ ಪುಟಿನ್ ಕೈಗೊಂಡ ಮೊದಲ ವಿದೇಶ ಪ್ರವಾಸವಾಗಿದ್ದು, ಇರಾನ್ನ ಸರ್ವೋಚ್ಛ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರೊಂದಿಗೆ ಮಾತುಕತೆ ನಡೆಸಿದರು.
ಫೆಬ್ರವರಿ 24 ರಂದು ರಷ್ಯಾ ಉಕ್ರೇನ್ ಮೇಲೆ ಆಕ್ರಮಣ ಘೋಷಿಸಿದ ಬಳಿಕ ಸೋವಿಯತ್ ಒಕ್ಕೂಟದ ಹೊರ ರಾಷ್ಟ್ರಗಳಿಗೆ ಅಧ್ಯಕ್ಷ ಪುಟಿನ್ ಭೇಟಿ ನೀಡಿರಲಿಲ್ಲ. ಇರಾನ್ಗೆ ಮಂಗಳವಾರ ಭೇಟಿ ನೀಡುವ ಮೂಲಕ ಉಭಯ ರಾಷ್ಟ್ರಗಳ ನಡುವಿನ ಸಹಕಾರದ ಬಗ್ಗೆ ಚರ್ಚಿಸಿದರು.
ಇರಾನ್ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ಜೊತೆಗಿನ ಮಾತುಕತೆಯ ವೇಳೆ ಉಕ್ರೇನ್ ಮೇಲಿನ ದಾಳಿಗೆ ಬೆಂಬಲ ನೀಡುವಂತೆ ಪುಟಿನ್ ಕೋರಿದ್ದಾರೆ ಎಂದು ತಿಳಿದು ಬಂದಿದೆ. ಅಲ್ಲದೇ ಪಾಶ್ಚಿಮಾತ್ಯ ರಾಷ್ಟ್ರಗಳ ನಿರ್ಬಂಧಗಳ ಬಗ್ಗೆಯೂ ಪ್ರಸ್ತಾಪಿಸಲಾಗಿದೆ.
ಇರಾನ್ ಬೆಂಬಲ: ಉಕ್ರೇನ್ ಮೇಲಿನ ರಷ್ಯಾದ ಮಿಲಿಟರಿ ಕಾರ್ಯಾಚರಣೆಗೆ ಇರಾನ್‌ನಿಂದ ಬಲವಾದ ಬೆಂಬಲ ವ್ಯಕ್ತವಾಗಿದೆ. ಸ್ವತಂತ್ರ ಮತ್ತು ಬಲಿಷ್ಠ ರಷ್ಯಾವನ್ನು ಪಾಶ್ಚಿಮಾತ್ಯ ರಾಷ್ಟ್ರಗಳು ವಿರೋಧಿಸುತ್ತಿವೆ. ಉಕ್ರೇನ್‌ಗೆ ಮೇಲೆ ರಷ್ಯಾ ಹಿಡಿತ ಸಾಧಿಸದಿದ್ದರೆ, ನ್ಯಾಟೋ ಪಡೆಗಳೇ ಆ ದೇಶದ ಮೇಲೆ ದಾಳಿ ಮಾಡುತ್ತಿದ್ದವು ಎಂದು ಅಲಿ ಖಮೇನಿ ಹೇಳಿದ್ದಾರೆ. ಯುದ್ಧ ಘೋಷಣೆ ವ್ಲಾಡಿಮಿರ್ ಪುಟಿನ್ ಅವರ ಗಟ್ಟಿ ನಿರ್ಧಾರವಾಗಿದೆ. ರಷ್ಯಾ ಮತ್ತು ಇರಾನ್ ನಡುವಿನ ನಿಕಟ ಸಂಬಂಧ ಮುಂದುವರಿಯುತ್ತದೆ ಎಂದೂ ಹೇಳಿದ್ದಾರೆ.
ಉಕ್ರೇನ್ ದಾಳಿ ಬಳಿಕ ರಷ್ಯಾಧ್ಯಕ್ಷರ ಆರೋಗ್ಯದ ಬಗ್ಗೆ ಹಲವು ಊಹಾಪೋಹಗಳು ಹರಿದಾಡಿದ್ದವು. ಕ್ಯಾನ್ಸರ್, ಚರ್ಮ ಸಂಬಂಧಿ ರೋಗದಿಂದ ಪುಟಿನ್ ಬಳಲುತ್ತಿದ್ದಾರೆ ಎಂದೆಲ್ಲಾ ಹೇಳಲಾಗಿತ್ತು. ವಿದೇಶಿಗರು ಬಂದಲ್ಲಿ ದೂರದಲ್ಲಿಯೇ ನಿಲ್ಲಿಸಿ ಮಾತನಾಡುತ್ತಾರೆ. ಪುಟಿನ್ ದೈಹಿಕ ಕ್ಷಮತೆಯನ್ನು ಕಳೆದುಕೊಂಡ ಬಗ್ಗೆಯೂ ಪುಂಖಾನುಪುಂಖವಾಗಿ ವರದಿ ಬಿತ್ತರವಾಗಿದ್ದವು.
ಇದನ್ನೂ ಓದಿ: ಸ್ಪೇನ್, ಪೋರ್ಚುಗಲ್ ಬಳಿಕ ಟೆಕ್ಸಾಸ್ ಕಾಡಿಗೆ ಬೆಂಕಿ; ಬಿಸಿಗಾಳಿಗೆ ತತ್ತರಿಸಿದ ಜನರು
